Дагъустандин гизаф районариъ диндин асас мяна-метлеб чIур апIурайидарин тешкиллу дестйири чпин жергйириз жигьилар жалб апIру вахтар тарихназ гъушну гъапишра, кучIал даршул. Амма террориствалин вягьши гьяракатари тахсир ктарди гъийиху жигьил жанар, веледарин чIур гъахьи кьисматар инсанарин кIваан адагъайиз гизаф йисар гъягъиди.
Улихьна йигъари РГВК «Дагъустан» телеканалин ЦIунтIа райондиз командировкайиз душнайи журналистди улихьди террориствалин гьяракатарихъди аьлакьайиъ гъахьи, дустагъдиъ жазайин вахт адапIну, гъулаз кьяляхъ дуфнайи касдихъди сюгьбат гъубхну.
ЦIунтIа райондин Хибятли гъулан агьали Арсен Кьадировдин 27 йис дубхьнадар, чан яшнакан саки 6 йис дугъу дустагъдиъ адапIну. Жигьил вахтна дугъу гъапIу гъалатIнан кьимат гьамциб гъабхьну. Арсен, террористарин гьяракатариз кюмек апIбаз лигну, дустагъдиъ итнийи. Дугъу террористарихъди чан аьлакьа фици ккебгънуш, журналистдиз ктибтнийи. Арсендин гафариинди, жигьилвалин фикрар пучIудар вуди шулу. Саб ражари дугъкан террориствалин гьяракатаригъ гъяйи, чахъди мектебдиъ урхури гъахьи чпин мирасдин бали кюмек ккун гъапIнийи. Кюмек гъапIган, чав гьунар гъапIубси дубхьну, 19 йисаъ айи бализ учв фици террористарин тешкилатдиъ ахънуш, хабаркьан гъабхьундайи. ЦIиб вахтналан Арсендин террористарихъди аьлакьйир айиваликан къанун уьбхру органарин вакилариз мялум гъабхьнийи. Натижайиъ дугъу ижми къайда айи дустагъдиъ 5 йисанна 4 вазлин арайиъ жаза зигури гъахьну.
Журналистдин суалназ жаваб туври, Кьадировди гьамци гъапнийи: «Узусдар жигьиларин ибариз ккунидар уччвудар гафар вуйи. Учу алдатмиш апIури, дурар ужуди яшамиш шула, мушваъ ужуди дар, жара йишвариъ яшамиш хьуз рягьятди ву, кIури шуйи».
Кьадировди къайд гъапIганси, думуган чав апIурайи ляхин дугъаз дюзуб вуйиси рябкъюйи. «Думуган инсанарин фикриъ узу дирбаш байси, игитси рякъруганси вуйзуз. Хъа гъи гъавриъ аза – игитвал дициб шулдар, дидиз уьлчIюкьну улар фтихъ-вуш хъергувал кIуру», – давам апIура Арсенди.
Арсендиз чан хизан а: абйир-бабар, хпир, бай. Дугъу чан гъубшу уьмрин гъалатIар дюз апIуз мумкинвалар агура. Жигьил гьеле саб ляхнин эйси духьнадар, хизандин гъайгъушнар кIулиз адагъура, учв дустагъдиъ итну кьюб вазлилан бабкан гъахьи чан велед тербияламиш апIбахъ хъа.
Учв яшамиш шулайи йишв’ан жара йишваз гъягъюз къанундиинди ихтияр гъабхьиган, думу тикилишчиди лихуз Мягьячгъалайиз гъягъбанди ву.
Арсенди гьамусдин жигьилариз насигьят тувра: «Жигьиларикан ккун апIураза, къанундиз аькси ляхнар мапIанай, ичв абйир-бабарин насигьят гъадабгъай. Уччву гафар апIури, учву дюз дару, къанундиз аькси рякъюхъ хъаърударин гафарихъ мухъугъанай. Уьмрин рякъюъ гъалатIар хьуз мигъитанай, жарадарин гъалатIар текрар мапIанай».
Ав, Арсен Кьадировси, чав деебту гъалатIниин швумал гъахьидар ихь арайиъ гизаф ашул. Амма вахт кьяляхъ апIуз шлуб дар, гьаддиз уьмрин дюз дару жилгъа ктабгъуз гьялак махьанай, фикир апIинай.
