Табасаран райондиз Пятигорск шагьриан 22 жюрейин гьяйванатар айи, йишвлан йишв’ина гъабхру «Паччагь аслан» кIуру зоопарк дуфна. Думу Дербентдиан Хючназди гъюру рякъюхъ, заан Ягъдигъинди илтIикIру йишвахъ нирихъинди терефназди бина дивну, дийибгъна. Гьаму улихьна йигъари узу думу зоопаркдин кIулиъ айи Артур Мусаяляндихъди саб бицIи сюгьбат гъубхнийза.

 

– Артур Артурович, учву Табасаран райондиз сабпи ражари дуфначва. Фицдар жюрейин гьяйванатар духначва?

– Учухь жюрбежюр гьяйванатар хьачухь: Африкайиан вуйи асланар, гималайиан духнайи кьюб швеъ, макак-резус кIуру маймун, чIурдин гату, персияйин леопард, леопон, пума, пони, лама, тIюхъяр кайи мирш, енот, кIару сул, Индияйин вуйи павлин, гьяйван, кьюб жанавар, фуй ва гьацдар жарадар.

– Гьяйванатар ктарди, бицIидариз кьабул шлу сарун фицдар алатар, тамшир апIру мутмйир хьачвухь?

– Учу гьацира зунжрарихьди ккибтIнайи карусель, хуларра хъади, рукьан рякъ’инди хъапIру бицIидарин вагон, батут дубхнача; баяр-шубарихьан понийиин элеъну яртузра шулу.

– Табасаран райондиъ филадиз гъуздичва?

– Мушваъ 20-пи апрелиан 5-пи майизкьан гъузурча. Зоопаркдин гьяйванатариз лигуз гъюз ккунидариз билетдин кьимат аьхюдариз – 250 манат, хъа бицIидариз – 200 манат вуйич, шубуд йисазкьан вуйи бицIидар чIанади хъади гъюз шулу. Учу гвачIнин сяаьт 11-диан хябяхъдин сяаьт 8-дизкьан ляхин апIурача. Ич телефон: 8(928)7777911 (зоопарк «Король Лев»).

– Чухсагъул Артур Артурович. Ичв учу бадали дизигнайи зегьмет зяя дарибшри, учвухьна гизаф инсанар гъюруганси ибшри.