Дагъустандин писателарин Союздиъ 31-пи мартдиъ поэзияйин юкьуб цIийи китабарин презентация кIули гъубшну.

 

Къайд дапIну ккунду, 2020-пи йисан Дагъустандин китабарин чапханайиъ Дагъустандин писателарин Союздин вакиларин юкьуб китаб чапдиан удучIвнийи – Марина Аьгьмедова-Колюбакинайин «Чвулин сяаьт» (урус чIалниинди), Сувайнат Кюребеговайин «Рихарин дих» (табасаран чIалниинди), Аминат Аьбдулманаповайин «Гъядягънайи эсерар» (дарги чIалниинди) ва Шейит-Ханум Аьлишаевайин «НивкI’ан вуйи балугъар» (къумугъ чIалниинди). Амма коронавирусдин тIягъвнихъди аьла-кьалу вуди, гизаф инсанар ади гъахру мяракйир къадагъа дапIнайивализ лигну, сач урхурайидар цIийи китабарихъди таниш апIру серенжем гъубхундайи.
Мярака ачмиш апIури, пиателарин Союздин кIулиъ айи Мягьямед Аьгьмедовди цIийи китабариз уьмуми кьимат тувнийи.

«Юкьби китабариъра авторари ихь уьмриъ гъягъюрайи гьядисйириз чпин, дишагьлийирин, лигбар ачухъ апIура; гьарсаб шиъриъ дюн’яйин, уьлкейин гележегдихъан, кьисматнахъан гъалабулугъвал кайи авторарин сикинсуз дихар ерхьура»,

– гъапнийи дугъу.

Хъасин шаирари чпин китабариан шиърар гъурхнийи. Сувайнат Кюребеговайи, чан нубат гъафиган, китаб ужуб ерийиинди чапдиан адапIбаз кюмек туву Дагъустандин китабарин чапханайин редактор Фируза Ражабовайиз ва художник МутIалиб МутIалибовдиз чухсагъул мялум гъапIнийи ва китабдиан «Йиз хяд» ва «Кьисматнан елкан» шиърар гъурхнийи. ЦIийи китабдикан улухури, шаири уч духьнайидариз поэзияйиз хас вуйи сирарикан сануб – шлу гьядисйирикан улихь ккимиди хабар туврувал – ачухъ гъапIнийи. Кюребеговайин гафариинди, му китаб дугъу, чан уьмриъ гъамлу дигиш’валар хьайиз сад йис улихьна дибикIнайиб вуйи, амма шиърариъ, фагьмиинди аннамиш апIуз даршлу саягъниинди, авторин гъийин гьял, дердлу гьиссар, уьмрин агьвалат атIагнийи.

Презентацияйиз уч духьнайидари шаирар китабар чапдиан удучIвбахъди тебрик гъапIнийи ва китабариан чпиз кьабул гъахьи шиърар гъурхнийи, дурарин гьякьнаан чпин фикрар ачухъ гъапIнийи.