Гьюрматлу ватанагьлийир, дагъустанлуйир!

15-пи сентябриъ ихь республикайи гьюкуматдин важиблу машкврарикан саб – Дагъустандин халкьарин сабвалин йигъ къайд апIура. Машквар арайиз дуфну гизаф йисар даршра (2011-пи йисан), республикайиъ дидин мяна аьхюб ву. Халкьарин сабвал – саламат, ислягь уьмрин бина ву. Машкври, инсанди фунуб дин хъапIраш дилигди, вари халкьар албагну яшамиш хьувалин важиблувал улупура. Дагъустандин гизаф миллетарикан ибарат вуйи халкьар аьсрариинди албагну яшамиш шули, хъа читин йигъ улубкьиган, чIат’ан хаин душман гъафиган, жвуван хал, багъри ругар уьрхюз сатIиди гъудужвури гъахьну.

Жара вахтариси дарди, гьамусяаьт, Урусатди хусуси метлеб айи дявдин операция гъабхурайиган, ухьуз миллетарин, халкьарин арайиъ сабвал, чиб-чпиз кюмек тувувал чарасуз лазим ву. Дяви саб халкьдизра ккундар. Дявди саризра шадвал хурдар, диди ухьуз варитIан багьалу вуйи инсанарин уьмрар гъахуру, гизаф жафа дизигну тикмиш гъапIу хулар-йишвар даргъуру, инсанарин яшайишдин дережа ис ипру, табиаьтдиз ва экологияйиз аьхю зарар хуру.

Гъи ухьу саламатди яшамиш хьпан, ляхин апIбан бадали, СВО-йин зонайиъ айи ихь эскрари уьлкейин маракьар уьрхюри, женгар гъахура. Дурариз, чпин улихь гьюкуматди дивнайи месэлйир тамам дапIну, дявдин женгар ккудукIну, сагъ-саламатди чпин хизанарихьна кьяляхъ гъюб ккун апIурхьа.

Аьзиз дустар! Учвуз Дагъустандин халкьарин сабвалин йигъ кIваантIан тебрик апIури, мюгькам сагъвал, вари дюн’яйиъ ислягьвал, хизандиъ мясляаьт, хулаъ берекет, хушбахтлу уьмур ккун апIурача. Гъит, ихь республикайин халкьарин сабвал хъана мюгькам ибшри!

Редакцияйин коллектив