«Эбелцан» машквар, ихь халкьдин милли аьдатариз асас вуди, кюгьне вахтариан мина мялум вуйи, цIийи йис къаршуламиш апIбан, хьадукрахъди табиаьт уягъ хьпан милли машквар ву.
Хив райондиъ, милли аьдатар уьрхюри, Эбелцан машквар къайд апIбаз лапра аьхю эгьемият тувра. Машквар райондин дережайиъди яркьуди къайд апIури, саки ягъчIвур йистIан артухъ ву.
Цци мартдин 20-пи йигъан, сагъламвал уьбхбан рякъ’ан хатIасузвал тямин апIбан лазим вуйи вари уьлчм-йирра кьабул дапIну, Хив райондиъ нубатнан ражари Эбелцан машквар заан дережайиъди къайд гъапIнийи.
Шадлугъар Хив РКДЦ-йин улихь гюрчегди дабалгнайи майдандиин кIули гъухнийи.
Мярака «Хьадукар шуруна» гъулан агъсакъли кьюрдуз гучI туврайи Эбелцнан цIа кабхьувалиинди ачмиш гъапIну.
Серенжемдиз уч духьнайидари, цIин гюрчег мурзариккди ва манишнаккди ялхъвнар апIури, мярака давам гъапIнийи. Агьалйири, Эбелцнан машкврихъди хьадукар къаршуламиш дапIну, бегьерлу йис шлувалик умуд киври аьдат ву. Бегьерлу йисан эвелин лишан вуди, Хив райондин культурайин отделин фольклорин ансамб-лин гъуллугъчйири «Хьадукар дуфна» мяъли гъапIну. Шадлугънан серенжемдиз дуфнайи хялар ва райондин жямяаьтлугъ машкврихъди тебрик апIури, Хив райондин глава Ярмет Ярметовди гьарсар касдиз мюгькам сагъ’вал, хизандиъ мясляаьт ва берекет, жямяаьтлугъдиз – сабвал ва ислягьвал хьувал ккун гъапIну.
Хъасин райондин агьалйир машкврихъди Дагъустандин Пра-вительствойин вице-премьер Нюсрет Уьмаровди, Халкьдин Собраниейин депутат Нариман Асваровди, РД-йин Гьисабнан палатайин отделин кIулиъ айи Бейдуллагь Мирзоевди ва Табасаран райондин глава Мягьямед Къурбановди тебрик гъапIнийи.
Эбелцнан мяракайин, Хив район экономикана яшайиш жигьатнаан артмиш апIбак лайикьлу пай кивбаз лигну, Нюсрет Уьмаровдиз «Хив райондин гьюрматлу ватандаш» кIуру заан ччвур тувну.
Серенжем Хив райондин культурайин хулан гъуллугъчйири, табасаран ва лезги эстрадйирин бажаранлу артис-тари лап маракьлуди кIули гъубхнийи.
Культурайин цирклин вакилари, мяракайиъ милли хурагарин суфрара дабалгну, халкьдин жюрбежюр девлетлу аьдатарра улупну. Эбелцан йигъан райондиъ гьацира спортдин милли жюрйириан талитарра кIули гъушну. Гьаци, гьяйвнариинди жаргъбаан гъалибвалин шубби йишварра Цнал гъул’ан вуйи чвйир Мягьямедэминовари гъадагъну, гиря за апIбаан Рамазан Шихгереевди (Асккан Ярак), хилар ккивбаан Арвид Рамазановди (Хив), шалмник кеъбаан Руслан Гьяжибалаевди (Мажвгул) сабпи йишвар гъидисну, хъа тIил зигбаан сабпи йишван сагьиб Хирччварин гъулан команда гъабхьну. Заан удукьувалар улупу вари спортсменар кьиматлу пешкешариинди лишанлу гъапIну.
