Пул гъазанмиш апIуз варитIан рягьят ляхин артистаринуб ву, кIури шулу. Думу дюз фикир дар, фицики, мяълийирин ужуб устадвал айи артист хьпан бадали, хайлин зегьмет дизигну ккунду.
Ав, жвуваз сес адаршра, мукьмихъди дюзди мяъли апIуз аьгъдаршра, аьхиримжи вахтна сягьнайиина удучIвурайидарин кьадар кудухну ккудубкIуз шулдар. Гъи гьаз-вуш варидариз артистар хьуз ккун дубхьна, амма, артиствалин курсар дурхну, лазим вуйи саягъниинди думу ляхниин машгъул вуйидарин кьадар думукьан гизаф дар.
Гьамусяаьт ихь миллетдин артистарин кьадарра артухъ шула. Йиз фикриан, багъри чIалниинди мяъли апIувал – му чIал артмиш апIбак артистди киврайи пай ву.
Гъи йиз макьалайиъ артиствалин пишекар хьуз метлеб ади, гьамусяаьт РД-йин Мягьячгъалайин Г.Гьясановдин ччвурнахъ хъайи музыкайин училищейин 4-пи курснаъ урхурайи, тазади мяълийир апIуз хъюгърайи Залина Исмяиловайикан ктибтуз ккундузуз.
Залина Исмяилова Табасаран райондин Пилигъ гъул’ан ву. Дугъу багъри гъулаъ бицIидарин багъдиъ тербиячидира ляхин апIури гъахьну. Гьамусяаьт Каспийск шагьриъ яшамиш шула.
Му кас гьеле бицIидими мяълийир апIбиин машгъул духьнайир ву.
«Ич гъулаъ жюрбежюр шадлугънан мяракйир кми-кмиди шуйи. Узу 5-пи классдиъ урхурайи вахтнахъан мина, мектебдиъ тешкил апIурайи концертариъ ясана жара серенжемариъ иштирак шули, мяълийир апIури шуйза. Гъулан культурайин Хулан художествойин руководителра йиз эме вуйи. Фицдар серенжемар тешкил апIурушра, дугъу мяълийир апIуз гьаммишан узуз дих апIуйи. Гьамци мяълийир апIбан жилгъайиъ учIвунза. Райондин дережайин серенжемариъра, душваъ кIули гъябгъюри шлу КВН-диъра иштирак’вал апIуйза. Хъа мектеб ккудубкIган, йиз абйир-бабари узуз му рякъ давам апIуз ихтияр тувундайи. Хъа хайлин вахт улдубчIвбалан кIяляхъ, йизра яшар гъахьиган, дадайи ихтияр тувнийзуз»,
– кIура Залинайи.
Училищейик урхуз кучIвайиз, З.Исмяиловайи медицинайин ва деллегчивалин курсарра ккудукIну. Дугъу деллегчивалин ляхин апIури хайлин йисар ву. Ич сюгьбатнаъ Залинайи музыкайин училищейиз фици алдахънуш, мялум гъапIнийи.
«Узу Мягьячгъалайиъ дишагьлийирин саб салондиъ, кушарихъди ляхин апIури, лихурайир вуйза. ИкибаштIан, гьарган узухьна гъюру муштарира айзуз. Узу тазади мяълийир апIуз хъюгърайир вуйибдикан дугъаз хабар айи. Гьадмуган дугъу узуз музыкайин училищейик урхуз кучIвуз теклиф гъапIнийи. Дишлади рази духьну, узу дина гъушза. Магьа гъи узу 4-пи курснаъ дирижёрвалин пишекар хьуз урхураза. Урхуб ккудубкIбалан кьяляхъ, узуз музыкайин дарсар киврушра, мяълийир апIурушра, хориъ иштирак шулушра, жюрбежюр рякъяр ачухъ ву.
Учуз душваъ, ужур артист хьпан бадали, фици гьарсаб гам алдабгъуруш, фици эл хъадабгъну ккундуш, вари улупурачуз. Му ляхин рягьтиб ву кIури, хиял шулу, амма дидиъ алахьурайи читинваларикан рякъ давам апIурайидаризтIан хабар адар», – къайд гъапIну тазади мяълийир апIуз хъюгърайи шуру.
Тазади хъюгънайир вушра, гъи Залинайин хайлин мяълийирра удучIвна. Гьарсаб мяълийин гафариъ атIабгнайи мяна дугъан уьмрин гьядисйирихъди аьлакьалуб ву.
«Мяъли гьязур апIруган, сабпи нубатнаъди мукьам албагну, фицики мукьмихьна гафар ктагъуз рягьятди ву. Узуз гизафси мукьмар дикIурайи композиторар ихь ватанагьли Мюгьюряли Аьбдуллаев, Векил Аьгьмедханов ва авар халкьдин композитор Эмиль Гистаров ву. Гьацира ихь шаир Минара Гьяжиевайи, шиърарра дикIури, мукьамра гьязур апIури шулиз.
Хъа мукьмарихъна шиърар дикIрударикан улхуруш, сабпи ражну удубчIву «Ккунир» кIуру мяълийин гафар Шюшеханум Керимовайи, «Йиз веледар» – Фаиза Вердихановайи, «Ккилигураза яриз» ва урус чIалниинди вуйи «Посмотри на меня» мяълийин гафар Жамиля Гъафлановайи, «Багъдиъ лицураза», «Дюн’я вухьуз ширин» мяълийир Мафират Салигьовайи, «Швушван лампа», «Гьавай, жигьилар, гъудужвай мярака балгуз» ва «Йиз яр» мяълийирин гафар Минара Гьяжиевайи гъидикIдар вуйиз. Дурариз варидариз кIваантIан чухсагъул кIураза»,
– аьлава гъапIну Залинайи.
Залинаси юкIв хъади зегьмет зигурайи артистар ихь халкьдиз артухъ ишри.
