Республикайин мектебариъ бабан чIалар киврайи мялимарин арайиъ “Бабан чIалариз кьюбпи нефес” кIуру конкурс гьар йисан гъабхувал аьдатнаъ абхъну, швнуд-сад йис шула. Дидин тешкилатчйир РД-йин образованиейин ва илимдин министерство, Дагъустандин образованиейин артмиш’валин институт ва Аь.Аь. Тахо-Годийин ччвурнахъ хъайи Дагъустандин илимдинна ахтармишарин институт ву.
Уьлкейиъ коронавирусдихъди аьлакьалуди арайиз дуфнайи аьгьвалатназ дилигди, му конкурс улубкьу йисанра гьяракатнаъ ипну. Гъубшу йисан аьхириъ дидин муниципалин этапдин натижйир ашкар гъахьну. Конкурс республикайин районарин ва шагьрарин мектебариъ бабан чIалар кивру мялимарин арайиъ кIули гъабхура. Конкурсдиъ иштирак гъахьи, Дагъустандин Огни шагьрин 2-пи нумрайин мектебдиъ табасаран чIал ва литература киврайи мялим Гюлишан Мусаевайин (шиклиъ) ляхниз жюрийи варитIан заан кьимат тувну. Дугъан ляхин РД-йин образованиейин министерствойиз республикайин этапдиз хъадапIна.
“Конкурс Дагъустандин Огни шагьрин вари мектебариъ милли чIалар кивру мялимарин арайиъ кIули гъубхнийи. Мялимари чпиз улупу тема-йиан видеоролик гьязур дапIну ккундийи. Узу ва йиз ученикари сатIиди ихь чIалназ бахш дапIнайи текстар, макьалйир гьязур апIуз хъюгъюнча. Вушра, саб фициб-вушра жарабдикан, цIийи кIалибнан проектдикан фикрар апIурайча. Гьаци, учу Дагъ.Огни шагьрин заан гъуллугъариъ лихурайи ихь ватандашарихьна, аьдати инсанарихьна, пенсионерарихьна, мялимарихьна, бабан чIалнан гьякьнаан чпин фикрар ачухъ апIувал ккун апIури, дурариз бабан чIал фу вуш, думу дудрубгбан ва артмиш апIбан бадали гьапIну ккундуш, суалар хьади илтIикIуз хъюгъюнча. Дюзди гъапиш, думу конкурсдин асас метлебра – аргъаж шулайи наслин бабан чIалнахьна вуйи ккунивалин гьиссар уягъ апIувал, милли аьдатар уьрхювал ва артмиш апIувал, “бабан чIалнан мялим” пишейин ад за апIувал, кюгьне культурайин цирклин бинайиинди бабан чIалар кивбан бажаранлу тажруба яркьу апIувал ву. Учу мюгьтал гъапIуб гьадму вуйики, учу чпихьна илтIикIу гьарсар ихь ватанагьлийи аьхю аьшкьниинди бабан чIал апIурайи, дурари багъри чIал сифтена-сифте хизандиъ, багъри гъулаъ дюбхну ккуниваликан кIури гъахьну. Хайлин ватандашариз кюгьне аьдатариканра бегьемди аьгъювалар айи. Саки варидариз бабан чIал зяиф, аьдатарихьан ярхла шулайиваликан гъалабулугъвал кайи. Йиз фикирра гьаци вуйиз. Ялгъуз мектебдиъ дарсар кивра кIури, чIал аьгъю шлуб дар. ЧIал чIиви гъурулушдик гьисаб ву. Думура гьюдюхюру, цIийи гафар, гафнан ибарйир, къайдйир арайиз гъюру. ЧIалнан зиин лихурайи аьлимар а. Хъа багъри халкьди чан чIал дюрюбхиш, думу артмиш апIуз шлу кьувват хьибдар”,
– гъапну Гюлишан Мусаевайи.
Дугъу проектдин ляхниъ чаз кюмек гъапIу мектебдин завуч Оксана Рахманиновайиз ва гьацира бабан чIаларин методикайин цирклин кIулиъ айи Гюльнара Аьлиевайиз, бабан чIалар кивру мялим Ширин Гьяжимурадовайиз чухсагъул мялум гъапIну.
Гьамусяаьт Гюлишан чан ученикарихъди сатIиди Дагъустандин 100 йис хьпан юбилейиз бахш дапIнайи конкурсдин проектариин лихура. Дугъаз республикайин этапдиъра заан хъуркьувалар ккун апIурхьа.
