9-пи апрелиъ Табасаран райондин культурайин хулаъ райондин администрацияйина Дагъустандин писателарин Союзди сатIиди тешкил дапIнайи, Шамил Къазиевдин яратмиш апIбариз бахш вуйи литературайин фестиваль гъябгъиди.

 

Дагъустандин писателарин Союз-дин табасаранарин секцияйин кIулиъ айи Сувайнат Кюребеговайи мялум гъапIганси, му серенжем райондиъ тешкил апIбан гьякьнаан теклиф дивур Табасаран райондин образованиейин управлениейин кIулиъ айи Аьбдусалам Гьясанов ву. Дугъан теклиф писателарин Союздиз кьабул дубхьну, серенжем райондиъ гъабхуз мясляаьт гъапIну.

«Дюз гъапиш, му серенжем гъабхбан бадали, гьеле 2019-пи йисан гафар-чIалар дапIнайи. 2020-пи йис коронавирус уьзрин лишниккди гъагъиди кIули гъубшнийи, гьаддиз фестиваль 2021-пи йисан гъабхуз гъибтнийи.
Шамил Къазиев 1944-пи йисан 1-пи апрелиъ Табасаран райондин Гуми гъулаъ бабкан гъахьну. Гьар йисан гьаму йигъан Гуми гъулаъ Ш.Къазиевдин ан рюгьназ бахш дапIнайи серенжемар гъахура. Магьа ццира, 1-пи апрелихъан ккебгъну, «Казиевские чтения» фестивалин, райондин вари мектебариъ бабан чIалниинди шаирин яратмишариз бахш дапIнайи ачухъ дарсар гъахура. Мидланна гъайри, гъуларин мектебариъ Шамил Къазиевдин шиърар урхбанра ва шаирин яратмишарикан сочинение бикIбанра конкурс гъябгъюра. Конкурсдин дахилнаъди ужуди шиърар гъурхдарикан 3 ва сочинение гъибикIдарикан – 3 мектебариъ урхурайидариз, ва зиихъ къайд дапIнайи ачухъ дарсар варитIан ужуди тешкил гъапIу 3 мялимдиз. 9-пи апрелиъ Хючна гъулаъ кIули гъябгъру «Казиевские чтения» серенжемдиъ Дагъустандин писателарин Союздин грамотйир тувди»,

– гъапну Сувайнат Кюребеговайи.