Дагъустан Республикайиъ айи ярквран мяишатдин комитетди, ярквран мяишатдин федералин агентствойи чаин гъазанжар уч апIбаан илирчнайи вазифйир тамам апIури, республикайи тувну ккуни гьякъийин гьякьнаан гъубшу йисаз вуйи пландиъ улупнайибтIан артухъ пулин дакьатар уч гъапIну.
Ич газатдиз РД-йин ярквран мяишатдин комитетдин пресс-гъуллугънаан туву мялуматариз асас вуди, йисандин арайиъ дагъустандин яркврар ишлетмиш апIували гьюкуматдин бюджетдиз 65 миллионна 300 агъзур манат гъюз гъитну, хъа пландиъ улупнайиб 61 миллионна 900 агъзур манатIан дайи. Гьадму гьисабнаъди республикайин бюджетдиз тувуз пландиъ улупнайиб 2 миллионна 200 агъзуртIан даршра, 4 миллионна 800 агъзур манат жара гъапIну. Яна пуз шулуки, 2020-пи йисан республикайин ярквран мяишатдин комитетди региондин бюджетдиз уч гъапIу дакьатарин кьадар 2019-пи йисантIан кьюб ражари артухъди ву.
Цирклиъ лап ужуди ляхин апIурашра, йитIнайи йикьрар чIур апIру инсанарра фукьан вушра шулу. Ярквран мяишатдин цирклиъра яркур ишлетмиш апIурайивалин арендайин пул вахтниинди тутруврайи касар алахьуру.
Му месэлайин гьякьнаан Дагъустан Республикайиъ айи ярквран мяишатдин комитетдин председатель Вагьаб Аьбдулгьямидовди къайд гъапIганси, севда апIбан къайдйир чIур апIурайи арендаторарихъди йитIнайи йикьрар дючIюргъну, дурарихьан бюджетдиз дуфну ккуни гьякъи суддиинди ктабгъиди.
