18-19-пи январиъ Табасаран райондиъ Ягъдигъарин сабпи нумрайин кьялан мектебдиъ «2021-пи йисандин Дагъустандин мялим» кIуру конкурс кIули гъубшну. Му конкурс, райондиъ айи мялимарин арайиан Гъяякент райондиъ кIули гъябгъру зонайин конкурсдиз гъалибчйир гъядябгъбан бадали, тешкил дапIнайиб вуйи.

 

Конкурсдиъ иштирак хьпан бадали, 49 мектебдиан 49 касди аьрзйир тувнийи. Хъа конкурсдиъ Табасаран райондин гимназияйиан, Хянгъярин, Хючнаарин кьюбпи нумрайин, Ягъдигъарин кьюбпи нумрайин, ЧвултIарин, Хюрккарин, ХустIларин, Хили-Пенжигьарин, Курккарин, Турфарин, Кьюрккарин, Халгъарин, ЦIийи-Лижв’арин, ТинтIарин, Мягьрягъярин сабпи нумрайин, Пилгъарин, АхьтIарин, Гьесхъарин, Улза-рин, Мягьрягъярин кьюбпи нумрайин кьялан мектебариан ва Гискарин ООШ-диан 21 кас иштирак гъахьну.

Конкурс кьюб пайнакан ибарат вуйи. Сабпи пай «Методикайин семинар»-педагогвалин кархана, кьюбпи пай – дарсар гъахувал вуйи.

Конкурсдиъ сабпи йишв Хючнаарин кьюбпи нумрайин кьялан мектебдин мялим Мягьмудова Динара Аьбдулмежидовнайи гъадабгъну.

Кьюбпи йишв Хючнаарин сабпи нумрайин гизаф гъуллугъар гьуркIну лицейин мялим Къулиева Севиль Аьбдулкеримовнайи гъазанмиш гъапIну.

Шубубпи йишван сагьиб Гьесхъарин кьялан мектебдин мялим Рамазанов Малик Ильясович гъахьну.

Конкурсдиъ улупу натижйириз лигну, гьацира жюрийин протоколиинди, «2021-пи йисандин Дагъустандин мялим» кIуру, Гъяякент райондин ЦIийи Викри гъулан кьялан мектебдиъ кIули гъябгъру зонайин конкурсдиъ иштирак’вал апIуз Гьесхъарин кьялан мектебдиъ математикайин дарсар киврайи мялим Рамазанов Малик Ильясович улупнийи.

Гъалибчйирин шубриддинра кандидатурйир Табасаран райондин главайин грантар тувбан бадали улупна.