Эбелцнан ихь халкьдин кюгьне вахтарилан мина гъубзнайи машквар ву.
Хив райондиъ му машквар яркьуди къайд апIури, саки хьуцIур йис шула. Ккудубшу йисан коронавирус уьзрихъди аьлакьалуди арайиз гъафи гьякьикьат себеб дубхьну, машквар къайд гъапIундар. Гъи уьзур кьяляхъ хъадабкну, аьгьвалат пучIу дубхьна. Гьаддиз цци му машквар къайд апIбаз лазим вуйи фикир тувна.
Эбелцан къайд апIувал – дюн’я чIиви хьувалин, хьадукар улубкьувалин ва инсанар хьадукран чюлин ляхнарихъ хъюгъювалин лишан ву. Амма му машквар хьадукран сабпи вазлиъ къайд апIували, Эбелцнан лишан вуди цIа кипували, милли хурагар гьязур апIували вари миллетарин вакилар сатIи апIура.
Яшлуйири субут апIурайиганси, нежбер касди чюлин ляхнар апIруган, чаз лазим вуйи вари алатар Эбелцнан гъаншариъ гьязур апIуб лазим ву.
Амма, гьяйифки, Эбелцан чюлин ляхнариз рякъ ккивбан лишан вуди имишра, гъи хутIлиъ лихурайи нежбрар ихь арайиъ тек-биртIан имдар. Натижайиъ чюлин ляхнариз лазим вуйи дуруц, пейин зигру гъул, мярхяр, мярхяриин илипру жал, юрккгъар, гьюрбйир, жюрбежюр тIурнар ва аьлава алатарра тарихназ гъушну. Гъи, жиниб дар, ухьу ихь баяр-шубар думу алатарихъди музейиъ таниш апIуз мажбур шулахьу.
Эбелцан берекетлу йисан эвел вуйивал субут апIури, машкврин ипIру-убхъру сурсатарин милли девлетлувализ дикъатлу фикир тувру. Дурарин арайиъ дяхинна харари, афрари, галари, цIикбари, нитIфи, гъванжрари асас йишв бисуру. Дяхинна харар гьязур апIбазра чан милли сир а. Му хураг гьязур апIуз вахтназ улихьна гьязур шула, фицики дяхин йигъар ккимиди кьутаъ дубччвну, деебццну, думу гажрахьан марцц апIбаъ аьхю мяна а. Саб жерге гъулариъ му хураг дяхин дурубччвди гьязур апIура, амма, пуз ккундузузки, дубччвну гьязур гъапIу хурагнан тIяаьм лапра ицциб шулу.
Эбелцнан дяхинна харар апIуз табасаранар гьеле чвну малин гъахар апIруган гьязур хьуз хъюгъра, фицики му хурагназ лазим вуйи санкьрар, кIурбар деерццну, гьязур апIура. Дяхнинна харарин асас сурсатар гъеебццу йикк али кIурбар, дяхин ва харар ву. Бязидари гьяжибугъдара кабхьра.
Шаксуз, му хураг лап тIяаьмлуб ва мянфяаьтлуб ву.
Хив райондин гъулариъ Эбелцнан машквар, 14-пи мартдилан башламиш дапIну, 22-пи мартдизкьан къайд апIура. Райондин дережайиъди му машквар 20-пи мартдиъ къайд апIиди.
Эбелцнан машкврин жюрбежюр аьдатарихъди газатдин 3-пи машнаъ таниш хьуз шулучвхьан.
