Инсаниятдиз муганайиз мялум дару цIийи коронавирусдин уьзур арайиз гъюбан натижайиъ уьлкейин аьгьвалат гъизгъин дубхьну, багарихьди сад йис тамам шула. Улупнайи муддатнаъ инсанарин аьдати уьмур дибдиан дигиш гъабхьну: уьзри фукьандар багъри касарихъ мягьрум гъапIну, фукьандарин яшайишдин ери гьаргандиз дигиш гъапIну.

 

Коронавирус уьзрихъди йишвариин арайиз дуфнайи аьгьвалатнакан улхури, Хив ЦРБ-йин кIулин духтрин заместитель Наида Пашаевайи гьякьикьатдиин гьелелиг рази хьуз даршулайивал субут гъапIнийи.

– Улубкьнайи йисан январин 15-пи йигълан башламиш дапIну, учу, ЦРБ-йин бицIидар хру отделениейин бинайиинди ачмиш дапIнайи, коронавирус уьзур кубчIвдар кьабул апIури гъахьи «уьру зона» хъябкьну, аьдат вуйиси бицIидар хру отделение ачмиш апIуз мажбур гьахьунча. Тялукь къарар республикайин минздравдиъ адабгъуб ву, кьатI’и себебарра мялум дарчуз.

Шаксуз, му уьзур имдар кIурайи гаф дар: аьзарлуйир хайлин а, амма учу дурар, уьзрин гъагъишназ дилигну, Мягьячгъала, Дербент шагьрарин ва СтIал Сулейман райондин больницйириз гъахуз мажбур шулача. Му уьзур пучIуди ахмиш шулайи ватандашарин аьгьвалат йишвариин дурариз гъуллугъ апIурайи духтрари гюзчиваликк уьбхиди, ва дурари сагъламвал хулариъ мюгькам апIиди.

Уьзур гъагъи дережайиъди ахмиш шулайи Хив райондин 5 ватандашди Мягьячгъайиъ, 1 касди Дербентдин ЦГБ-йиъ улупнайи вахтна сагъламвал мюгькам апIура.

Дарпиди гъитуз шулдарзухьан: гьяйифки, гьелелиг хайлин ихь ватандашари уьзрин гъагъишин аннамиш дапIнадар. Аьзарлу гъахьир вахтниинди духтрихьна кюмекназ илтIикIбаъ аьхю мяна а: вахтниинди кьабул гъапIу уьлчмйири уьзур кьяляхъ хътабкбаъ аьхю роль уйнамиш апIуру. Хъа арайиз дуфнайи аьгьвалатнаъ уьзур гъагъи гьялназ илтIибкIу кас лазим йишвахьна рукьубра гъагъиди алабхъура, фицики аьхиримжи вахтари сагъламвалин карханйириъ дахъру йишвар гьуркIрадар, – гъапну дугъу.

– Наида Сяидялиевна, аьхиримжи вахтна коронавирус уьзриз аькси серенжемар кьабул апIури, Урусатдиъ, гьадму гьисабнаан ихь республикайиъра, агьалйириз вакцинайин рубар йивуз хъюгъна. Му жигьатнаан Хив райондиъ фицдар серенжемар гъахурачва?

– Фунуб уьзрихьанра уьрхбан рякъюъ вакцинация гъабхувал гьарган кьувватнаъ айиб ву. Вахтниинди рубар йивбан натижайиъ улихьдин вахтари гъулар, хулар ккидирчу кIамкIар, битIар ва хайлин жара уьзрар кам апIру мумкинвал гъабхьну.

Гьаци, коронавирус уьзрихьан уьрхбан метлебниинди рубар йивубра лазим ву. Гьелбетда, мушваъ руб йивайиз улихьна сагъламвал ахтармиш апIубра чарасуз лазим ву.

Гьелелиг Хив райондиз думу дарман дубхнадар. Хъа РД-йин минздравдиан райондиз вакцина жара гъапIиган, сифте вуди аьзарлу хьуз хатIа айи вакилариз рубар йивиди. Руб йивайиз улихьна вуйи уьлчмйир кьабул апIувал, текрар шулза, чарасуз лазим ву.

Ав, сагъламвал гьарсар касдин варитIан багьалу савкьат ва девлет ву. Хъа гьякьикьатдиъ алахьурайи дюшюшари субут апIурайиганси, думу уьбхювал ухькан гьарсарикан асиллура шула. COVID-19 уьзриз аьксиди республикайин аьтрафариин кьабул дапIнайи ижмишнан гьяракатар, хиял апIин, хайлиндариз кайидар дар. 65 йислан зиина яшнаъ айи, саб жерге гъагъи уьзрар кайи ватандашариз, хулариъ гъузну, чпи уьрхювал къанундиинди улупна, амма…Жавабдар гъуллугъарин имбу тIалабарра гьаци «ибак дарапIди» гъузрайи дюшюшар хайлин а. Дарш дагълу уьлкейин ижми рюгьнан жямяаьтлугъ му уьзрихьнара вердиш гъахьнийкIан?!