8-пи декабриъ Табасаран райондин администрацияйин конференцйир гъахру залиъ РД-йин экономикайинна аьтрафарин артмиш’валин министерствойина Табасаран райондин администрацияйи ва «Урусатдин даягъ» тешкилатдин Дагъустандиъ айи отделениейи тешкил дапIнайи «Дагълу аьт-рафар артмиш апIувал. Туризм ва халкьдин сяняаьткарвал» темайиан сессия кIули гъубшну. Думу видеоконференцияйин къайдайиинди (ВКС) тешкил дапIнайи.
Совещаниейиъ Табаса-ран райондин глава Мягьямед Къурбанов, РД-йин экономикайинна аьтрафарин артмиш’валин министрин сарпи заместитель Светлана Аьбдулкьадирова, «Урусатдин даягъ» ДРО-йин председатель Зульгьимар ТIагьибова (Ричинская) ва жара касар иштирак гъахьнайи.
Му жюрейиинди серенжем гъабхбан асас метлеб – республикайин дагълу районариъ, гьадму гьисабнаан Табасаран райондиъра, дилаварчйирина гьякимари сатIиди ляхин апIури, туризм, халкьдин сяняаьткарвал ва гьясиллувал артмиш апIувал вуйи.
Серенжем ачмиш апIури, райондин глава Мягьямед Къурбановди райондин экономикайинна яшайишдин артмиш’валикан ктибну, ва гьамусяаьт райондиъ туризм артмиш апIбаз лазим вуйи вари шартIар айиваликан мялум гъапIну.
«Райондин туризмдин объектариз асас вуди гьубкIну адруб – инфраструктура ву. Мисал вуди гъадабгъиш, райондиъ айи Ургур чву-ччвунна сар чуччун гъала рас гъапIхъан мина, дина гъюрайи туристарин кьадар лап артухъ гъабхьну. Му терефназди туристарин маракьлувал айиб учузра рябкъюрачуз. Гьамдихъди сабси, региондин экономикайинна аьтрафарин артмиш’валин министерствойизра чухсагъул пуз ккундузуз. Фицики, гьадму минис-терствойин кюмекниинди учу, «Ерли жягьтлувалар» проектдиъ иштирак духьну, райондин хайлин объектариъ расвалин ляхнар гъапIунча ва гьамусдихъан тина туризмдин объектарра рас апIуз планламиш дапIнача»,
– гъапну Мягьямед Къурбановди.
Светлана Аьбдулкьадировайи «РД-йин дагълу терефарин яшайишдинна экономикайин артмиш’вал» госпрограммайикан ва думу программайиъ дилаварчи касар иштирак хьуваликан хъайи-хъайиганси ктибтну.
«Урусатдин даягъ» ДРО-йин кIулиъ айи Зульгьимар ТIагьибовайи дагълу терефар ва жюрбежюр жара цирк-лар артмиш апIбан сабпи ахтармиш’валин проект Табасаран райондиъ тешкил апIбан месела гъитIибккну, ва думу месэла варидиз кьабул гъабхьну.
Дагълу терефарин арт-миш’вализна туризмдиз ва халкьдин сяняаьткарвализ бахш дапIнайи совещаниейиъ ВКС-дин къайдайиинди Дагъустандин дилаварчйиринна промышленникарин союздин регьбер, РД-йин Халкьдин Собраниейин депутат Сефер Аьлиевдира гьял апIурайи месэлйирин гьякьнаан чан лигбар ачухъ гъапIну.
Дугъан гафариинди, гъуларин аьтрафар артмиш апIбахъди сабси, бюджетдин дакьатар муниципалитетарин арайиъ пай апIбан, дилаварчйириз жилин участокар тувбан ва душвариъ тешкилатар дивбан къайдйир асант апIбан месэлйир гьял апIувалра важиблу ву.
Гьацира серенжемдиъ иштирак гъахьи РД-йин Халкьдин Собраниейиз дахил шулайи жигьиларин парламентдин депутат, улихьси «Табасаран халачйир – халкьдин дамагъ» проект гьязур дапIну, грант гъадабгъу Физули Сефербеговди «Табасаран райондин халкьдин сяняаьткарвалин артмиш’вал» ччвур тувнайи доклад гъурхну.
«Ихь абйир-бабар гьякьлу художникар вуди гъахьну. Дурари чпи гьясил апIурайи фициб вушра шейъ, лап кIваантIан гьязур апIури гъахьну. Хъа гъи ухьу дурарин кесп кIваълан гьархрахьа. Гьаци дархьбан бадали, янаки абйирин сяняаьткарвал давам хьбан бадали, гъи ухьу думу сяняаьткарвал ва культура дюрхну ккунду.
Гьарсаб вахтна ихь халкьдин сяняаьткарвалси гьисаб апIури, гъийин йигъазра ихь арайиъ гъубзнайидар – халачичивал, гакIвликан, гъвандикан, ругдикан шей’ар ктаувал ву. Гьамус думу сяняаьтарра яваш-явашди дургра. Гьаму сяняаьткарвалин ляхнар гъи ухьу дюрюрхиш, закур ихь наслари ухьу тахсиркрар апIиди», — гъапну Физули Сефербеговди.
Совещаниейин аьхириъ Мягьямед Къурбановди региондин экономикайинна аьтрафарин артмиш’валин, туризмдин министерствйирина табасаран районди сатIиди 2021-2023-пи йисариз райондиъ туризм артмиш апIан план гьаму йисан аьхириз гьязур апIуз теклиф гъапIну.
