Табасаран райондиъ майин машкврар ккергъайиз марццишнар апIбан гьякьнаан гьязурлугвалар гъягъюра. 6-пи апрелиъ Табасаран райондиъ аьхю субботник кIули гъубшну.

 

Табасаран райондин культурайин управлениейин гъуллугъчйири, райондиъ марцци-шин апIбан бадали, субботникар гъахбаъ кIакIначивал улупну. Дурари Хючна гъулан кьялаъ айи парк зирзибилихьан марцц дапIну, вари чиркишин шишлариъ абхьну. Паркдилан илтIикIнайи мягьряжар дижикIну, дурар лизи шир йивуз гьязур гъапIну.

Библиотекайин гъуллугъчйири Дербентдиан Хючназ гъюру рякъхъан Ургур чву-ччвунна сар чуччун гъалайизди учIвру йишвахънакьан уч дубхьнайи зирзибил марцц гъапIну.
Табасаран райондин Хючна гъулаъ айи, Кьасум Мягьямадовдин ччвурнахъ хъайи искусствойин мектебдин коллективра субботникариъ иштирак гъабхьну ва 1-пи нумрайин мектебдихъан Хючна гъулан гьацIкьялазди гъюру рякъ марцц гъапIну.

БицIидарин яратмишарин Хулан гъуллугъчйири Хючна гъулан гъвалахъ хъайи аьхю гъядун гъирагъдихъ йишвар зирзибилихьан азад гъапIну.

Табасаран райондин Хючна гъулан гъвалахъ хъайи, Ургур чвуччвунна сар чуччун гъалайиъ ерлешмиш дубхьнайи тарихнан музейин гъуллугъчйири, душв’ин цIийи гъелемар киври, дурарихъ шидра хъубзри, саб уткан багъ яратмиш апIура. Гьарар, рукар-кюлер алдатIури, зирзибилра марцц апIури, саб хайлин майднарра ачмиш дапIна. Рякъюхъди сеткара дизигну, малар, чарвйир ва жара гьяйванатар удручIвруганси мюгькам дапIна. Зирзибилихьанра марцц дапIну, гъалайиин айитIишвра, дидин аьтрафарра, туристар гьяйран шлуси албагна. Гьамус ккунирихьан юкIв хърарабхди дина гъягъюз, рягьятвал йивуз шулу.

Райондин больницайин гъуллугъчйири субботникдин вахтна зирзибилихьан чпин идарайин аьтрафар марцц гъапIну.

Дупну ккундуки, гъулариъ айи мектебариъ лихурайи мялимари ва урхурайидари чпин гъуларизди гъюру рякъярихъ йишвар чIюрхярихьан, хъархъсихьан марцц гъапIну. Мицдар субботникар майин машкврар хьайизкьан кIули гъягъиди.

 

Шиклиъ: субботникдин герен.