Ттархьну швнур-сар касди сирнав апIру (синхронное плавание) спортдин жюре – спортдиъ варитIан успагьи жюрйирикан саб вуди гьисаб апIура. Тамашичйириз думу лап гьиибси рябкъюру, хъа гьякьикьатдиъ му жюрейиан заан хъуркьувалар гъадагъбан бадали, спортсменари аьхю зегьмет зигура. Варидарихъди сатIиди сабси нефес хътабгъувалихъди, командайин вакиларихъди ттархьну штуъ жюрбежюр гьяракатар тамам апIувалихъди сабси, штуъ такабурвалра улупури ккунду.
Синхронный къайдайиинди сирнав апIувалин спортдин жюре 1984-пи йисхъан мина хьадан олимпиадайин талитарин программайик ка. Ва гъийин йигъаз спортдин гьаму жюрейиъ иштираквал апIуз анжагъ дишагьлийиризтIан ихтияр адар.
Ихь республикайиъ спортдин му жюре артмиш шуладаршра, дидиъ заан хъуркьувалар гъадагъурайи дишагьлийирра а. Узуз йиз макьалайиъ ттархьну сирнав апIбан спортдиъ ужуб гележег хъайи ихь ватанагьли Зарина Аьшурбеговайикан ктибтуз ккундузуз.
Заринайин адашна дада Мирзафер ва Гюльмира Аьшурбеговар Москва шагьриз Табасаран райондин Кюрягъ гъул’ан кючмиш гъахьидар ву.
Заринайин 5 йис яш гъабхьиган, дадайи ва аьхюнур чуччу думу сифте фигурный катаниейиз, хъасин синхронный къайдайиинди сирнав апIбан спортдиз хъади гъушнийи.
Гъи Заринайин, спортдиин машгъул духьну, 12 йис шула. Думу Москва шагьрин, Московский областдин, Урусатдин жюрбежюр чемпионатарин иштиракчи ва заан йишварин сагьиб ву. Чан кубокарин ва медаларин кьадар гьякьлуди фукьан вуш, Заринайи ктухурикьан амдар.
«Узуз сабпи ражари спортдин гьаму жюре гъябкъиган, штуин шубари сатIиди тамам апIурайи жюрбежюр гьяракатариин, дурарин успагьи палтариин гьяйран гъахьнийза. Узу вари дюн’яйиз хайлин машгьур спортсменар гьязур гъапIу «ОЛИМПиК» клубдиз гъягъюраза. Узура дурариз ухшар спортсмен хьуз кьаст гъапIнийза. Хъа кIваъ айи умудар, эгер ухьу дурар уьмриз кечирмиш апIбан гъайгъу дизригиш, тамам шулдар. Узуз сикин дарди ва юкIв хъади гъахурайи тренировкйири хайлин кюмек апIуразуз. Гъи магьа гъагъи, амма ттархьну сирнав йивбаан читин ва успагьи гьяракатар тамам апIураза. Миди узук хъанара артухъ гьевес капIра. Йиз кубокарин ва медларин арайиъ 2018-пи йисан Москва шагьрин талитариъ гъадабгъу сабпи йишван кубок варитIан багьалуб вузуз. Думу командайихъди сатIиди дарди, анжагъ йиз кIул’инди вуйи программайиз тувуб ву»,
– ктибтура Заринайи.
Ич сюгьбатнаъ Заринайи сарпи тренер, чаз асас бинайин упражненйир улупу Елена Расько мани гафариинди кIваин апIурайи. Гьамусяаьт Зарина спортдин мастервализ кандидат ву. Хъа дугъу багарихьди спортдин мастер ва бицIи шубарин синхронный къайдайин сирнав апIбан спортдин жюрейин тренер хьуз кIваъ ниятар уьрхюра. Дугъан гьамусяаьтдин тренерар гизаф ражари олимпиадайин чемпионар вуйи Александра Паскевичди ва Светлана Ромашинайи гележегдиъ шуру заан хъуркьувалар улупрувалик аьхю миж кивра. Мектебдин кьяляхъ Заринайин Урусатдин гьюкуматдин физический культурайин, спортдин, жигьиларин ва туризмдин университетдик урхуз кучIвбан ният а.
«Хайлин вахтна нефес хътадабгъди штукк гъузуз вердиш хьпан бадали, учу саки 50 метр штун кIанккан сирнав апIури шулча. Штукк кьюб дакьикьайиъ нефес хътадабгъди гъузуз шулзухьан. Хъа йиз метлеб – олимпиадайин чемпион шубариси, штукк нефес хътадабгъри 4 дакьикьайиъ ва артухъ гъузуз вердиш хьувал вуйиз. Магьа лиг, гьаму шейъ (узухьинди пласмасдин чIюбкьру бицIи алат гьачIабккнийи) учу штукк ккайиган хъюхъниин иливури шулча. Миди хъюхъниъ шид убчIвуз гъитудар. Хъа йиз кушар жвурхувалин саягънакан кIуруш, думу ляхниъ дада кюмекчи вузуз. Синхронный сирнав апIбан спортдиъ иштирак шулайи шубари, штуъ кушар къайдайиъ гъузбан бадали, гьациб хусуси жюрейин желейикан гьязур гъапIу мутму кушариин алабсуру. Думу желе вая желатин кьюб-шубуб сяаьтна гьязур апIбан чан къайда а. Думу алиган кIулиз гъагъиди шулу, гьаддиз анжагъ чемпионатариъ ва жара талитариъ иштирак шлугантIан ишлетмиш апIударча»,
– аьлава гъапIнийи Заринайи.
Заринайи Москва шагьриъ 41-пи нумрайин мектебдиъ 10-пи классдиъ ужудар аьгъювалариинди урхура, ва думу мектебдин дамагъ ву. Шураз гизаф дустарра а. Хъа хьадан тятIиларин вахтна Аьшурбеговарин хизанди багъри ватандиз гъюзра вахт абгуру. Заринайин гафариинди, Табасарандин марцци гьавайихъди, ягъал дагъларин успагьивалихъди, бабан ицци афрарихъди ва абайин насигьятнан сюгьбатарихъди гьич фукIара тевуз шулдар. Гьаму хьадну вари хизанарихъди Дагъустандиз гъафиган, Заринайи, багъри редакцияйиз хялижвди гъюрза кIури, гаф тувну. Учу ихь чемпион риш, бажаругълу спортсмен аьхю аьшкьниинди кьабул апIидича. Хъа увуз, успагьи Зарина, гъит хъана аьхю чемпионатарин гъалибвалар кьисмат ишри!
