Урусатдиъ коронавирусдин тIгъюн тарабгъхъан мина магьа сад йистIан артухъ ву. Гьелелиг аьгьвалат яваш дубхьнадар. Му тIягъвюниан агьалйир аьзарлу шулайивалин дюшюшар яваш апIуз мумкинвалар дубхьнашра, думу цIийикIултIан ачмиш хьуз мумкин вуйивалин аьхю хатIа а. Гъябгъюрайи йисан мартдин 29-пи йигъандин улупбариинди, гъийин йигъаз вари дюн’яйиъ му уьзриан 127 840 991 кас аьзарлу гъахьну. Дурарикан 2 миллионна 797 агъзурна 388 кас гъийихну. Урусатдиъ аьзарлу гъахьидарин уьмуми кьадар 4 528 543 кас ву. Дурарикан 98 агъзурна 33 кас гъийихну. Дагъустандиъ аьзарлу, духьну, гьисабназ гъадагъу 30 958 касдикан 1344 агьали кечмиш гъахьну. Гъийин йигъазра республикайиъ саки агъзурихьна аьзарлуйир гьелелиг бегьемди сагъ духьнадар.
Му тIягъвнихъди женг гъабхури, дюн’яйин улихьди гъягъюрайи уьлкйири чпин вакцинйир ва дармнар арайиз хуз хъюгъну. Гьамусяаьт саки вари харижи гьюкуматари Урусатдин вакцинйир варитIан ужударси гьисаб дапIна. Гъи ихь вакцина 20-тIан артухъ харижи уьлкйири кьабуд дапIна ва дидин руб йивуз му уьлкйириъ инсанар аьхю нубатариинди дийигъна.
Сабпидарди коронавирусдин инфекцияйиз аькси вакцина Урусатдин аьлимари арайиз гъабхиган, Америкайин ва Евросоюздин кIулиъ айидар ва политикар кялхъри ва хътругъри гъахьнийи. Гъи дурари варидари «Спутник V» вакцина вари инсаният уьзрихьан уьбхру асас вакцинаси гьисаб апIура.
Гьамусяаьт Урусатдиъ коронавирусдиз аькси шубуб вакцина арайиз духна. Дурар сабтIан саб ужуб вая сабунубтIан тмунуб зяифуб ву, пуз шулдар.
Урусатдин Президент В. Путинди гьаму йигъари «Москва. Кремль. Путин» программайиъ, чав коронавирусдиз аькси прививка гъапIуваликан мялумат туври къайд гъапIганси, ихь вакцинйир фунуб ккундуш, гьадму йивуз шулу. Дурар шуббибра вари дюн’яйиъ арайиз духнайи вакцинйиртIан асас улупбариан варитIан ужудар, заан дережайиндар ву.
РД-йин сагъламвал уьбхбан министерствойиан мялум гъапIганси, гъийин йигъан Дагъустандиъ коронависдиз аькси прививка апIру 80 йишв ляхник ка. Дурар вари шагьрарин, районарин ва участокарин больницйирин бинайиин арццна. Мидланра гъайри, республикайин шагьрариъ ва гъулариъ прививка апIру ва саб йишвлан жара йишв’ина гъахуз шлу 45 пунктну ляхин апIура. РД-йин сагъламвал уьбхбан министерствойин пресс-гъуллугънаан къайд гъапIганси, прививка апIуз нубатнахъ Госуслуги порталиан мина, Дагъустандин сагъламвал уьбхбан министерствуойин саб вуйи «убцру линияйин» 122 нумрайиз вая поликлиникайин регистратурайиз зенг дапIну, хулаъ имиди дийигъуз шулу.
Прививка апIайиз духтрари давление ва бедендин температура ерцуру. Къайд апIуб лазим вуки, учIру уьзрар кайидариз прививка дапIну ккундар.
РД-йин сагъламвал уьбхбан министерствойин улупбаринди, республикайиъ 26 053 касди чпин хушниинди коронавирусдиз аькси прививка дапIна.
Дагъустандин штатдиъ адру кIулин пульмонолог профессор Къубатай Масуевди, вакцинацияйин мянфяатлуваликан улхури, гьамци гъапнийи: «Вакцинация — коронавирусдихьан, бязи дюшюшариъ аьжалихьан уьрхру варитIан мянфяаьтлу профилактика ву. Коронавирус лап хяви уьзур ву. Дидихъди зарафатар дапIну ккундар. ВаритIан ужуб, эгер мумкинвал аш, вахтниинди прививка апIувал ву. Уьзур яваш апIбан бадали, коллективдин иммунитет арайиз дубхну ккунду. Яна асккан гьисаб 60-70% агьалйирин прививка апIувал лазим ву».
Духтрар ва аьлимар гьякь ву. Узу хайлин духтрарихъди ва аьлимарихъди прививкайин гьякьнаан гафар апIураза, ва гьелелиг думу лазим дар кIуру кас алахъундарзуз, аьксина вуди, дурари варидари прививка дапIна ва чпин багахьлуйиризра, хизанарин вакиларизира вакцинайин руб йивбан теклиф апIура.
