Гьаму йигъари ляхниан хулаз гъюрайириз ич хулан мялуматарин ва хабрарин кагъзар кайи цалин кьулик цIийи кагъаз кебхнади гъябкънийзуз. Думу элвен рангнануб ва чаина дикъат жалб апIуз гъитруб вуйи. Кагъзик коронавирусдиз аькси варитIан гужли профилактика вакцина вуйиваликан дибикIнайи ва инсанариз прививка апIру пунктар наан ерлешмиш духьнаш, мялумат туврайи.
Хулаз гъафир, фикрарикк ккахънийзу: яраб инсаният му уьзриин фила гъалиб шуйкIан? Гьамусдихъан тина маскйир алдарди жямяаьтлугъ йишварихь, транспортдиъ, тукандиъ лицуз ихтияр тувуйкIан? Му уьзри швнурсан инсан уьмрихъ мягьрум апIуз имийкIан? Амма му суалариз гьелелиг жавабар адар.
Му уьзриан узу гъубшу йисан декабрин 15-пи йигъан аьзарлу гъахьнийзу. ЦIийи йис улубкьурайи йишван уьзри узу лап гъагъи гьялназ гъахнийзу. Думу вахтна уьлкейиъ коронавирус лап яркьуди тарабгънайи. Санкт-Петербургдиъ йиз гъунши, йиз гъулан риш, юлдаш, му шагьриъ Александровский больницайин уьру зонайиъ лихурайи Маисат Рамазанова гагь больницайиз ляхниз, чагьсан ляхниан гьялакди узухьна жаргъури, швнуд-сад йигъ гъабхьнийи. Аьхирки, цIийи йис улубкьурайи йишван узу лапра гъагъи гьялназ гъафиган, дугъу медицинайин тяди хъубкьру кюмекнан гъуллугъназ зенг гъапIну. Гъафи духтрари йиз аьгьвалат гъагъиб вуйиваликан ва больницайиз гъахбан чарасузвал айиваликан гъапнийи. Амма, дурарин гафариинди, Санкт-Петербургдин вари больницйир аьзарлуйирихьди ацIнийи. Аьзарлуйир хьади дуфнайи машинар больницйирин гьяятариан чIатиндира саб километркьан ярхи нубатнаъ дийигънийи. Йишвар адарди, аьзарлуйир кьабул апIуз шуладайи. Хъа мициб гьялнаъ узу хулаъ фици гъитрушра, духтрар фикрарикк ккахънайи.
Маисат Рамазановайиз больницйириъ фициб аьгьвалат арайиз дуфнаш, дугъриданра, хабар айи ва дугъу узу сагъ апIбан серенжемар духтрарин гюзчиваликкди чав хулаъ гъахруваликан гъапнийи. Медицинайин тяди кюмек тувру дестейин духтрари йиз аьгьвалатнакан участокдин духтризра хабар тувнийи ва, сабпи январилан хъюгъну, гьар йигъан, узуз гьии хьайизкьан, участокдин духтир хулаз гъюри, хъа участокдин медсестрайи йигъандин арайиъ швнуб-сабан телефондиз зенгар апIури, йиз сагъ’валин гьял ахтармиш апIури гъахьнийи. Дурариз марцци кIваан чухсагъул кIураза. Дишди гъапиш, духтрарин ва медсестрйирин терефнаан мициб янашмиш’вал узуз Дагъустандиъ гъябкъюндарзуз.
Сифте саб дармниканра кюмек бихъурадайзуз. Узу гъагъиди иццру духьнайиваликан багахьлуйириз мялум гъапIундайза. Хъа, дишди гъапиш, узу сагъ шулу кIури, затра миж камдайиз. Фтикан дарман гъабхьнуш, вая Аллагь кюмек гъахьнуш, аьгъдарзуз, амма уьзри узу гъурхундар. Вушра, дид’ан узу гъира бегьемди сагъ духьнадарзу.
Сифте, вари ихь агьалйирси, узура коронавирусдин прививкайиз къаршуди вуйза. Гьякьлуди кIуруш, инсанарин арайиъ прививкайикан дюз дару улхбар, футнйир тарагърудар гизаф гъахьнийи. Улулубкьди аьгъю шулдар, кIуру гафар гьякьлудар ву…
Гъи йиз веледари, багахьлуйири йиз теклифниинди прививка гъапIну. Узуз йиз ккуни инсанар ярхи уьмрин эйсйир духьну, веледар тербияламиш ва хъасин эвленмиш апIури, сагъ-саламатди яшамиш духьну ккундузуз. Жара касар му уьзриан фици сагъ гъахьнуш, пуз шулдарзухьан. Хъа хайлиндар, яшариз ва жандин кьувватназ дилигди, му уьзри ихь арайиан гъурхну, хайлин касар гъагъи гьялнаъ ахъну, гизафдар гъира больницйириъ ими. Духтрарин гафариинди, прививка дапIну, дид’ан кечмиш гъахьи инсан адар ва хьидира дар. Вакцинайихьан ваъ, уьзрихьан гучI дапIну ккунду. Жара гьюкуматарин халкьариз ихь вакцина масу гъадабгъуз ккунди, думу аьхю пулихъкьан бихъурадар. Хъа ухьухь думу прививка пулсузди апIура. Му уьзриан аьзарлу хьуб учвуз кьисмат дарибшри. Учву аьзалу дархьуз прививка апIинай. Диди учву ичв хизандиъ сагъ-саламатди уьрхюз кьувват тувди.
