Гьамусяаьт «Земский духтир» федералин программайиинди хайлин кьадар жигьил пишекрари, 5 йисазди йикьрар йитIну, гъулариъ духтирвалин ляхин апIура. Йиз фикриан, думу гизаф кIубан ва аферинвализ лайикь ляхин ву, фицики таниш дару йишваъ, таниш дару касарихъди ляхин апIуз варидарихьан шлуб дар.
Гъийин йиз макьалайиъ зиихъ улупнайи программайин дахилнаъди дарди, чан хушниинди дуфну, НичIрасарин гъулаъ фельдшервалин ляхин апIурайи Дербент райондин Рукларин гъулан агьали Беслан Мягьямедовдикан ктибтуз ккундузуз.
Беслан Мягьямедов 2015-пи йисхъан мина НичIрасарин ФАП-дин заведующийди лихура. Дюзди гъапиш, гъулаъ ФАП-дин идара адар, гьаддиз лигну, дугъу аьзарлуйир чав яшамиш шулайи хулаъ кьабул апIура.
Му гъулаз фици алдахънуш, гъуландари учв фици кьабул гъапIнуш, дугъу ич арайиъ гъабхьи сюгьбатнаъ мялум гъапIнийи. Беслан Мягьямедовдин гафариинди, 2008-пи йисан мектеб ккудубкIну, думу Дербентдин медицинайин училищейик урхуз кучIвну.
«Медицинайин училище ккудубкI-балан кьяляхъ, цIиб вахтна узу къанун уьбхру органариъ медицинайин ляхин давам апIуз хъюгънийза. Гьаз-вуш душваъ зат кьабул гъабхьундайзуз, ва ляхниан удучIвнийза. Гьадму вахтна НичIрасна духтир ккунди а кIури, хабар гъабхьнийи. Узу абйир-бабарихъди хулаъ гафар дапIну ва дурарихьан ихтияр гъадабгъну, му гъулаз гъюбан къарар адабгъза. Магьа, мушваъ яшамиш шули, сарун 6 йис вуйиз. Гизаф ужуб, сабурлу, дуствал айи, хялар кьабул апIуз ккуни гъул ву. Гьаму йисарин арайиъ гьич сабанра узу мина жара йишвлан дуфнайирси гъабхьундарзуз.
Ляхин апIуз хъюгъю вахтна вари гъуландари, таниш хьпан бадали, нубатнахъди гьар йишван узу хялижв гъапIнийи. ЙИЗ ГЪУЛАН вари жямяаьтдиз, узу жвуванурси кьабул апIбаз, аьхю чухсагъул вуйиз. Мицдар ужудар инсанар айи гъулаз гъюб’ин гьич затра швумал дарза», – кIура жигьил пишекри.
НичIрас гъул агьалйирин медицинайиъ айи игьтияжар гьуркIбаз сар пишекриз аьхю гъул ву. Мушваъ 130-тIан артухъ хизанар яшамиш шула.
«Вари гъулан агьалйир узухьна илтIикIура. Хъа асас вуди гъулаъ яшамиш шулайидар яшлуйир вуйивализ лигну, гизафси медицинайин кюмек лазим вуйидарра гьадрар ву. Гизафси давление айидар, юкIв иццурайидар, гьацира ОРЗ-йин, ОРВИ-йин, гъюргъюваларин, кцIабху-алцIабхуваларин аьрзйир кайи инсанар илтIикIури шулу. Эпилепсияйин уьзур кади тIирх алабхърудар, бицIидар кайивалиан сабпну давление за гъабхьи дишагьлийир, онкологияйин уьзур кайидар аьрза хьади илтIикIру вахтарра шулу. Саспиган лап гъагъи гьялнаъ айи аьзарлуйир Хючназ гъахуз хъуркьри адруган, гьятта хирургарин ляхинра апIури шулза, гъибтиш, кьан шулу.
Хъа гизафдариз больницайиз гъягъюз ккунди шулдар. Магьа цци хьадукра, ич гъулаъ 8 каскьан коронавирус уьзур кубчIвну, аьзарлу гъахьнийи. Гьадрарикан гьацIар «уьру зонайиъ» сагъ гъахьну, хъа имбудар хулаъ гъузну. Хулаъ сагъ хьуз гъузрайидарин гьякьнаан вари жавабдарвал уз’ина гъадабгъунза. Коронавирусдиан аьзарлу гъахьи касарин хулариъра дезинфекция гъапIунча ва гьаддихъди аьлакьалу серенжемар гъухунча
Читинваларикан улхуруш, гьарсаб ляхниъ чан читинвалар алахьури шулу. Йиз ляхниъ варитIан гъагъиди алабхъурайиб – гъулаъ ФАП-дин идара ва аьзарлуйир итну гъахуз шлу машин адрувал ву. Хъа лазим шлу дармнарихъди учу райондин больницайиан тямин апIура, Чухсагъул райондин больницайин кIулин духтир Абсередин Мирзабеговдиз.
Кюмек ккун апIурайи аьзарлуйир кьабул апIуз, узу яшамиш шулайи хулариъ лазим шлу вари алатарихъдира албагну, саб бицIи йишв гьязур дапIназа, хъа лап читин гьялнаъ ади иццурайидарихьна фуну вахтна вушра чпин хулаз гъягъюраза.
Гъул райондин центрихьан ярхла ерлешмиш дубхьна, рякъяр ужудар дар. Гьаци вушра, лап гъагъиди аьзарлу гъахьи касар узу йиз хусуси машиндиъди райондин больницайизра фуну вахтна вушра гъахури шулза», – ктибтура Беслан Мягьямедовди.
Гьаму йисарин арайиъ Беслан Мягьямедовдин терефназ НичIрас гъулан агьалйирихьан сабкьан наразивалин аьрза дуфнадар.
НичIрасна мицир пишекар гъювалиин гъуландарра гизаф рази ву. Варидари дугъаз чухсагъул мялум апIура.
