Йисак варитIан уткан вахт хьадукар ву, хъа инсаниятдин вакиларик варитIан уткандар – дишагьлийир. Хьадукран сифте гюзел йигъарра дишагьлийирин 8 Март машкврилан ккергъру.
Аьдат вуйиганси, гьар йисан ихь уьлкейиъ дишагьлийирин 8-пи Мартдин машквар къайд апIура. Дидихъди тебрик апIури, сабпи нубатнаъди узу Дагъ. Огнийин ЦГБ-йин кIулин духтир Жамиля Важибовайихьна илтIикIнийза. Цци 11-пи мартдиъ дугъан, му гъуллугънаъ дийигъну, сад йис шула.
– Йиз умриъ, 8-пи мартдин машкварси, 11-пи мартдин йигъра гьаммишан фикриъ гъубзди. Сач му йигъан узу Дагъ. Огни шагьрин ЦГБ-йин кIулин духтирди тяйин гъапIнийи. Думу йигъ ва йис узуз саб вахтнара кIвалан гьархидар. Фициб читин йис гъабхьнуш ва ихь кIул’ина фицдар йигъар гъафнуш, ухьуз варидариз мялум вухьуз. Вари уьлкейиъ тарабгънайи коронавирусдин тIягъвни ухьу апIурайи ляхнариз гизаф манигъ’вал тувну, хайлин ужудар инсанар уьмриан гъушну, – ккебгънийи сюгьбат Жамиля Важибовайи.
– Ав, дугъриданра, дишагьли мициб аьхю больницайин коллективдин аьхюр вуйиган, му уьзриан кетIерццнайи инсанариз фикир тувну, дурарин тIалабарра тамам апIуз аьхю кьувват ккунду, жавабдарвал гьисс дарапIру касдихьан мициб ляхин апIуз шлуб дар», – аьлава гъапIнийи йиз сюгьбатчийи.
Жамиля Важибовайи чан коллективди айи дишагьлийири гъапIу ляхниканра ктибтнийи .
– Жилиин али вари ужуб ва уччвуб дишагьлийирилан тина гъабхьиб ву гъапишра, кучIал даршул. Фунуб мажлиснаъра мясляаьтназ, гьюрматназ йишв ачухъ апIрудар ва жилиин уьмур давам апIурайидар, хизандиъ манишин уьбхюрайидар дишагьлийир ву. Фунуб девриъра гьам уьлкейиъ, гьам хизандиъ читинвалар гъахьиган, дишагьлийи дурар кьюбди гьисс апIуру ва читинваларин удучIвуз мумкинваларра агуру.
Му уьзри хайлин гъулайсузвалар, дарвалар гъахнийи, гьаци вушра йиз коллективдиз аьхю чухсагъул кIураза. Коронавирусдин тIягъвнихъди женг гъабхурайи вахтна Лариса Исягьмедовайи, Аьйшат Барадаранди, Людмила Агъамирзаевайи улупу жавабдарвализ ва чпин пишекарвалин заан дережайиз лигну, дурар Урусатдин президент Владимир Путинди гьюрматнан ва чухсагъул мялум апIбан грамотйириинди лишанлу гъапIну. Гьаму касарихъди сабси думу вахтна тIягъвнихъди женгнаъ гъахьи имбу духтир-дишагьлийиризра ихь варидарин терефнаан чухсагъулин гаф кIураза.
Гъи ихь вари гирами дишагьлийириз, дурар 8-пи Мартдин машкврихъди тебрик апIури, жандин сагъ’вал, уьмриъ чпин мурадарихъ хъуркьувал ккун апIурхьа, – гъапнийи Жамиля Важибовайи.
