Табасаранар фукьан кIубан, зегьметкеш халкь вушра, дурарин гьял дарапIди гъузнайи месэлйир гизаф ими. Ккудубшу йисан декабрин вазлин эвелариъ Дербент шагьриъ, табасаран жямяаьтлугъдин вакилар уч духьну, ихь милли культурайин автономия тешкил гъапIнийи – учу дидкан газатдиъра мялумат тувнийча. Автономия тешкил апIбан асас вазифа – халкьдин культурайин месэлйир сатIиди гьял апIуб вуйи.
Улихьна йигъари «Табасарандин нурар» газатдин редакцияйиз Мягьячгъала шагьриъ айи табасаран халкьдин яшлуйирин Советдин председатель Исамудин Рамазанов хялижв гъахьнийи. Газатдин журналистарихъди вуйи сюгьбатнаъ дугъу учв ва писатель Левсет Дарчев Ставрополь крайиз, душваъра табасаранарин милли ва культурайин автономия тешкил апIбан месэла гьял апIбан бадали, гъушуваликан ва чпи душваъ гъубху ляхнин натижйирикан ктибтну.
Къайд дапIну ккунду, Ставрополь крайиъ ихь кьюбиб районариан (Табасаран ва Хив) 18500 ватанагьлийир яшамиш шула. Дурари чиб-чпихъди ва Ставрополь крайиъ айи Дагъустандин Правительствойин вакилвалихъди аьлакьйир уьрхбан гьякьнаан цIибтIан ляхин дубхнадар.
«Ставрополь крайиъ учу сабпи нубатнаъди душваъ яшамиш шулайи ихь халкьдин вакил, Табасаран райондин Афна гъулан агьали Нариман Аьбдулкеримовдихъди гюрюшмиш гъахьунча. Дугъу учу Ставрополь крайиъ айи, хайлин йисари Дагъустандин Правительствойин вакилвалин тешкилатдин ляхнар тамам апIурайи Аьбдуллагь Уьмаровдихъди таниш гъапIнийи. Дугъахъди вуйи гюрюшдиъ крайиъ табасаран халкьдин культурайин автономия тешкил апIбан ва Аь. Уьмаровдин заместителди Нариман Аьбдулкеримов дерккбан месэла гъитIибккунча, фицики дугъаз инсанарихъди лихбан гьякьнаан аьхю тажруба ва хайлин мумкинвалар а.
Левсет Дарчевди Ставрополиъ айи Дагъустандин халкьарин культурайин Центрин дахилнаъди, табасаран халкьдин чIал, ирс, меденият уьрхбан бадали, элгьет йигъандин мектеб ачмиш апIбан теклиф дивнийи. Центр лазим вуйи китабарихъди тямин апIувал уч’ина гъадабгъунча.
Мидланра гъайри, Ставрополь крайиъ яшамиш шулайи табасаран халкьдин вакилар уч дапIну, гьаду-шваъ ихь халкьдиз алахьурайи читинвалар гьял апIуз кюмек тувру центр ачмиш апIбанра месэла гъитIибккунча. Фицики, аьхиримжи вахтари ихь халкьдин вакилариз къанун уьбхру органарин терефнаан цIиб илзигувал а. Фукьан вушра ужудар юристар ухьузра ахьуз. Гьадрарра жалб дапIну, ихь халкьдиз гиран ктапIуз гъитну ккундар», – гъапну Исамудин Рамазановди.
Исамудин Зейнудиновичди, сюгьбат давам апIури, 2015-пи йисан Ставрополь крайиз Табасаран театр хьади ихь халкьдин аьхю делегация гъафиваликан ва думуган ихь ватанагьлийири багъиш гъапIу китабар гъира Дагъустандин Правительствойин вакилвалин идарйиъ дивну имбуваликан гъапнийи.
«2015-пи йисхъан мина сарун 5 йис дубшна. Йиз фикриан, му жюрейин гюрюшар йисан кьюб ражарикьан духну ккунду.
Нариман Аьбдулкеримовдира, гьадушваъ ва Кафари Осетияйиъ айи ихь халкь уч апIбан бадали, хайлин жафйир зигура, амма уч шлу саб йишв адар. Му ляхин улихь гъябгъбан бадали, душваъ яшамиш шулайи хъанара жара ихь ватанагьлийирихъдира гаф-чал ва учхьан шлу кюмек апIуз гьязур вуйиваликан мялум гъапунча», – хабар тувнийи Исамудин Рамазановди.
Исамудин Рамазанов гизаф гьевес-кар, жвуван халкь сатIи, ватанагьлийириз кюмек апIуз ккуни кас ву. Ихь яшлуйирин Советдин председатель улихь гьучIвну, гьамускьан ихь халкь сатIи духьну, арайиз дуфнайи месэлйир гьял апIуз хъюгъюр кIури, умуд кивурхьа.
Шиклиъ: И. Рамазанов ва Л. Дарчев Ставрополь крайиъ айи РД-йин Правительствойин вакилвалин гъуллугъчйир Аь. Уьмаровдихъди ва Н. Аьбдулкеримовдихъди.
