Гьар йисан аьхириъ чапдиан удучIвурайи газатариз ва журналариз подписка апIру вахт гъюру. Магьа ццира думу вахт улубкьна. Аьдат дубзьнайиганси, “Табасарандин нурар” газатдин подписка апIурайи касарихьна, газатдикан кьюб гаф пуб, газатдин машариъ чап гъапIубдикан асас вуди дурариз фу кIваинди гъубзнуш, дурар фицдар макьалйириз ккилигураш, газатди дурариз фициб хайир хураш ва жара суалариз жавабар тувуб ккун апIури, илтIикIнийча. Дурарикан сасдар касарин жавабар исихъ чап апIурача.
Раиса Шябанова, Хив райондин Гъвандикк гъул:
– “Табасарандин нурар” газат – му жямяаьтлугъдинна политикайин газат ву, ва гьамдиинди вари дупна. Дидин машариъ узуз лазим вуйиб вари бихъуразуз: табасаран халкьдин вакиларин уьмрикан, яшайишдикан, дурарин читин месэлйирикан ва хъуркьуваларикан, ватандашар машгъул духьнайи ляхнарикан ва гь.ж. Газатди жигьилариз ва дурарин читин месэлйир гьял апIбаз хайлин фикир тувра. Арабир газатдин машариан тазади ихь арайиз удучIвурайи жигьиларин шиърарихъдира таниш шулаза. Му ужуб ляхин ву. Узу хайлин йисари Гъвандикк гъулан библиотекайиъ гъилихунза. Совет вахтари газатариз ва журналариз подписка апIуз хайлин пул жара апIуйи. Гъулан хайлин агьалйир гьадму вахтари гьарсаб гъулаъ библиотекайиз, клубдиз, гимихъна уч шули, багъри гъулан месэлйирикан улхуйи, газатариъ чпи гъурху хабрарикан ктибтуйи. ИкибаштIан, гизафси улхуб багъри газатдикан шуйи. Бязидари редакцияйин кюмекниинди чпин читин месэлйирра гьял апIуйи. Ихь багъри халкьди чан сабвал улупиш, гьамусра гьаци хьибди. Ихь багъри газат уьбхюб – ихь метлеб ва буржи вуйихь.
Узу Урусатдиъ бабкан гъахьунзу ва табасаран миллетдин вакилра дайза. Амма йиз вари уьмур Гъвандикк гъулаъ гъубшнийиз. Узуз Гъвандикк гъул багъри гъабхьунзуз. Гьамушваъ йиз жилирин багахьлуйири, хъасин гъуландари узуз табасаран халкьдин аьдатар, чIал, дуланажагъ, халачичивал улупну. Ич сижар аба Шябан Ватандин Аьхю дявдин иштиракчи вуйи. Чан асас вахт дугъу газатар ва журналар урхбаз бахш апIуйи. ВаритIан гизафси думу “Табасарандин нурар” газатдиз ккилигуйи. Подписка апIру вахт гъафиган, газат подписка дапIнашра, “Табасарандин нурар” газат кIваълан магьарханай кIури, думу швнуб-сабан учухьна илтIикIуйи. Аба амдар, йиз жилир Нурмягьямедра рягьматдиз гъушну. Хъа узу, дурарин васият уьбхюри, гъулаъ гъузназа. Ва узуз багъри гъабхьи йиз халкьдин чIалниинди чапдиан удубчIвурайи газат гьар йисан подписка апIураза, ва гьамус, гьадму саб вахтна ич Шябан абаси, узура газатдиз килигури шулза. Багъри газатдин подпискайиз кюмек дарапIди фици гъузру? Багъри газат – багъри чIал, аьдатар, халкь, гъул, ватан гьисаб шула.
Мадина Ферзуллаева, Табасаран райондин НичIрас гъул:
– Узу гьякьлуди кIурза – “Табасарандин нурар” газатди дугъри мялуматар тувра. Гьаддиз узу думу подписка апIури 23-пи йис вуйиз. Газатдиъ лихурайи журналистар чпин ляхин аьгъю, гъудуркьу пишекрар ву. Дурари варибдикан ачухъди ва гьякьлуди бикIура, ихь уьмриъ шулайи гьядисйирикан газатдин машариъ дугъри мялуматар тувра. Саспиган газатдин машариъ узуз таниш вуйи инсанар рякъюрзуз, думуган лапра рази шулза. Гьацира тарихдихъди ва гъулан мяишатдихъди аьлакьалу макьалйир кьабулди вузуз. Гьар йисан эвелин нумрариъ газатдиъ ухнарин календарь чап апIури шуйи. Му аьдат редакцияйи гележегдиъра уьбхюр кIури, миж кайиз. Му газат йиз хизандин газат гъабхьну. Редакцияйин журналистариз чухсагъул.
Загьидат Асланова, Табасаран райондин ХустIил гъул:
– Узуз “Табасарандин нурар” газат ккундузуз. Дидин коллективра кьабулди вузуз. Асас вуди газатдин кIулин редактор Гюлягьмад Маллялиевдин, журналистар – Зубайдат Шябановайин, Гюльнара Мягьямедовайин, Наргиз Гюлечовайин, Феруза Рамалдановайин макьалйир кьабулди вузуз. Газатдиъ туврайи макьалйирин мяналували думу урхуз маракьлувал артухъ апIуру. Газатдин гьарсаб нумрайиъ хайлин цирклариан, гьадму гьисабнаан нумуналу инсанарин уьмрариканра макьалйир чап дапIну шулу. Узу ихь газатдиъ табасаран чIалниинди кроссвордар туврайивалиин лап рази вуза. Хъа Аьжалсуз полкнакан вая Ватандин Аьхю дявдин женгариъ ихь Ватан, ихь гележег уьбхюри гъийиху ихь ватандашарикан вуйи макьалйир улариина нивгъ дарфиди урхуз шулдар. «Табасарандин нурар» газатди багъри халкьдин чIал, тарих уьрхюра, игит ватандашар вари халкьдин арайиз адагъура, районариъ, республикайиъ гъягъюрайи гьядисйирихъди ухьу таниш апIура. Му газат гьарсар касди подписка апIувал – жвуван хизандин савкьат уьбхюрайи гьисаб ву. Узуз “Табасарандин нурар” варитIан багъри газат вузуз.
Сефият Абачева, Дагъустандин Огни шагьур:
– Инсанари “Табасарандин нурар” газатдикан жюрбежюр жюрейиинди чпин фикрар ачухъ апIуб мумкин ву, хъа узу гьамци пидиза – газат кьабулди вузуз. Дидиъ ужудар макьалйир чап апIуру, ихь районариан жюрбежюр важиблу мялуматарра ади шулу. Мидланра гъайри, ЖКХ-йин, пенсйирихъди, коронавирус тарабгъбахъди аьлакьалу ва гьацира жара лазим вуйи хабрар туври шулу. Арабир газат учухьна вахтниинди рубкьудар, хъа думу редакцияйин вакиларин тахсир дарувалинра гъавриъ ача. Газатдин журналистар республикайин жюрбежюр конкурсариъ иштирак гъахьиваликан ва заан йишвар гъадагъуваликанра гъеебхьунчуз. Гьадму саб вахтна, дугъриданра, терроризмдихъди аьлакьалу вуди газатдиъ лап ужудар, маракьлу, урхуз аьшкь гъюру макьалйир чап апIури гъахьнийи. Йиз фикриан, гьадму рубрикайиан хъанара макьалйир чап апIувал давам гъапIнийиш, харжи даршлийи. Хъа газат подписка апIувал ич хизандин аьдат вуйич.
Бес Уьмарова, Мягьячгъала шагьур:
– Йиз яш 80 йисахьна багахь шулайиз. Дурарикан, Мягьячгъалайиъ яшамиш шули, 50 йис гъубшнийиз. Йиз уьмрин аьхюну пай вахтна студентарин поликлиникайиъ медсестради лихури гъахьунза. Гьадму саб вахтна Мягьячгъала шагьриъ яшамиш шулайи вари табасаранар чиб-чпихъди таниш вуйи, вари сар-сарин хайир-шейирназ, саламдиз уч шуйи. Багъри гъулаъ салам гъабхьиш, хъайи ляхин дипну, шагьриъ яшамиш шулайи гъуландар, мирасар сатIиди хабрихъна рукьуйи. Думу вахтнан учуз багахьди таниш вуйи ватандашар гъи сар-кьюрра имдар. Узу хул’ан гьеле-меле удучIвури шулдарза. Амма багъри райондиъ шулайи гьядисйирихъди, ужудар хабрарихъди “Табасарандин нурар” газатдин машариан таниш шулаза. Улариз бегьемди рябкъюри амдариз, гьаддиз узуз кьабулди вуйи макьалйир йиз худли урхури шулзуз. Гьаци, дугъан бабан чIалнаан вуйи аьгъюваларра гужал гъахьну. Йиз багъри чIалниинди вуйи газат узуз гьарсаб табасаран хизандиз гъюри ккундийзуз. Диди ихь чIал, аьдатар, культура, тарих уьрхюра ва артмиш апIура, ихь арайиъ имдру, ватан уьбхбак лайикьлу пай киву ватандашар ва гъи гъул, район адлу апIурайи жигьил игитар вари халкьдиз улупура, ихь халкь сатIи ва кьувватлу хьуз гъитра. Жвуван миллетдин сурат вуйи, ихь абйир-бабари гьар йисан подписка апIури, ядигарси гъюбхю газат гьамусдин жигьилари заиф хьуз гъитидар кIури, фикир апIураза. Газат – ихь халкьдин тарих, гьамусдин девир ва гележег ву. Газатдин вакилари чпихьна илтIикIу фунур касдин месэла гьял апIбазра аьхю фикир тувра. Гьадму саб вахтна узузра газатдикан кюмек гъибихънийзуз. Яшамиш йибхь, йиз газат, гъит яв ужудар хабрар гьарсар табасаран вакилихьна рукьри. Узу яшамиш шули амиди увуз подписка апIури, уву уьбхбак йиз пай киври гъуздиза.
