«Жара кас масу тувайиз, йикIувал ктабгъурза…»
Игит фуж ву? Му жигьатнаан улхбар гизаф шулу ва гьарсарин фикрарра жюрбежюрдар ву.
Гьарсар инсандиз чан хусуси «игит» а. Сарин фагьмиъ игитар анжагъ дявдин майднариъ дирбаш’вал улупну, аьжа-лин улихь уьмрин читин рякъяр баркаллуди ккадау, жара инсанар цIигъян гъядягъну, аьжалихьан гъюрхю вакилар ву. Хъа тмунуриз, аьксина, игитси, шюхъраз вушра кюмек дапIну, уьмриъ ужувлан шил гъибту кас рякъюру. Гъийин деврин насларин лигбариан игит фуж ву? КьатI’иди кIурза, узуз игит, я жямяаьтлугъ машгьурвалихъ, я хусуси гъазанждихъ хътрергди, уж’вал, гьякь’вал бадали марцци кIваан гьунарар улупу дирбаш кас вузуз.
Игитарикан улхури, йиз фагьум сикин дарди Хив райондин кIулин мешебегийин гъардаш, Кьурагь райондин Икра гъулан агьали Зейнудин Батмановдикан вуйи фикрари ккапIра. Фицики дугъу улупу гьунар аьсрариз даимлугъ ву: дирбаш’валси, ватанпервервалси, гьякьлувалси.
Зейнудин Батмановди улупу гьунарнакан аьхиримжи йисари сикин дарди улхури гъахьнийи, гьаддиз, йиз фикриан, дугъан ччвур таниш дарурра вари Дагъустандиъ дарш, кьибла районариъ адаршул. Фицики, къанунсузди яракьламиш духьнайи террористарин йисирвалиан жигьил хизан азад апIбан рякъюъ игитвал улупну, думу учв уьмрихъ мягьрум гъахьиваликан гъира инсанарин сагъу гъатар гъизгъинди улхури ими.
КIваина хурхьа, 2015-пи йисан 15-пи майиъ Зейнудин Батманов, аьдат вуйиганси, чав гъуллугъ апIурайи аьтрафариин чпи тазади кивнайи гъелемарин гьякьикьат ахтармиш апIуз гъягъюру. Амма саб вахтна дугъаз таза бицIирин ишбан гьарай ебхьуру. Сеснахъди мешебеги бицIириз кюмекназ гъягъюру. Натижайиъ думу йирхьур къанунсузди яракьламиш духьнайи касарикан ибарат вуйи дестейин терефкрари таза бицIирра хьади жигьил жилирна хпир йисирвализ дидиснайивалин шагьид шулу.
Гьякьикьатдин гъагъишин аннамиш дапIну, Зейнудин дурариз багахь шулу, жигьил хизан деетну, дурарин ерина йисирди учв дисуб тIалаб апIуру. Гъачгъари дугъан теклиф кьабул апIуру. Жигьилари чпин багъри Ругуж гъулаз рякъ давам гъапIну, хъа Зейнудиндин кьисмат фициб шулуш, гьелелиг мялум дайи.
Террористари Зейнудиндиз, думу чпин тIалабариз мютIюгъ апIбан бадали, райондин ОМВД-йин начальникдиз дина дих апIуз мажбур апIури, аьзабар тувру, амма дирбаш ватанпервери аьхиризкьан жилирвал ва намус гъюбх- ну. «Жара кас масу тувайиз, узу йикIувал ктабгъурза…», – мялум гъапIну дугъу чав йисирвализ гъадагънайидариз. Му келима Зейнудин Батмановдин аьхиримжи гафар гъахьну. Думу, террорис-тари гюлле йивну, 48 йисан яшнаъди уьмриан гъушну.
Аьлава апIурза. Му улупбар дугъаз гьюжум гъапIу террористарикан санур дисбан натижайиъ кьяляхъна мялум гъахьну.
Дирбаш кьягьяликан вуйи фик-рар наслариз гьаргандиз нумуна вуди гъузди.
Шаксуз, жара кас бадали тялукь саягъ игитси уьмриан гъягъюз шлихьан вушра удукьруб дар. Зейнудин Батмановди Дагъустан дирбаш кьягьяларин республика вуйиб нубатнан ражари субут гъапIну. Жямяаьтлугъ илтIикIбан натижайиъ дугъан игитвал йикIбан кьяляхъ заан дережайиъди лишанлу гъапIну. Зейнудин Батмановдиз Урусатдин Президент В.В.Путиндин Указдиинди «Ватандаш’валин буржи тамам апIбаъ игитвал ва жилирвал улупбаз лигну» Урусатдин Игит кIуру ччувур тувну.
