Аьхиримжи йисари Дагъустандин гизаф районариъ, гьадму гьисабнаан Табасаран райондиъра, спортдин артмиш’вализ гизаф фикир тувра. Гъулариъ утканди ккабалгнайи, футбол уйнамиш апIру майднар тикмиш апIура. Вари гьаму ляхнар, гъулариъ айи жигьилар спортдиин машгъул хьпан бадали, дурари чпин азад вахт файдасузди ададапIбан бадали, кIули гъахурайидар ву.
Улихьна йигъари «Таба-сарандин нурар» газатдин редакцияйиз жигьиларин ляхнариз лигру Федералин агентствойин грант гъадабгъу, РД-йин жигьиларин ляхнариз лигру министерствойин багахь хьайи республикайин жигьиларин центрин директорин заместитель Марат Рягьимовдиз теклиф гъапIнийча. Дугъу чав гъабхурайи ляхникан газат урхурайидариз саб жерге мялуматар тувнийи.
– Дугъриданра, аьхиримжи йисари республикайин хайлин районариъ спортдин серенжемар кIули гъахбаз гизаф фикир тувра. Гъадагъу грантар уьмриз кечирмиш апIури, учура Табасаран райондин администрацияйин кюмекниинди футболин жюрбежюр серенжемар гъахурача.
Мини-футболиан Табасаран райондин Хючна гъулаъ кIули гъушу финалин талитариъ вари райондиан 22 команда иштирак гъахьнийи. Думу командйирин дахилнаъ 14 йислан 30 йис’ина яш дубхьнайи баяр айи. Грантдин тIалабариз асас вуди, футболин гьарсаб командайиъ мектебдиъ урхурайи кьюр бай духьну ккундийи. Турнириъ сабпи йишв гъадабгъну, Хючнаарин гъулан советдин команда чемпион гъабхьнийи, кьюбпи йишв – Къужникарин гъулан советдин, хъа шубубпи йишв – Гурхъарин гъулан советдин футболин командйири гъадагънийи.
Дупну ккундуки, гъалиб гъахьи командйириз грамотйир, медалар, кубокар, спонсорарин терефнаан пулин пешкешар тувнийи. Гьацира турнирин ужударсдар футболистарра лишанлу гъапIнийи: варитIан ужурсир алжагърурди Мягьямед ТIаибов (Къужник), ужурсир вратарди Гьяжимурад Къурбанов (Хючна) гьисаб гъапIнийи, Ягъдигъ гъулан ва Хюрикк гъулан футболин командйирин вакиларира чпин устадвал улупнийи. Грантдин дакьатарихъ масу гъадагъну, вари командйирин вакилариз футбол уйнамиш апIруган алахьру палтарра тувну.
Сентябрин вазлиъ Табасаран райондин Хючна гъулаъ мини-футболиан Дагъустан Республикайин ачухъ вуйи чемпионатра кIули гъубхнийи. Думу талитариз саки 20 райондиан ужударсдар командйир уч гъахьнийи. Жигьиларин футболихьна вуйи маракьлувал аьхюб ву. Хъа чпиз гьюрмат апIруган, гьелбетда, футболихьна вуйи дурарин аьшкь хъана артухъ шулу.
Табасаран райондиъ гъабхру гьарсаб серенжем райондин главайин иштрак’вал адарди кIули гъябгъюрдар. Спортдиз гьамциб фикир туврайивализ лигну, жигьиларин ва йиз терефнаан Мягьямед Сиражудиновичдиз чухсагъул мялум апIуз ккундузуз. Думу жигьиларин ляхнарихъди лап багахьди таниш ву. Проект уьмриз кечирмиш апIуз кюмек туву дестейизра чухсагъул дарпиди гъитуз шулдарзухьан. Мицисдар серенжемар гъахбан бадали, гизаф ляхин апIувал алабхъуру. Табасаран райондин администрацияйин спортдин отделин начальник Садикь Уьсмановди, райондин жигьиларин центрин директор Рамис Рамазановди, Агъариза Аьлиризаевди, пешкешарин фонд тешкил дапIнайи спонсорари турнир гъабхуз гъапIу тешкиллувалин кюмек лап аьхюб ву.
Райондиъ талитар гъахруган, тешкиллувалиинди ляхин кIулиз адабгъури шулча. Хъа гьаму йисан мини-футболиан республикайин чемпионат гъабхруган, командйир Мягьячгъалайиз гъювалихъди, дурариз ипIруб-убхъруб гьивбахъди ва тешкиллувалин жара ляхнарихъди аьлакьалу читинвалар алахьунчуз. Мидланра савайи, коронавирусдин инфекция тарабгънайивализ лигну, мицдар серенжемар тешкил апIруган, Роспотребнадзорин тIалабар тамам апIурача. Вари командйир сатIиди уч дархьбан бадали, гьарсаб командайиз чпин вахт диврача. Футболиз лигуз ккунидарра гизаф шулу, хъа ачухъ гьавайихь гъябгъюрайи футболиз тамаши апIуз ккунидариз манигъ’вал гъабхьундар.
Футболианси, волейболианра талитар тешкил апIуз шулу. Эгер жигьиларин терефнаан теклифар аш, дурариз фикир тувуз гьарган гьязур вуча. Табасаран, Хив районарин ва Дагъустандин Огни шагьрин вакиларихьна илтIикIураза, уч духьну, гьадму теклифарра гьял апIурхьа.
Улихьнаси Табасаран райондиъ жигьиларин «Табасаран-2020» форум кIули гъубшнийи. Думу форум гьар йисан кIули гъабхувал аьдатнаъ абхъна. Форумдиз респуб-ликайин саки вари районарин жигьиларин тешкилатарин вакилар уч духьнайи. Дицисдар серенжемари жигьилариз айи мумкинвалар ачухъ апIуз кюмек тувра, ихь райондин адра за апIура, – ктибтнийи Марат Рягьимовди.
