Гъалибвалин Йигъ, 9-пи Май, ихь уьлкейиъ къайд апIру машкврарикан варитIан гирами машквар ву гъапишра, кучIал даршул, гьаз гъапиш, думу ихь аьхю наслари заан кьиматниинди гъазанмиш гъапIуб ву.

 

 

Табасаран райондиъ

 

Гъалибвалин машквар къайд апIру йигъан Табасаран райондин кьялан майдандиина райондин тешкилатариан, карханйириан, мектебариан, багахь ерлешмиш духьнайи гъулариан варжариинди агьалйир уч гъахьнийи. ГвачIниндин сяаьт 10 шули, машкврин колоннайиъ айидар «Аьжалсуз полкра» хъади, Ватандин Аьхю дявдиъ чпин жанар диву эскрариз больницайихъ дивнайи гюмбетдихъна гъушнийи ва цIийи алапIну, рас дапIнайи гюмбетдихъ кюкйир дивнийи.

Аьхю Гъалибвалин 76 йис хьпаз тялукь вуйи митинг Табасаран райондин культурайин, спортдин ва туризмдин управлениейин начальник Аьбдулвагьаб Аьбдуловди ачмиш гъапIнийи.

Дугъу сабпи гаф Табасаран райондин глава Мягьямед Къурбановдиз тувнийи. Райондин кIулиъ айири, гъийин наслиз ислягь гележег гъазанмиш гъапIу Ватандин Аьхю дявдин иштиракчйир, серенжемдиз уч духьнайидар машкврихъди тебрик апIури, дурариз жандин мюгькам сагъ’вал ккун гъапIнийи. Хъасин митингдиъ Дагъустан Республикайин Халкьдин Собраниейин депутат Алавудин Мирзабалаев удучIвну гъулхнийи. Дугъура ветеранар, фронтдин далу терефнаъ зегьмет гъизигу касар ва райондин вари агьалйир гирами машкврихъди кIваантIан тебрик апIури, варидариз жандин мюгькам сагъ’вал, уьмриъ хушбахтвал ккун гъапIнийи.

Дявдин иштиракчйирин терефнаан райондин агьал-йир Халагъ гъулан агьали, Ватандин Аьхю дявдин иштиракчи Гьясан Ражабовди тебрик гъапIнийи.

«Ватандин Аьхю дявдин кьяляхъ йисари Советарин уьлкейин халкьдин мелзниин алидар гьаму гафар вуйи: «Анжагъ дяви дарибшри». Ав, думу йисари дурарин улхбар анжагъ дявдикан, хъана дяви ккебгъиш, чпиз алахьру читинваларикан, чпин веледарин, багахьлуйирин, гьадму гьисабнаан уьлкейинра, гележегдикан шуйи. Пуз ккундузузки, гъи ихь арайиъ Ватандин Аьхю дявдин читинвалар гъяркъю инсанар цIибтIан имдар. Хъа дявдин иштиракчйир лапра цIиб духьна. Дурар имдар кIури, дурарин гьунарар тарихнаъ гъузна, дурарин багахьлуйириз дявдин иштиракчйири дявдиъ улупу гьунарарикан, далу терефнаъ гъилихдарин фидакарвалин зегьметнакан ужуди аьгъя. Ухьуз аьгъюганси, фунуб девриъра, инсанариз дявдихьан гучI’вал, къурхулувал ади шулу. Ватандин Аьхю дяви ккудубкIну, цци 76 йис тамам хьувал къайд апIура. Думу дявдин чIивиди имбу иштиракчйирихъди гюрюшар кIули гъягъюра, дурарин гьунарарикан ктибтура, бикIура.

Гьюрматлу ватанагьлийир! Учву улубкьнайи Гъалибвалин Йигъахъди тебрик апIури, учвуз мюгькам сагъ’вал, уьмриъ хушбахтвал ккун апIураза. Гъит дюн’яйиъ гьарган ислягьвал ва халкьарин арайиъ мясляаьт ади ишри!» – гъапнийи ветеранди.

Шадлугънан серенжемдиъ гьацира Республикайин военный комиссариатдин Табасаран райондиъ айи отделин начальник, подполковник Садикь Мурадялиев, Дагъустандин ва РФ-дин лайикьлу духтир, Табасаран райондин яшлуйирин советдин председатель Мирзамягьямед Ханмягьямедовра удубчIвну гъулхнийи. Дурари дявдин женгариъ гьунарар улупу игитар кIваин уьрхювал, дурарикан насларизра ктибтувал чIвиди имбу гьарсар касдин буржи вуйивал къайд гъапIнийи.

Хъасин Хючнаарин сабпи нумрайин лицейдиъ урхурайидари серенжемдиъ «Кьар-нийир» кIуру музыкайин композиция улупнийи, гимназияйиъ урхурайи баяр-шубари дявдин йисариз тялукь вуйи шиърар гъурхнийи.

Митингдиъ гьацира 12-пи майдиъ армияйиз гъягъюрайи призывникарира кьабидарин эстафета кьабул гъапIнийи. Дурари, Ватан уьбхбаъ аьхю зегьмет зигидича, кьабидарин зегьмет зяя апIидарча кIури, гаф тувну.

Митингдин кьяляхъ Хючнаъ Кьалухъ Мирзайин ядигарин гъвалахъ хъайи майдандиин райондин культурайин управлениейин гъуллугъчйири аьхю концерт улупну.
Дидланра савайи, му йигъаз тялукь вуди, райондиъ саб хайлин спортдин серенжемарра кIули гъушну.

Хив райондиъ

 

Гъалибвалин Йигъан Хив райондин агьалйири Ватандин азадвал бадали женгнан майднариъ чпин уьмрар фида гъапIу игитарин гьюрмат уьбхбан серенжемариинди Урусатдиъ кIули гъубху «Аьжалсуз полк» акцияйин тереф гъюбхну.

Машкврин шадлугъариъ муниципалитетдин глава Ярмет Ярметов, райондин яшлуйирин советдин председатель Тажудин Мурадханов, дявдин далу терефнан зегьметкешар, мектебариъ урхурайи баяр-шубар, райондин гъуларин вакилар иштирак гъахьнийи.

Ватандин Аьхю дявдиъ гъийиху райондин агьалйирин гьюрматназ Гъалибвалин паркдиъ дивнайи «Лизи кьарнийир» ядигарихъ кюкйир дивбан кьяляхъ, райондин культурайин центрин улихь митинг кIули гъубшну.

Мярака ачмиш гъапIу райондин глава Ярмет Ярметовди гьарсар кас гьаму Аьхю Гъалибвалин машкврихъди тебрик гъапIну.

«Гъалибвалин Йигъ – ихь уьлкейин тарихнаъ, гьарсаб хизандин уьмриъ кIваълан дурубшру шадвална пашманвал гъибикьнайи машкврин йигъ ву. Ухьу мициб сабвалиинди кьувватлу вуйивал жара гьич саб машкврира гьисс апIуз мумкинвал туврадар.

Ватандин Аьхю Гъалибвал бадали анжагъ саб Хив райондиан дявдин женгариз 1800-тIан артухъ жигьилар гъушну. Дурарикан хайлиндар, дявдин женгариъ заан гьунарар улупну, жюрбежюр орденариз ва медалариз лайикьлу гъахьну.

Ватандин Аьхю дяви – му ихь уьмуми хажалат, хъа Аьхю Гъалибвал – ихь халкьдин уьмуми шадвал ву.

Гъи, 76 йис гъябгъбалан кьяляхъ, ухьу гьарсар касдин игитвализ гьюрмат апIурахьа. Дявдин женгариан кьяляхъ дарфи, фашистарин лагерариъ истисмариан гъийиху, гаш’валиан ва зийнариан гъийиху, Ватандин азадвал бадали чпин жанар фида гъапIу, агьалйирин ихтиярар гъюрхю гьарсар кас кIваин апIурахьа. Гьарсар ватанагьли му азадвалин ва акувалин машкврихъди тебрик апIури, дурариз ислягь ва хушбахтлу уьмур, мюгькам сагъ’вал ккун апIураза», – гъапну Я.Ярметовди.
Райондин жямяаьтлугъ машкврихъди тебрик апIури, мяракайиин райондин дявдин комиссар Пирмягьмад Къубачев, яшлуйирин советдин кIулиъ айи Тажудин Мурадханов ва жарадар удучIвну гъулхнийи.

Машквран мярака райондин культурайин вакиларинна урхурайидарин кьувватариинди гьязур дапIнайи концертди лапра маракьлуди гъабхуз мумкинвал тувну.