Дяви. Му гафну кIваз гъагъи тясир апIру. Думу гъеебхьну кIури, ихь кIваз аьзият шулайиган, дяви улариз рябкъюри, гьапIруш аьжуз духьнайи инсанарин юкIвар фици шуйкIан?!
Аьхиримжи йисари дюн’яйин жюрбежюр уьлкйириъ дявдин гьяракатар жанлу шула. 2011-пи йисан Сирия гьюкуматдиъра ватандаш’валин дяви ккебгънийи. Думу дявди гьюкуматдин шагьрар, гъулар жилихьди саб гъапIну, тахсир ктру хайлин инсанар, аьхюр-бицIир дарпиди, уьмрихъ мягьрум хьуз гъитну. Гизафдариз гаш’вал тувну, гизафдар багъри жиларилан гьергну гъягъюз гъитну.
2015-пи йисхъан мина Сирияйиъ гъягъюрайи женгариъ Урусатдира чан шил гъибтна. 2015-пи йисан 30-пи сентябриъ Урусатдин кьушмари сабпи ражари вуди Сирияйиъ вари йишвариан уч духьнайи боевикариина гьюжум гъапIну. Гьаддихъан мина ихь уьлкейин эскрар му гьюкумат уьбхюри душваъ гъузна.
Сирияйиъ гъахьи дявдин женгариъ эскервалин гъуллугънаъ айи хайлин ихь ватанагьлийирира иштирак’вал дапIна. Алеппо ва Дейр-эз-Зор шагьрар азад апIбан йивбариъ иштирак гъахьи ихь ватанагьли Гьясан Аьлиевди (тялукь далилариан дугъан ччвур гьюдюхнача) чаз гъяркъю гьядисйирикан учуз ктибтнийи.
Гьясан Аьлиевдихъди гъубху сюгьбатнаан мялум гъабхьиганси, 2018-пи ва 2019-пи йисари 300 касдикан ибарат вуйи аьхю батальондин дахилнаъди думу кьюб ражари Сирияйиз гьаъну — гьюкуматдин мяна айи важиблу гъурулушар ва объектар, жюрбежюр базйир уьрхбан бадали.
«Кьюбиб ражарира учу дина 4 вазлиз гьаънийи. Гьаму вахтнан арайиъ улариз дярябкъюб фукIа имдариз. Террористари зат инсаф дарапIди инсанариина гюлле уьлюбхюйи. Йивну гъийиху фукьан-вушра инсанарра хиларилан тина гъушнийиз. Фукьан ижми юкIв ашра, душваъ рякъру гьядисйири гизаф тясир апIуйи. Думу йигъар йиз зат кIваълан дурушур. Саб ражари, бедендин температура за дубхьну, цIиб кефсузди дахънайза. Хьадан йишв вуйи. Учу яшамиш шулайи палаткайикк маниди вуйиган, думу заълан цIибди ачмиш дапIнайча. Уларигъ нивкI гъябхьрайи вахтна саб сес гъабхьи. Лигуруш, сабцIибтIан манзил адарди, учлан тина пулеметдин гюллйир тIирхуз хъюгъю. Гьадмуган узу кефсузди айиваликанра кIваълан гьархну, яракьра гъадабгъну, вари эскрарихъди палаткайиан чIатинди утIурччвза. Хайлин вахтнан арайиъ террористарихъди гъабхьи женгнаъ узухъди хъайи баярин арайиъ, гюллийир куркIну, зийнар гъахьидарра айи, амма, бахтнаанси, думу зийнар гъагъидар дайи»,
– ктибтнийи Гь. Аьлиевди.
Йиз сюгьбатчийин гафариинди, думу кьюд йисандин арайиъ 8 вазлиъ дявдин гъати женгариъ иштирак гъахьну, гьятта минйир ккивнайи майднарилан тинара гъушну.
«Саб ражари учу уьбхюрайи объектдихьна гъягъюз рякъюъ учIвнийча. Му ражари, гьаз-вуш жара рякъюъди гъягъюз йикьрар гъапIнийча. Бахтсузвалиан, му рякъюъ террористари минйир ккивнади гъабхьну. Ич улихь мина дутIубкIну, хайлиндариз гъагъи зийнар гъахьнийи, гъийихдарра айи. Мициб ляхин яв уларихь гъабхьиган, жвувахъди хъайидариин гьаму жюрейин бедбахтвал улубкьиган, уву фукьан ижми хасиятнан жви вушра, жвувазра аьгъдарди уларилан нивгъар гъягъюру»,
– аьлава гъапIнийи эскри.
Гъи му кас, дявдин гьядисйирин ветеранси, Сирияйин дявдиъ иштирак гъахьи ветеранарин Союздин членра ву.
Гь. Аьлиевдин зиихъ дупнайи гафари тасдикь апIурайиганси, варитIан ужуб дявитIан варитIан харжи ислягьвал ужу ву. Дявди анжагъ бедбахтвал, дерд, хажалат, дарвалар хуру. Гьаддиз гъийин девриъ дюн’яйиъ яшамиш шулайи вари инсанариз лазим вуйиб анжагъ мясляаьт, ислягьвал, вари халкьарин арайиъ мюгькам дуствал ади яшамиш хьувал ву, ва ухькан гьарсари гьаму мурад-метлебарихъ хъуркьбак чахьан шлу пай киври ккунду.
Йиз макьала Билижи гъулаъ яшамиш шулайи ихь ватанагьли Мелейсат Мягьямедовайин дявдиз гьаърайи баяриз бахш гъапIу шиъриинди ккудубкIуз ккундудуз.
Аллагьди уьрхри
Бисми дапIну рякъюъ учIву,
Дади кьяллан хил алдатну,
Варидарин хил дибисну,
Гъушу бай Аллагьди уьрхри.
Кьяляхъинди илдицури,
За апIури хил, тIубччвури,
Гежехайир ибшри кIури,
Гъушу бай Аллагьди уьрхри.
Варидарлан ул илбицну,
Аьхю бабан гардан бисну,
Абайи насигьят тувну,
Гъушу бай Аллагьди уьрхри.
Гъарах, жан бай, армияйиз,
Ватан уьбхюз му ихь багъри.
Гьарсаб ляхин тамам апIуз
Гъушу бай Аллагьди уьрхри.
