Дагъустан Республикайиъ коронавирусдихъди аьлакьалу аьгьвалат йигълан-йигъаз хъанара гъизгъин шулайиб рябкъюрахьуз. Хьадан вазари сад йигъна йишван арайиъ 40-50 касдик уьзур кайивал тасдикь шулайиш, гъи, гьавйир мичIалди вуйи вахтна, саки 200-250 касдик коронавирусдин уьзур кайивал ашкар шула. Гьаму месэлайин гьякьнаан 2-пи декабриъ «Дагъустан» РИА-йиъ РД-йин сагъламвал уьбхбан министрин сарпи заместитель Татьяна Беляева, Роспотребнадзорин Дагъустандин управлениейин кIулиъ айирин заместитель Лариса Пантина ва отделин начальник Ирина Алжанбегова республикайин журналистарихъди гюрюшмиш гъахьну.
Журналистарихъди вуйи гюрюш ачмиш апIури, Лариса Пантинайи республикайиъ коронавирус уьзур тарарабгъбан бадали кьабул апIуз ккайи уьлчмйирикан ктибтну. Дугъан гафариинди, гьамусяаьтна региондиъ чвлин фаслихъди аьлакьалуди жара уьзрарра ачмиш духьнайивализ лигну, коронавирусдин уьзурра гьяракатниинди тарабгъура.
«Гизаф инсанар сатIиди уч шулайи йишвариъ ляхин апIбан вахт кьадар тяйин апIувалин ясана дицдар йишвар хъяркьбан месэла хъанара гъиитIибккна. Асас вуди му сяргьятар дивувал сумчрар апIурайи залариз, мистариз, килисйириз, базрариз, ресторандиз, кафйириз кайидар ву.
Улупнайи идарйирин жюрейик мектебар ва бицIидарин багъар кахьрадар. Фицики, образованияйин му идарйир учу сентябрин валзлиан мина гюзчиваликк гъитнача. Душвариъ Роспотребнадзори улупнайи вари тIалабар тамам апIура. Мектебариъ, бицIидарин багъариъ лазим вуйи къайдайиинди дизинфекция гъабхура.
Мидланра гъайри, пуз ккундузузки, РД-йин Главайин вазифйир вахтназ вуди тамам апIурайи Сергей Меликовдин Указдиинди 65 йистIан артухъ яшар духьнайи касар хулаъ гъузбан къайда хъанара 4-пи декабрилан 17-пи декабризкьан давам гъапIну», — гъапну Лариса Пантинайи
Серенжемдиъ иштирак гъахьи Татьяна Беляевайи къайд гъапIганси, республикайин сагъламвал уьбхбан министерствойиз гьар йигъан вари Дагъустандиъ коронавирусдиан иццру гъахьидарикан мялуматар гъюра.
«Гъийин йигъаз республикайиъ коронавирусдин уьзур сагъ апIру стационарариъ 3681 койкйир гьязур дапIна. Гьадрарикан гьамусяаьт азадди имбудар 731 койка ву. Янаки, гьар йигъан 250-тIан артухъ инсанар коронавирусдин уьзриан иццру шули, больницйириз гъюра.
Мисал вуди гъадабгъиш, гъубшу йигъанна йишвандин арайиъ 230 кас сагъ духьну, чпин хулариз гъушну, 101 кас больницайиз гъахну, 117 касдин коронавирусдин уьзур кайивал тасдикь гъапIну, хъа 9 кас гъийихну.
ЦIиб рягьти жюрейиинди, ясана кайиб аьгъю даршули уьзур кайидарин кьадар 1119 кас ву. Дурари амбулаторно чпи сагъ апIура», -гъапну министрин заместители.
Сюгьбат давам апIури, Т.Беляевайи мялум гъапIганси, коронавирусдихъди женг гъабхури, уьзур кайи аьзарлуйир сагъ апIбан ва дурариз лазим вуйи вари дармнар масу гъадагъбан бадали, Урусатдин Правительствойи федералин бюджетдиан ихь республикайиз 117 миллион манат жара дапIна. Гьаддикан гъийин йигъаз 115 миллион манатдин контракт дидикIна хъа 35 миллион манатдин дармнар республикайин шагьрар районариз дурукьна.
Му хяви уьзрихьан уьрхбан бадали, чарасуз вуди машниин маска алабхьну, кми-кмиди хилар жикIури, сар-сарин арайиъ 1,5-2 метрийин манзил ади дугъужвури ккунду. Гьаци варидари чпи уьрхюри гъахьиш, вари сагъра хьиди, инсанар йихидира дар, хъа уьзурра ихь арайиан дубгди.
