Образованиейинна илимдин цирклиъ гюзчивал гъабхурайи федералин гъуллугъну гьаму йигъари 2021-пи йисан 9-пи ва 11-пи классарин выпускникари гьюкуматдин аьхиримжи аттестацияйин (ГИА) расписаниейин цIийиди тартиб гъапIу проект чапдиан адабгъну.
Думу проектдиз асас вуди, 11-пи классариъ урхурайидари 2021-пи йисан ЕГЭ тувуз кьюб вахт улупна: асас вахт – 31-пи майиан 2-пи июлиз ва аьлава вахт – 12-пи июлиан – 17-пи июлиз.
Майин 31-пи йигъан 11-пи классдин выпускникари географияйиан, литературайиан ва химияйиан ЕГЭ тувру. Урус чIалнаан имтигьян кьюд йигъан гъабхиди: 3-пи ва 4-пи июндиъ. Математикайиан ЕГЭ гъабхувал июндин 7-пи йигъаз планламиш дапIна, хъа тарихдиан ва физикайиан имтигьян – июндин 2-пи йигъан, обществознаниейиан – 15-пи июндиъ, биологияйиан ва харижи чIалариан бикIбан пайнан ЕГЭ – 18-пи июндиъ гъабхуру. Харижи чIалариан ктибтбан ва сюгьбат гъабхбан пай, аьдат вуйиганси, кьюд йигъан: июндин 21-пи ва 22-пи йигъари кIули гъябгъиди. Информатикайиан ва ИКТ-йиан ЕГЭ 2021-пи йисандин выпускникари сабпи ражари вуди компьютериан тувди. Думу ЕГЭ-ра кьюд йигъаз пай дапIна. Думу предметдиан имтигьян тувуз июндин 24-пи ва 25-пи йигъар улупна. Мидланра гъайри, июндин 28-пи, 29-пи ва июлин 2-пи йигъар ЕГЭ тувбан резервдин йигъар ву.
Аьлава вахтна ЕГЭ июлин 12-пи, 13-пи ва 14-пи йигъари ва резервди улупнайи июлин 17-пи йигъан гъабхуз планламиш дапIна.
Гьюкуматдин аьхиримжи имтигьян (ГВЭ-11), 2021-пи йисан му имтигьян тувуз ихтияр айидариси, вузарик кучIвуз планарик ктру выпускникарира тувди. Думу имтигьян кьюб предметдиан гъабхуру: 25-пи майиъ – урус чIалнаан ва 28-пи майиъ математикайиан, гьацира резервди улупнайи йигъари: 8-пи июндиъ – урус чIалнаан ва 10-пи июндиъ – математикайиан.
Мидланра гъайри, гъябгъюрайи йисан ГВЭ-11 имтигьян тувуз аьлава вуди кьюб вахт улупна. Иццрушин вая жара важиблу дюшюш себеб дубхьну, асас вахтна имтигьян тувуз дархьидариз июлин 13-пи ва 17-пи йигъари урус чIалнаан ва математикайиан ГВЭ-11 тувуз ихтияр а. 3-17-пи сентябриъ ГВЭ улихьна улупнайи йигъари тувуз дархьидарихьан ва урус чIалнаан ЕГЭ-йин асккан балл гъадабгъуз дархьидарихьан тувуз шулу.
ГИА-9 проектдин расписаниейиъра имтигьнар тувуз кьюб вахт улупна: асас вахт – 24-пи майиан 2-пи июлиз ва аьлава вахт – 3-17-пи сентябрь ву.
Гьюкуматдин асас имтигьян (ОГЭ) ва гьюкуматдин аьхиримжи имтигьян (ГВЭ-9) 2021-пи йисан анжагъ кьюб предметдиантIан гъабхидар: урус чIалнаан ва математика-йиан. 2021-пи йисан 9-пи класс ккудубкIурайи ученикари жара предметарин ОГЭ ва ГВЭ тувидар.
