Хив райондин малдарари кьюрд фици кечирмиш апIурайкIан?
Январин ваз… Кьюрд кьувватнаъ а. Улупнайи фасил пуч’валар адарди кечирмиш апIбан бадали, шаксуз, малдарар вахтназ улихьна гьязур хьпаъ аьхю мяна а.
Гьадму метлебнахъ хъуркьбан бадали, гъулан мяишатарин мал-къара кьюрд адапIуз галариз кючмиш апIувал аьдати ляхин дубхьна. Му жигьатнаан Хив райондиъра саки гьар йисан саб жерге серенжемар кIули гъахура.
Ццира, мал-къарайи кьюрд пуч’валар адарди кечирмиш апIбан бадали, райондин саб жерге гъулан мяишатари маларна чарвйир сивариан галариз кюч апIувал чвлин аьхирариз тешкиллувалиинди кIули гъубхну.
Хив райондин жиларин зиин гюзчивал гъабхру, жилин аьлакьйирин ва гъулан мяишатдин отделин начальникдин вазифйир тамам апIурайи Султан Аваевди субут апIурайиганси, улупнайи вахтназ галариъ Хив райондиан вуйи 19 дестейи кьюрд адапIура.
– Гьякьикьатди учу анжагъ пашман апIура, фицики малдарариз ццийин кьюрд читинуб гъабхьну. Зиихъ улупнайи дестйирин дахилнаъди галариъ 13 агъзур чарвана 1100 аьхю малар а. Амма, гьяйифки, сифте къурагьвал, хъасин улихьна йигъари гъахьи къуру аязар себеб духьну, ццийин йис малар-марччариз гъагъиб гъабхьну.
Галариъ чардух шлувалик умуд кивну, аьлава алафар гьязур апIбан гъайгъушнаъ гъахьундар, хъа чардух аязну гъубгну. Натижайиъ хайлин мяишатариъ чарвйир гаш’валиан пуч гъахьну. Тялукь аьгьвалатнаъ гьаму йигъари Асккан Ярккарин администрацияйин аьтрафариин гьяракатнаъ айи «Возрождение» кIуру мяишатдин малдарар чпин мал-къара хьади гал’ан гъулаз кьяляхъ хътакбанди ву. Имбу мяишатариъ аьгьвалат гьял апIбан чарасуз лазим вуйи уьлчмйир кьабул апIура, амма, гьяйифки.., – гъапну дугъу.
– Султан Маллагъурбанович, тялукь аьгьвалатнаъ дурзнайи изнарин гьял фициб вушул?
– Изнарин ужуб бегьер гъадабгърувалик умуд кивувал гьичра читин ву, фицики тахилар дурзнайи хутIлариз къурагьвалиан ханцI йивна. Му аьгьвалатну чав жавабра тувра…
Дарпиди гъитуз шулдарзухьан: малдарвалин цирклиъ лигим духьну, ата-бабйирихьан мина ухьухьна гъафи аьдатар ярхла дапIну, инсанар гъулан мяишатдин цирклихьна, асас вуди малар-марччар уьрхювалихьна, му саягъ вижнасузди янашмиш шулайивали узу мюгьталра, гьадму саб вахтна пашманра апIура. Гьякьикьатди субут апIурайиганси, гъулариъ вари жюрейин мяишатариъ уьрхюрайи мал-къарайин кьадар йислан-йисаз цIиб шула. Жигьилариз дурариз гъуллугъ апIувал затра бегелмиш дар. Гъавриъ аза: му рягьят ляхинра дар. Хъа гьадму саб вахтна, йишвариин ляхин адруваликан гъизгъинди улхури, жвуваз айибра хил’ан идипуб ихь дюз вуйин?!
Жиниб дар, гъи Хив райондиъ малин саб кило йикк 330 манатдиз (чарвайинуб 400 манатдиз), 3 литрин никкдин баллон 200 манатдиз масу тувра. Муштарйир, икибаштIан, гизаф а. Натижайиъ эйсийи хюни ваъ, хъа хюнди эйси уьрхюра. Тялукь аьгьвалатнаъ узу месэлайин жара терефну варитIан мюгьтал апIура: улхбарин натижайиъ бикарар вуча кIурайи ихь саб жерге ватандашар иллагьки гъулан мяишатдихьан ярхла духьна. Хъа мяишат- ра дюрюбхди гъулаъ дуснайи дурарин гъазанжар фуну терефнаан вуйкIан?!
Гьюрматлу ватанагьлийир, му жигьатнаан узуз кьатI’и жаваб тувуб читин вузуз, гьаддиз улупнайи месэлайин гьякьнаан ичв фикрар жавабнан кагъзариъ ачухъ апIуб тIалаб апIурача.
