Улихьнаси 22-пи апрелиъ Дербент шагьриъ «Кьисматну багъиш гъапIу вахт» кIуру китабдин презентация кIули гъабшну. Му китаб гъибикIур ихь ватанагьли, гьюрматлу кас, РФ-йин халкьдин просвещениейин отличник, РД-йин лайикьлу мялим ФатIимат Аьлиева-Мирзоева ву.
«Табасарандин нурар» газатдиъ хайлин йисари ляхин гъапIу Къазимягьмед Шабалаевди «Мялимдин уларин акв» кIуру макьалайик текрар апIурайиси, «бажаранлу дишагьлийирикан улхруган, ихь фикрариз писателар, шаирар, духтрар, аьлимар, мялимар, инженерар ва жара жюрбежюр пишекрар гъюру. Дишагьлийин сес, улар, хилар, фикрар инсандиндихьна рягьимлувал, кIван ачухъвал улупрудар ву. Гьацдар дишагьлийирикан сар ФатIимат Гьяжимирзаевнара ву».
ФатIимат Аьлиева мяналу гьядисйириинди абцIнайи уьмур хъапIу кас ву. Дугъу чан уьмрихьна вуйи тамарзувал ва кьисматназ баркаллу хьувал чав гъибикIу китабдиъ ачухъ дапIна. ФатIимат Алиева гьаммишан машнаъ инчI ва нур айи кас ву. Дишагьлийин кIулиина хайлин читин йигъар гъюри шулу, амма ФатIимат Гьяжимирзаевна дурариз мютIюгъ гъахьундар. Дугъан гьарвахтна кIваъ айиб, уьмриъ чаз алахъу инсан фици рази апIидийкIан кIури, фикрар ади дуланмиш хьувал ву.
Узу му мяракайиъ иштирак хьуз дуфнайи хяларихьан китабдин гьякьнаан ва дидин авторикан чпин фикрар ачмиш апIуб ккун гъапIнийза.
Шюшеханум Керимова, китабдин редактор, табасаран шаир:
«Узуз уьмриъ мицир кас кьисмат хьуб гизаф рази вуза. Узу ФатIимат бажийихъди «Табасарандин нурар» газатдиъ ляхин апIуз хъюгъу вахтна таниш гъахьунза. Ва вахт-вахтари дугъу чахьна узуз теклифар апIури, чав дибикIнайи ккудубшу уьмрин гьядисйирихъди узу таниш апIуйи. Хъа аьхириъ, чан хизандикан ва чан уьмрин гьядисйирикан дибикIнайи макьалйирикан дюзмиш дапIнайи китаб редактировать апIуб ккун гъапIнийи. Гьамци сад йисандин арайиъ китабдихъди ляхин дапIну, думу арайиз гъабхунза. Китаб фукьан вушра маракьлуб, нумуна айиб ву. Гъит авториз хъана артухъ хъуркьувалар ишри».
Тажудин Мягьрамов, зегьметнан ветеран:
«Узу ФатIимат Аьлиева-йихъди Дербент шагьриъ педучилищейиъ таниш гъахьунза. Думу вахтари табасаран дишагьлийириз урхуз думукьан мумкинвалар адайи, ва абйир-бари дурар шагьрариз гьаърира гъахьундар, дишагьлийин йишв чан хулаъ ву кIури. Амма ФатIиматдиз чпин адаш Гьяжимирза халуйи урхуз мумкинвал тувнийи. ФатIимат урхувалихьнара, гьарсаб ляхнихьнара намуслуди янашмиш шлу бажаранлу дишагьли ву. Магьа гъи дугъу учу вари, чан дустар, мирасар ва имбу чаз гирами касар, уч дапIну, чав гъапIу уьмрин ляхнин натижа улупну. ФатIиматди чан гъулаъ риш Селимат варитIан багахь касси, чуччун ерина гъидисну. Дурар сабпи классдихъанмина сатIиди аьхю гъахьидар ву ва урхузра сатIиди гъушну. Узу сад йис улихьна «Табасарандин нурар» газатдиз думу кьюрид жавабдар дишагьлийирикан вуйи «Сабпи псинчIар» кIуру макьала гъибикIунза. Ва гъийин мяракайиин узу утканра вуза, гьаз гъапиш йиз уьмриъ гьамцдар инсанарихъди узуз дуствал апIувал алабхъну. Аьлиеварин хизан узуз вуйиз. ФатIиматдин уьмрин юлдаш Рамазан Аьлиев фукьан вушра гьюрматлу кас ву. ФатIиматдин ачухъвал ва мицисдар хъуркьувалар хизандин кIул Рамазнакан хайлин асиллу ву. Йиз терефнаан Аьлиеварин хизандиз хъуркьувалар ва шадвалар ккун апIураза».
Къизейбат Гьяжиибрагьимова, шаир:
«ФатIимат бажи ва узу кьюрид чвйирихь хьайи хванар вуча. Узуз думу йиз уьмриъ аьхю чиси гъахьир вуйиз. Учу кьюрид, мирасар шайиз, сабпи ражну 1999-пи йисан ихь Дербент шагьрин гъалайин канчIлихъ ерлешмиш дубхьнайи халачйирин базариин таниш гъахьунча. Гьадму йигълан мина узу дугъахъди дуствал апIураза ва магьа кьисматну хъанара багахь гъапIунча. Йиз дугъахьна вуйи гьюрмат йиз шиъри улупназа.
Жилин саб уж’вал вуда
Я гъирагъ, я аьхир адруб.
Зав’ан ихь пайси тувнада,
Ухьу – хванар, багахь хьуб.
Дагълар’ан Рубас ниринси,
Лепйирихъ уьмрин гьахъиган,
Гъалайикк, шагьрин гъянаъси,
Каспий гьюлихъ вуйихь макан.
Сир-мясляаьт вуйихь сабси.
Аьгъюб – шулихь сатIиди,
Дагъсиб гьюрмат арайиъ ади,
Саб хизандиъ хъаъри яшар,
Хуш кюкйириз вуди ухшар.
Уьбхруси уьмрин халачи,
Кьюб кьисмат духьнайси юлчи.
Гьарсаб ляхин гъюрив хил’ан.
Итруси дидиъ гьевес кIван.
Шулва гьялак апIуз гьюрмат,
ДарапIди дидкан аьламат,
Жилин гъубзри гьиссарин шил,
Ужувлаз гьачIабккруси хил.
Мярака заан тешкиллувалин дережайиди шаир ва «Кьисматну багъиш гъапIу вахт» китабдин редактор Шюшеханум Керимовайи гъубхнийи. Презентация лап маракьлуди кIули гъубшнийи. Уч духьнайидари ФатIимат Аьлиевайин терефназ хайлин мани гафар гъапнийи, дугъахъди аьлакьалу жюрбежюр гьядисйир кIваин гъапIнийи. Автори чан китабдикан, дидиъ атIагнайи гьядисйирикан, чан уьмрикан ктибтнийи ва уч духьнайидарин суалариз жавабар тувнийи.
Шиклиъ: мяракайин саб герен.
