Летчик – аьхю жавабдарвал айи пише ву, фицики дугъан устадвалилан тIирхурайи пассажирарин уьмур ва сагъламвал асиллу ву.
Гъийин йиз макьала аьхю самолетар хъаърайи пилот, ихь ватанагьли, Хив райондин Зилдикк гъул’ан вуйи ва Каспийск шагьриъ яшамиш шулайи Аьбдул Юзбеговдикан ву.
Аьбдул Юзбегович Юзбегов 1992-пи йисан Каспийск шагьриъ бабкан гъахьну. Ужудар аьгъювалариинди мектеб ккудубкIбалан кьяляхъ, дадайи дугъаз Санкт-Петербург шагьриъ айи военный университетдик диспетчер хьуз урхуз кIучIвуз теклиф гъапIнийи, амма му ляхин, военный касар хулаъ цIибтIан шулдар кIури, Аьбдулин адашдиз кьабул гъабхьундайи.
«Адаш разиди даршра, узуз му пише гъадабгъуз гизаф ккундийзуз. Урхуз кучIврайидар кьабул апIурайи комиссия Ростовдиъ айи. Документар тувбан кьяляхъ, йиз аьгъюваларин дережайиз дилигну, пилот хьуз урх кIури, мялум гъапIнийзуз. ИкибаштIан, мидкан адашдиз дишлади гъапундайза. Фицики военный кас цIибдитIан хулаъ шулдарш, пилот затра хулаъ шлур дар. Сарун узу урхуз гъягъюз рякъюъ учIврайиган, адашдиз хабар дебккза. Думу рази дарувал дугъан машнаан аьгъю шуйи, вушра адашди гафкьан гъапундайи. Хъа дада шад вуйи, дугъаз варитIан гучI’вал кайиб адаш рази даруваликан вуйи.
Шубуд йисан ватандаш’-валин авиацияйин Красно-кумскдиъ айи тIирхуз улупру училищейиъ гъурхунза. Гьаму училищейиъ урхурайиган, сабпи ражари самолетдиъра деънийза. Думу йигъ йиз зат кIваълан дурубшур. Зат самолетдиъкьан эдреу ва ягълишнахьан гучIру узу, самолетдин штурвалихъ дитиган, кIулиз дарфи фикрар имдайиз. Хъа, вуйиштIан, читинди дайи»,
– кIура Аьбдули.
Гьеле училищейин шубубпи курснаъ урхури имиди, Аьбдул ватандаш’валин авиацияйин Санкт-Петербургдин гьюкуматдин университетдик- ра заочно къайдайиинди урхуз кучIвну.
«Урхуб ккудубкIбалан кьяляхъ ляхин абгуз гизаф читинди вуйи. Наанди илтIикIишра, инглис чIал аьгъяш ва военный билет аш, гьерхуйи, гьацира жюрбежюр курсар ккудукIну ккундийи. Курсар кIуруш гизаф багьалудар вуйи. Гьадмуган, узу гъурхуб зяяди гъюдюдубчIвбан бадали, йиз абйир-бабари гизаф кюмек гъапIунзуз, гьадрарин кюмекниинди лазим вуйи курсар гъурхунза. Чухсагъул чпиз»,
– гъапнийи Аь. Юзбеговди.
Аьбдули сабпи ражари бицIи АН-2 (кукурузник) самолет хъапIнийи. Дидихъди жигьил пилотди Ставрополь крайиъ ва Дагъустандин Къизлар райондиъ хутIлариз, дурар жюрбежюр гьяшаратарихьан азад апIбан бадали, дармнар йивури гъахьну.
«Самолет аьхюб вая бицIиб ву кIурадар. Думу фициб вушра, эвелиъ лап гъагъиди алабхъуру. Ич ляхниъ варитIан асасуб – гьавайин шартIар ву.
КIваин илмийиз, саб ражари ихь аэропортдиан кукурузникдиъди Хунзах райондин дагълариина гъитIирхнийча. Гьациб яман микI хъайики, самолет абхъуз саб нуфттIан имдайи. Думуган узухъди ужударсдар командирарикан сар, ихь ватанагьли, рягьматлу Ражаб Аьлимурадович Ражабов хъайзухъ. Гьадгъан кюмекниинди, аьхю чухсагъул чаз, учу гужназ самолет адрабхъди гъибтнийча.
Сарун, му ляхин тамам апIури, 7 йис вуйиз. Жюрбежюр компанйириъра, аэропортариъра гъилихунза. Кми-кмиди компанйириз йиз резюме хътапIури шулза. Жаваб гъяйиз саб ваз шулу. Эгер улупнайи шартIар ужудар вуш, дурарихъди йикьрар йитIури шулза.
UTair авиакомпанияйиъ лихуз хъюгъиган, инсанар гъахуз хъюгъюнза. Инсанар гъахбан бадали, кьюб вазлин арайиъ ATR-72 самолет хъапIуз лазим вуйи курсар гъурхунза. Курсарин гьацI пай ихь гьюкюматдиъ, хъа имбуну пай – жара гьюкуматдиъ», – мялум гъапIнийи жигьил пилотди.
Пилотарин ляхниъ алахьурайи читинваларикан Аьбдули гьамци гъапнийи: «Читинваларикан улхуруш, сабпи нубатнаъди гьавайин шартIарихъди аьлакьалу вуди арайиз гъюру читинвалар гъадагъуз шулу. Эгер гужли микIар хъаш, тIурфан утIубччвнаш, яманди мархь, йиф убгъураш, самолет завариз адапIуз ихтияр адар. Хъа кьюбпи читинвал – вазариинди хулаз гъюз даршулайивал, жвуван хизан, майил-мадат, аьхю шулайи веледар дярякърайивал ву. Ляхин фукьан ужуб вушра, хизандин адми хизандигъ гъядрувал лап гъагъидитIан аьх апIуз шулдар».
Пилотар мавгьуматчи касар вуш, даршсан гьарсаб рейсназ удучIвайиз дурари тамам дапIну ккуни фицибкIа аьдат аш, узу Аьбдулихьан гьерхиган, дугъу мусурман диндиъ дицдарихъ хъугъуз ихтияр адруваликан, хъа чаз му жюрейин касар алахьруваликан гъапнийи.
«Узу училищейиъ урхурайи вахтна, ич командири узхьан йиз швнуб рейссан имиш гьерхнийи. «Аьхиримжи» рейстIан имдариз гъапиган, дугъаз узкан хъял гъафнийи. ВуйиштIан, пилотариз «аьхиримжи рейс» пуз ихтияр адар, «ккудубкIру рейс» дупну ккунду. Ич ляхниъ анжагъ гьадму гаф дупну ккундар», – мялум гъапIнийи Аьбдули.
Гьамусяаьт жигьил пилот Москвайиъ яшамиш шула.Дугъу чан уьмрин юлдшихъди сар байра тербияламиш апIура, багарихьди хизанра чахьна гъахуз планариъ а.
Гъит Аьбдул Юзбеговдиз заварилан гъябгъюрайи рякъ ягъурлуб ибшри, хъа дугъу хъапIрайи самолет гьаммишан гъюдлиди дубсри. Гьамцир велед тербияламиш гъапIу абйир-бабризра сагъ’вал ва ярхи уьмур туври.
