Мялум вуйиганси, табасаранаригъ халачийин ужудар, мяналу чешнйир каърудар асас вуди художникар ву. Художникдиз зигурайи шиклиъ ясана капIрайи халачийин чешнейиъ атIабгурайи гьарсаб накьишдин аьхю мянйирикан хабар а. Гьацдар касарикан сар – ихь ватанагьли, Хив райондин Мажвгул гъул’ан вуйи, Мягьячгъалайиъ яшамиш шулайи, республикайин меркездиъ ерлешмиш дубхьнайи халкьарин милли культурайин Центрин директор Шагьнабат Аьлимягьямедова (шиклиъ) ву.
Му дишагьли, машгьур халачичиси, ужур художникра ву. Шиклар зигбаъ, хъпалгури, рангар ишлетмиш апIувал Шагьнабатдиз гьеле бицIиди имиди таниш ву. Фицики гьарсар табасаран дишагьлийи, рангар саб-сабдихъди уччвуди гъюруси, уткан халачйир урхури гъахьну. Гьаци, саб-сабдихъди рангар ккабалгну, мурсларихьди убхурайи халачиси, Шагьнабат Аьлимягьямедовайи шикларра зигура.
26-пи февралиъ, сабпи ражари вуди, дугъан «Сабпи» кIуру ччвур тувнайи выставка халкьарин милли культурайин Центриъ ачмиш гъапIну. Ш. Аьлимягьямедовайи чан яратмиш апIбаригъян 14 чав гъизигу шиклар выставкайиз адагъну.
«Дюзди гъапиш, йиз гьаму зегьмет ухдитIан инсанариз улупуз ккунди айзуз, амма цIиб кьяляхъ зигурайза. Асас вуди узу каърайи шиклар гьар йигъан узуз рякъюрайидар ву.
Гьаму ляхнихъ гизаф юкIв хъайивализ лигну, узу Санкт-Петербургдин художествойин академияйик урхузра кучIвунза. Зигурайи шиклар ужудар вуяв кIури, му рякъ’ин узу алаур йиз куратор ПатIимат Гьюсейнова ву. Чухсагъул чаз»,
– кIура Шагьнабат Аьлимягьямедовайи.
Ав, учв халис табасаран дишагьли ва халачичи вуйивализ лигну, выставкайиъ кебхнайи гьарсаб шикил, хиларихьди дубхнайи халачийиз ухшарвал айиб ву. Мидин гьякьнаанра Шагьнабат Аьлимягьямедовайи чан фикрар ачухъ гъапIнийи. Дугъан гафариинди, чав зигурайи шикларик уьру ранг ктарш, дугъаз думу шикил ккудубкIнайибси рябкъюрдар. Мидира табасаранариз ккуни уьру ранг кайи халачйир дугъан кIваз багахь вуйиваликан кIура.
Выставка ачмиш апIбан серенжемдиъ РД-йин культурайин министр Зарема Бутаева, художник ПатIимат Гьюсейнова, искусствйирин сяняаьткар Татьяна Петенина ва хъанара хайлин жара касари иштирак’вал гъапIнийи.
Чан удучIвну улхбаъ Зарема Бутаевайира художникди дизигнайи шикларинна хили урхурайи табасаран халачйирин арайиъ зат фаркь’вал адруваликан гъапнийи.
Хъа Татьяна Петенинайи къайд гъапIганси, му йигъан «Сабпи» выставка ачмиш апIбахъди сабси, варидиз сарсана художник ашкар гъахьну.
«Гъийин му выставкайиъ асас вуди ихь уларикк ккахьрайидар шадвалин аку рангар ву. Гьарсаб рангназ чан мяна а, ва му рангар гъяркъиган, гьаз-вуш дишлади уччвудар мукьмар ерхьурайиганси шулу. Му ухьу уч духьнайи выставкайиъ ухьуз рякъюрайи шиклари нубатнан ражари ухьу гьарури, жвуван юкIв хъайи ляхин дапIну ккуниваликан кIура»,
– гъапнийи искусствойин сяняаьткри.
Выставка Мягьячгъала шагьриъ, Петр I ччвурнахъ хъайи проспектдин 23-пи хулариъ айи милли Центриъ 26-пи апрелизкьан давам шулу.
