Фунуб ляхниъра хъуркьувалар гъазанмиш апIбан рякъюъ, шаксуз, саб гьялкьан шартIарра чарасуз лазим ву. Йишвариин милли культура уьбхбакан гъапиш, Хив райондин Лика гъулаъ халкьдин му багьалу ирс уьбхювал агьалйирин рюгьнан кьувватлувалин натижа гъабхьну гъапиш, узу кучIал даршул. Фицики душваъ му рякъ’ан саб жюрейинра шартIар имдарди хайлин йисар вуйи. Гъулаъ клуб имийи, амма думу лап йирси дубхьну, инсанар бегьемди учIвузкьан даршлу гьялназ дуфнайи.
Улупнайи рякъ’ан гъулаъ игьтияж айиваликан фикир дапIну, 2020-пи йисан Хив райондин ерли кьувватариинди СДК дибдиан рас апIбан жавабдарвал райондин гьюкмин кIулиъ айидари чпиина гъадабгънийи. Натижйирин ухьу шагьидар вухьа: ЦIийи йисан гъаншариъ гъулаъ клуб ачмиш апIбан шадлугъар къайд гъапIну.
– Милли ирс уьбхбан ва думу артмиш апIбан бадали, вари Урусатдиъси, Хив райондиъра натижалу уьлчмйир кьабул апIура. Гьаци, райондин гьюкмин кIулиъ айидари культурайин цIийи ужагъар дивбаз, айидар дибдиан рас апIбаз жикъи муддатнаъ аьхю фикир тувна.
Улупнайи ляхнар гележегдиъра давам апIуз зегьмет зигидихьа.
Гъулаъ деврин тIалабариз тялукь шартIар хьували гъулан агьалйирин, асас вуди жигьиларин, артмиш’вализ вари рякъяр ачухъ апIура. Гъит му гьяракатар, ухьу гъи ачмиш гъапIу культурайин хал гъуландариз, райондиз, вари Урусатдиз мянфяаьтлудар ишри! Гъит улубкьурайи ЦIийи йис ухьуз варидариз рягьимлуб ва хайирлуб ибшри!» – гъапну мяракайиин гъулху Хив райондин глава Ярмет Ярметовди.
Уч духьнайидар тебрик апIури, серенжемдиъ гьацира Хив райондин культурайин отделин кIулиъ айи Казбек Къазиевра удучIвну гъулхнийи. Дугъу чпи гележегдиъра Лик’арин жямяаьтдиз му жигьатнаан лазим вуйи кюмек тувбаз гьязур вуйивал субут гъапIну.
Гъуландарин терефнаан мяракайиин удучIвну гъулху агъсакъал Садикь Мягьямедовди чпин гъуландариз тялукь шадвал багъиш апIбаз райондин главайиз ва му ляхник пай киву гьарсар касдиз чухсагъул мялум гъапIну.
УдучIвну улхбарин кьяляхъ, улупнайи гюрчег дарамат дибдиан рас апIбаъ ужуб ляхин улупу тикилишчйир Хив райондин администрацияйин терефнаан чухсагъул мялум апIбиинди ва кьиматлу пешкешар тувбиинди лишанлу гъапIну.
