Улубкьурайи вари дюн’яйин дишагьлийирин Йигъахъди аьлакьалу вуди, хайлин йисари Ватан уьбхюрайи эскрарин жергейиъди ляхин апIури гъахьи дирбаш дишагьли, старшина Сабият Абакаровайикан (шиклиъ) дибрикIди гъибтуз шулдар. Сабият 1971-пи йисан Табасаран райондин НичIрас гъулаъ бабкан гъахьну.
Мектеб ккудубкIбалан кьяляхъ, дугъу Дагъустандин Огни шагьриъ яшамиш шулайи, Гъуярик гъул’ан вуйи Максим Абакаровдихъди хизан ккебгъру. Эвленмиш хьпан кьяляхъ дурар 4 йисан Читинский областдин Забайкальейиъ яшамиш шули гъахьну – Максимди душваъ Яракьлу кьувватариъ гъуллугъ апIурайи. 1992-пи йисан жигьил хизандиъ сарпи веледра бабкан шулу.
«Хизандиъ сарун веледра хьпан кьяляхъ, жвуван багахьлуйирихьан ярхлади гъузуз даккунди. учу Дагъустандиз кьяляхъ гъюз чара гъапIнийча. Гьадму йисан лазим вуйи документарра гьязур дапIну, йиз жилирb Дербентдиъ айи сяргьятар уьрхру дестейиъ гъуллугъ апIуз хъюгънийи. Думу дестейин дахилнаъ Рутул ва Ахцигь районарра айи.
Бай цIиб аьхю гъахьиган, 1996-пи йисан йиз уьмрин юлдаш лихурайи дестейиз узура кьасабарди ляхниз гъадагънийи. Му цирклиъ зегьметнан рякъ узу Рутул райондиъ комендатурайиъ ляхин апIбалан ккебгънийза. Тазади ляхниъ дийигъиган, эвелиан гизаф читинди алабхънийзуз. Учу гъуллугъ апIуз гьаънайи Рутул райондиъ я хулар, я яшамиш хьуз лазим вуйи жара шартIар адайи. Дестейин вари гъуллугъчйир палаткйирикк дахъри-гъудужвури шуйи. Хъа кьасабрарин гьякьнаан кIуруш, учуз лапра гъагъиди вуйчуз. Фицики гьубкIну сурсатарихъди тяминвал адайи. 1997-пи йис гизаф ичIи йис вуйи. Думу вахтна тазади армияйиз гъадагънайи эскрарра учухьна духнайи. Думу жигьил эскрар гъяркъган, дадайин юкIв чан веледарихъан фици убгуруш, гьаци йиз кIвазра тясир гъапIнийи; дурариз ипIруб тувуз гьаци ккунди шуйзуз, аммаки ипIруб-убхърубдин гизаф кьитвал айи»,
– ктибтура Сабият Абакаровайи.
Дишагьлийирин назук гъюнариин фукьан-вушра читин гъагъар алахьури шулу. Сабият Идаятовнара гьацдар дишагьлийирикан ву. 20 йистIан артухъ вахтна Ватан уьбхюри, сяргьятариин гъуллугънаъ ади, дугъаз фукьан-вушра читинвалар алахьну.
«Кьюрпи бай 1998-пи йисан гъахьнийчуз. ИкибаштIан, узу отпускдиъ айза. ЦIиб вахтналан Чечендиан Дагъустандиин гъачгъар алархьнийи. Ко-мендатурайиан, гъачгъар гьюжум апIуз гъюра кIури, хабар тувиган, йискьубра дархьи веледра хилариин алди, швнуд йигъар-йишвар сенграриъ адаунза. Думу вахтари аьхюнур бай, мектебдиз гъягъюри, йиз сижарихъди Дагъ.Огни шагьриъ айи. Гьаму гъагъи йигъари думура йиз хилариин дархьивализ Аллагьдиз шюкюр ибшри кIури шулза.
Балин яш йисна гьацI гъабхьиган, сарун ляхниз удучIвунза. Узуз бицIидар айивалин гъавриъ ади, узухъди гъуллугънаъ айидари, гьятта гъаравулвал апIру вахтнара, мюгьлет ккабхъубси, узу хулаз бицIидарихьна гьаъну, чпи гъаравулвалиъ дугъужвури шуйи», – кIваина апIура Сабиятди.
Чан гъуллугъ давам апIури, 2002-пи йисан Сабият Абакарова уьмрин юлдаш Максимдихъди Ахцигь райондиз алдахъуру. Душваъ дугъу ипIру-убхъру сурсатарихъди тямин апIру гъуллугънаъ бухгалтервалин ляхин апIуз хъюгъру.
«Душваъ ляхин апIури, гизаф вахтна имдарза. Фицики гъуллугънан йишв кам гъапIнийи, ва узу комендантвалин отделениейиъ гюзчиди дерккнийи. 13 йисандин арайиъ душваъра гъуллугъ апIури имиза. Коллективдиъ айидар вари жилар вуйи. Узухьна дурарин гизаф гьюрмат ади шуйи», – мялум гъапIнийи йиз сюгьбатчийи.
БицIидар тербияламиш апIурайи, хъа асас вуди кюмек адру дишагьлийиз читинди алабхъуру. Сабиятдин аьхюну бай Артемди Дагъ. Огнийиъ 5-пи класс ккудубкIбалан кьяляхъ, дурари думу Ахцигь мектебдиз гьаъру, хъа бицIину бализ лигуз сар дишагьли дидисну, Сабиятди чан гъуллугъ давам гъапIну.
«Аьхюнур бай сарун варибдин гъавриъ айи, дугъхьан жарарин кюмек адарди гъягъюз-гъюз шуйи, хъа кьюрпи бай гьеле бицIиди имийи. Саспиган лигрур адруган, дугъаз мультфильмйир кивну, думу сарди хулаъ гъитну, ляхниз гъягъюри шуйза, хъа ляхин багахь хьайивал ва йиз коллектив ужуб вуйивал кюмек шули, вахт-вахтарик хулаз гъюри, дугъу гьапIраш лигури шуйза. БицIидарин багъ учхьан лап ярхла ерлешмиш дубхьнайивализ лигну, дина гьаундайчу. Гьамус сарун баярра аьхю гъахьну, аьхюнур эвленмишра гъапIунза, сар худулра азуз. Хъа узуна йиз уьмрин юлдаш Максимра сарун пенсияйиз удучIвнача. Веледариз ич рякъ давам апIуз ккун гъабхьундар. Дурари кьюриддира, дустагъдиъ айидарси, 18 йис зазар кайи телин айитI адапIну, гьаддиз сарун душваз кьяляхъ гъягъюдарча кIура», – аьлава гъапIнийи Сабият Абакаровайи.
Му дирбаш дишагьли, 3-пи мартдиъ къайд гъапIу учв бабкан гъахьи йигъахъди ва улубкьурайи 8 мартдин машкв-рихъди тебрик апIури, дугъаз сагъ-саламатвалин уьмур хъапIувал ккун апIурхьа.
