Декабрин аьхириъ Мягьячгъала шагьриъ РД-йин транспортдинна рякъярин мяишатдин министерствойин, Урусатдин МВД-йин госинспекцияйин ва «ХатIасузвалин гьяракат» экспертарин центрин жягьтлувалиинди рякъриъ шулайи аварйирин, бицIидарин иштирак’валиинди арайиз гъюрайи хатIалу дюшюшарин профилактика апIбан центр ачмиш гъапIну.
Къайд дапIну ккундуки, ачмиш гъапIу центриъ гьамусдихъан тина 5 йислан 17 йис’ина яшар айи бицIидариз рякъяриъ ва машинариъди ва яягъди хатIасузвалиинди гъягъбан къайдйирикан мялуматар тувди.
Аку диркьи рангнан, «ХатIасузвалин лабаратория» дибикIнайи , лазим вуйи вари алатарихъди тямин дапIнайи, бицIидариз рякъюъди гъягъбан къайдйирикан мялуматар тувуз тренерар айи бицIи автобусар республикайин ярхла гъулариз гъягъюзра мумкинвал айидар ву.
БицIидарин иштирак’валиинди хатIалу дюшюшар шулайивалин профилактика гъабхбан центр ачмиш апIбахъди аьлакьалу вуйи серенжемдиз дуфнайи РД-йин транспортдинна рякъярин мяишатдин министерствойин управлениейин начальник Кьасум Мягьямедовдин къайд гъапIганси, рякъяриин шлу хатIалу дюшюшарин гьякьнаан ухьу бицIидариз лап бицIидимиди улупну, кидибтну ккунду.
«Пуз ккундузузки, ихь гъюрайи насларин гъиллигънан культура уьбхбан бадали, лазим вуйи вари шартIар тешкил дапIну ккунду. Гьаддиз учу МВД-йихъди сатIиди бицIидариз рякъярин гьякьнаан мялуматар тувру гьаму центр ачмиш апIбан, проект уьмриз кечирмиш апIуз чалишмиш гъахьунча. Дагъустан дагълу регион вуйивализ лигну, гьаму йисан образованиейинна илимдин министерствойихъди йикьрар дапIну, муниципалитетарин мектебариъ урхурайидариз хатIасузвалин гьяракатнакан мялуматар тувуз гъягъбан серенжемарра планламиш дапIнача», — гъапну Кьасум Мягьямедовди.
Къайд дапIну ккундуки, 2018-пи йисхъан мина гъийин йигъаз Урусатдиъ му жюрейин 60 центр ачмиш дапIна. Гьадрарин гьисабнаан РД-йин образованиейинна илимдин министервойин кюмекниинди ноябрин вазлиъ Дагъустандиъра гьамциб центр ачмиш гъапIну, гьамус ачмиш гъапIуб – му сарун кьюбпи центр ву. 2021-пи йисан Урусатдин регионариъ 25 центр, хъа 2023-пи йисаз республикайин гьарсаб терефназди гьамцдар хъанара шубубсан центр ачмиш апIиди. Гьадмуган рякъяриин шлу хатIалу дюшюшарин кьадар цIиб, хъа ва къайдйир дюрхну ккуниваликан мялуматар туврайи, мектебериъ урхурайи баяр-шубарин кьадар артухъ хьибди.
