Улихьна йигъари Мягьячгъала шагьриъ Максим Горькийдин ччвурнахъ хъайи Урус драмайин театрин улихь ДАССР-рин 100 йис къайд апIбан Йисан дахилнаъди РД-йин культурайин министерствойина Республикайин халкьдин яратмишарин Хулу ва Мягьячгъалайин администрацияйин культурайин управлениейи сатIиди гьязур дапIнайи, хьадукран машквриз бахш вуйи фес-тиваль кIули гъубшну.
Хьадукар улубкьбан машквриз гьарсаб дагъустан халкьди чан ччвур тувна. Мисал вуди гъадабгъиш, табасаранари му машквриз «Эбелцан», лезгийири – «Яран сувар», урсари – «Масленица», лакари – «Интнил хьхьу», азербайжнари – «Новруз», рутулари – «Эр», цIахурари – «Юхханинйегъ», даргйири – «ХIебла бери», татари – «Шэгьме-васал» кIура.
Меркездиъ фестиваль гъябгъюрайи йигъан тамашичйириз Дагъустандин саки вари районариан му серенжемдиъ иштирак хьуз дуфнайи фольклорин дестйири чпи гьязур дапIнайи нумрар улупнийи.
Къайд апIуб лазим вуки, фестивалиъ иштирак гъахьи гьарсаб халкьдин яратмиш апIбан коллективари уч духьнайи тамашичйир хьадукар улубкьбахъди аьлакьалу чпин аьдатарихъди, хьадукран хурагарихъди, му машквранган апIру тамширихъди таниш гъапIнийи. Мушваъ иштирак гъабхьи Табасаран райондин фольклорин дестейи сягьнайиин хьадукранган фици изнар апIури, хутIлар урзури, кьутаъ дяхин дубччвну, хъасин дидкан фици дяхинна харар апIураш ктибтурайи нумрара улупнийи.
Серенжемдиз дуфнайи Табасаран райондин администрацияйин культурайин управлениейин начальник Аьбдулвагьаб Аьбдуловди учуз мялум гъапIганси, райондин культурайин управлениейин Гьюкуматдин табасарандин драмайин театрихъди сатIиди, Эбелцнан машкврихъди аьлакьалу вуйи гьаму фестивализ зиихъ къайд дапIнайи нумра гьязур апIури, саб ваз гъабхьну.
«Эбелцнан ччивар дегьзаманйириан мина гьачIарккнайидар ву. Агъзрар йисариинди инсанари хьадукар гъювал гьамциб шадлугъниинди къаршуламиш апIури гъахьну. Дагъустандиъра, хъа асас вуди Кьибла Дагъустандиъ, му машквар улубкьайиз вахт ккимиди гьязурлугар апIуз хъюгъри шулу. Гьарсаб халкьдин му хьадукран машкврихъди аьлакьалу чпиз хас вуйи лишнар ва аьдатар а.
Ихь Табасарандиъ машквриз кьюб ччвур тувну ашра (Эбелцан, Навруз-байрам), дидин аьдатар ва мяна саб ву. Янаки машквар къайд апIбиинди хьадукар улубкьувал, нежбрари хутIлариъ ляхнар апIуз хъюгърайивал улупура», – гъапну райондин культурайин управлениейин кIулиъ айири.
Чан улхбан аьхириъ Аьбдулвагьаб Аьбдуловди Табасаран райондин терефнаан, вари табасаранлуйирси, Дагъустандин имбуну миллетарра Эбелцан машкврихъди тебрик гъапIну.
Зиихъ мялум гъапIганси, фестивалиъ дагъустандин хайлин миллетарин фольклорин дестйири хьадукран машкврихъди аьлакьалу жюрбежюр сягьнйир улупнийи. Мина дуфнайи тамашичи, цIахур халкьдин вакил Мягьямед Аьгьмадовди фестиваликан чан рякъбар ачухъ гъапIнийи. Дугъан гафариинди, гьаму жюрейин серенжемар кми-кмиди кIули гъахури ккунду, фицики дурари сабпи нубатнаъди бабан чIалар артмиш хьуз, хъа, кьюб гъапиб, Дагъустандин халкьар чиб-чпин культурйирихъди, сяняаьткарваларихъди таниш хьуз, миллетарин арайиъ айи ужудар аьлакьйир уьрхюз ва мюгькам апIуз артухъси мумкинвал тувра. Хъа фестивалиъ иштирак гъахьи халкьарин сягьнийирикан улхури, дугъу чан кIваз варитIан хуш гъабхьиб Табасаран райондин сягьна (шиклиъ) вуйивал ашкар гъапIнийи.
«Узуз табасаран чIал аьгъдаршра, артистарин гафарин гъавриъ ахъундаршра, дурари улупу нумрайин варибдин гъавриъ ахъунзу. Гьадму гъябкъиган, узу фици йиз абайихъди хутIлариз гъягъюри, изан апIури гъахьнуш, йиз байвахтар кIваин гъахьнийиз», – къайд гъапIнийи Мягьямед Аьгьмадовди.
