30-пи апрель Урусатдин МЧС-дин цIа кабхъувалин дюшюшарихьан уьрхбан Йигъ ву. Цци Урусатдин цIийир кахьбахьан уьрхру гъуллугънан 372 йис шула.
Гизаф йисари ляхин апIури, му идарайин ччвур ва гъурулуш сабшвнубан дигиш гъахьну. Хъа, гьаци вушра, инсанар ва дурарин мутму цIихьан уьрхювал – дурарин важиблу месэла вуди гъубзра.
РД-йин МЧС-дин Табасаран райондиъ айи цIа кабхъувалин дюшюшарихьан уьрхбан 23-пи нумрайин часть 1986-пи йисхъан мина Хючна гъулаъ ерлешмиш шула. Му идарайин начальникдин заместителди лихурайи аьхюнур лейтенант Мясум Мягьямедовдин гафариинди, сифте 23-пи нумрайин ПСЧ саб бицIи хулариъ ерлешмиш дубхьнайи, дидин дахилнаъ саб машин дебккру гараж, саб дахъру хал, саб диспетчерин хал, аьгъювалар гъадагъру класс ва уьл ипIру йишв айи.
2002-пи йисхъан мина Хючна гъулаъ айи 23-пи нумрайин ПСЧ МЧС-дин дахилнаъ а.
2004-пи йисан 23-пи нумрайин ПСЧ цIийи идарайиз удубчIвну. Гьамусяаьт душваъ машинар дерккру 3 бокс, котельный, склад, аьгъювалар гъадагъру класс, аьлакьайин пункт, директоризна заместителиз кабинетар гьязур дапIна.
Идарайин гьяятдиъ волейбол апIру майдан тикмиш дапIна ва спортдин жара инвентарь дивна. Гьаддиз ПСЧ-йин волейболин командайи райондиъ кIули гъягъру талитариъ гьарган ужудар хъуркьувалар улупури шулу.
2018-пи йисхъан мина 23-пи нумрайин ПСЧ-йин начальникди майор Ариф Аьлипашаев лихура.
23-пи нумрайин ПСЧ-йин кIулиъ айидари чпин идара заан дережайиинди либхбаз аьхю фикир тувра, гьаддиз думу лазим вуйи вари алатарихъдира тямин дапIна. Машинар рас апIури, гьарган цIийир ктIушвуз гьязурди дерккна.
«Табасаран райондиъ айи цIийир ктIушвру идарайиъ гьамусяаьт 28 касди ляхин апIура, дурарин ихтиярнаъ 2 цIийир ктIушвру машинар а.
Гьар йигъан 6 кас нубатнахъди ляхин апIуз удучIвура. Му частнаъ саб цIийир ктIушвру штун автоцистерна а. 2021-пи йисан ккудубшу вахтна Урусатдин Дагъустандиъ айи ГУ МЧС-диз 23-пи нумрайин ПСЧ-йиз, цIийир ктIушвбан бадали, 16 ражари дих апIбар гъахьну, дурарикан 7 – инсанар яшамиш шулайи хулариъ цIийир ктIушвбан, 1 – транспортдин, 4 – гъеебццу укIан, ярквран ва зирзибилин ва 4-сан жарадар.
ЦIийир ктIушвбан ляхин заан дережайиинди тешкил апIбаъ читинвалар адар. Фунуб йишваз дих гъапIишра, бригада ккуни вахтна дина гъябгъюз гьязурди а.
Гьар йисан мани вахт улубкьубси, цIийир кахьбан дюшюшар арайиз гъюру. Йисан гьадму вахтна гъеебццу укIарик ва зирзибилик цIийирра кирчру. Гизафси гьацдар цIийир кирчбарикан хусуси хуларик ва жара йишварик цIийирра кахьри шулу», – къайд гъапIнийи Мягьсум Мягьямедовди.
Дугъу гъапиганси, вари гъулариъ, цIийир кахьган адмийириз аьгъю апIбан бадали хабар тувру шей’ар, алатар, цIийир ктIушвуз гьязурди шидра ади ккунду. Инсанар яшамиш шулайи гьарсаб хулан гъвалахъ штун резервуар, ясана цIа ктIубшвру алат хъади ккунду.
Урусатдин Дагъустан Респуб-ликайиъ айи ГУ МЧС-дин 23-пи нумрайин ПСЧ-йин гъуллугъчйири хьадукар ва хьад улубкьурайи вахтна инсанариз вахт ккимиди укIар-кIажарик ва зирзибилик цIийир кирчруган ихтиятвал апIувал ккун апIури шулу.
«ЦIийир кахьру вахтна фу дапIну ккундуш, кIваин апIидиза:
1. ЦIа кабхъну гъябкъюбси, зат дидригъди къутармиш апIбан саб вуйи 112 телефондиз зенг дапIну ккунду.
2. ЦIа кабхъиган, яв миж каш, инсанарра хул’ан адаъну, гъуншйиризра дих дапIну, зат дидригъди думу ктIубшвуз хъюгъну ккунду.
ЦIа кабхьну, читин аьгьвалатнаъ ахъу инсанариз кюмек апIбан бадали, фу дапIну ккунду?
ЦIа кабхънайи хулаъ учIвайиз, кумрахьан учв уьрхбан бадали кIул’ин кьяши дапIнайи чарч илипну ва гьадму чарчлиан мина ил хъадабгъну ккунду.
ЦIа кабхънайи хулазди учIвру ракк-нар гьадушваъ айи гьава ва цIа чкиди утIутIурччвбан бадали, явашди арццну ккунду.
ВаритIан гизаф цIийир – цIихьан ихтият дарувалиан кархьру: акварин шнурариан, дюзди албагну адру алатариан, тяйин дапIнайи йишвахь папрус дизригувалиан, цIа кипувалиан ва гьацдар жара дюшюшариан», – аьлава гъапIнийи Мясум Мягьямедовди.
Шиклиъ: 23-пи нумрайин ПСЧ-йин коллектив.
