9-пи майдиъ, вари Урусатдиъси, Дагъустан Республикайиъра Ватандин Аьхю дявдиъ Гъалибвал гъадабгъну 76 йис хьувал аьхю шадлугъариинди къайд гъапIну. Машквар къайд апIбан асас серенжем – военный парад – Каспийск шагьриъ кIули гъубшну. Дидиъ вахтназ вуди Дагъустандин Главайин вазифйир кIулиз адагъурайи Сергей Меликовра иштирак гъахьнийи.
Гьяйифки, мялум вуйи себебариан, параддиз лигуз ккуни вари тамашичйирихьан дидиъ иштирак’вал апIуз гъабхьундайи. Амма му аьгьвалатну, дявдин техникара жалб дапIну, му важиблу йигъ шадлугъниинди къайд апIуз манигъ’вал гъапIундайи.
Советарин халкьди Ватандин Аьхю дявдиъ улупу гьунарар кIваин апIуз, игитарин гьюрмат уьбхюз ва гьацира Урусатдин гъийин деврин яракьлу кьувватарин мумкинвалариз лигуз му йигъан Каспийскдин кьялан майдандиина шагьрин хайлин агьалйир уч гъахьнийи. Машкврин серенжемарин гьюрматлу хяларин арайиъ Ватандин Аьхю дявдин ветеранарра айи. Хъа дурарин улихь гвачIниан мина параддиъ иштирак шулайи эскрарин дестйир дийигънайи.
Каспийскдиъ Гъалибвалин парад Уьру пайдгъин Каспийин флотилияйин офицерарин дестейи ачмиш гъапIнийи. Урусатдин Федерацияйин пайдагъ ва Гъалибвалин Пайдагъ адагъбан гьюрматлу ихтияр гьадрариз тувнайи. Параддиъ кьушмариз буйругъар туврайир Мягьячгъалайин гарнизондин Каспийин флотилияйин командующийин заместитель контр-адмирал Сергей Екимов вуйи. Хъа парад Каспийин флотилияйин командующий контр-адмирал Александр Пешковди кьабул апIурайи.
Гьаму вахтна шагьрин кьялан майдандиин дивнайи аьхю экрандиан мина прямой эфириъди Урусатдин меркездиъ кIули гъягъюрайи серенжемар улупурайи: ихь гьюкуматдин агьалйир майдин машкврихъди мубарак апIури, РФ-дин Президент Владимир Путин удучIвну улхурайи.
Гъийихдарин гьюрмат уьбхюри, саб дакьикьайиъ ккебехъну дийигъбалан кьяляхъ, дагъустанлуйир эгьемиятлу гьядисайихъди Сергей Меликовдира мубарак гъапIнийи.
«Гьюрматлу Ватандин Аьхю дявдин ветеранар, далу терефнан зегьметкешар, гьюрматлу хялар, юлдаш эскрар ва матросар, офицерар, генералар ва адмиралар, учву Гъалибвалин Йигъахъди мубарак апIураза! Му ихь уьлкейиз, Урусатдин гьарсаб хизандиз чаъ кIваантIан вуйи шадвал, ктIубшвуз даршлу ад ва аьхир адру дерд кидикьнайи зурба машквар ву.
Гъи му машкврин тарихи мяна вахтнакан асиллу дар, хъа ихь адшарин, абйирин ва аьхю абйирин гьунарариз гьякьикьи кьимат тувуз удукьудар. Дурарин ижми кьастназ, дирбаш`вализ ва заан фидакарвализ гюре, ухьуз жвуван жилиин зегьмет зигуз, сагъ-саламатди яшамиш хьуз, милли чIалариинди улхуз, зурба ва азад гьюкуматдиъ веледар аьхю апIуз мумкинвал ахьуз.
Ватандин Аьхю дявдиъ Гъалибвал гъадабгъували вари инсаниятдин гележег тяйин гъапIну. Думу чан зурбавалиинди, рюгьнан мянайиинди тарихнаъ чаз барабар гьядиса адрубси кIваинди гъубзди: ихь адшари, абйири ва аьхю абйири дюн`я нацизмдихьан азад гъапIну, Европа лукIвалихьан, хъа хайлин халкьар – зат имдарди терг апIувалихьан гъюрхну. Гизаф вахтна миллионариинди инсанар чаз ккилибгурайи Гъалибвал улубкьу йигъхъан мина 76 йис гъубшну. Амма му къурхулу дявди гъапIу зийнар гъира кмиди ихь кIваъ гъати иццрушниинди атIагура. Дявдин женгариъ чпин жанар фида гъапIдар, зийнар духьну ва далу терефнаъ гъагъи зегьмет зигбаан гуж дубхьну уьмрихъ мягьрум гъахьидар кIваин апIури, дурарин улихь ихь кIулар ис апIурахьа.
Гьюрматлу ветеранар! Душмнин улихь дурумлуди дийигъбаз, читинвалар аьх апIбаз ва, дугъ`ин гъалибвал гъадабгъну, учуз уьмур, азадвал, ислягьвал багъиш апIбаз учвуз чухсагъул. Ичв уьмур – ватанпересвалин, ватандиз вафалуди гъуллугъ апIбан чешне ву.
Гьюрматлу гъалибчйирин наслар, ичв адшарин, абйирин ва аьхю абйирин гьунарар кIваълан магьаанай ва дурариз лайикьлударди гъузай. Игитар-дагъустанлуйир кIвина хури, ихь рес-публикайиъси жара йишвариъра дурариз гюмбтар диврайивалиинди, дурарин ччвурар шагьрариз, кючйириз туврайивалиинди дамагъ апIинай.
Ихь халкьдин зурба игитваликан ухьуз кIваинди имбукьан гагьди, Урусат кьудратлуб ва ккабгъуз даршлуб вуди гъубзди.
Ичв машквар мубарак ибшри! Зурба Гъалибвалин Йигъ мубарак ибшри!» – гъапнийи Сергей Меликовди.
Хъасин военный оркестри РФ-дин гьюкуматдин гимн йивури, артиллерияйин салютарин сес гъабхьнийи. Дидин кьяляхъ пайдгъар хьайи офицерарин десте, гьюрматнан гъаравлиъ айидарин ротайин шубуб взводдикан ибарат вуйи десте (диди шубуб жюрейин яракьлу кьувватар айиваликан мялум апIурайи) ва параддин жергйириъди дийигънайи эскрар шадлугънан маршдиъди майдандилан гъягъюз хъюгънийи. Хялар ва тамашичйир деънайи трибунайин улхьантина параддин жергйириъди Каспийин флотилияйин, гьюлин пияда кьушмарин полкнан, штун зиълан гъягъру дявдин гимйирин бригадайин, 58-пи Армияйин жаради вуйи мотострелковый бригадайин, сяргьятар уьрхюрайи кьушмарин, милли гвардияйин федералин гъуллугънан кьушмарин эскрар, УМВД-йин, МЧС-дин гъуллугъчйир, ва гьацира юнармейцйир, военный оркестр ва яракьлу кьувватариъ гъуллугъ апIурайи дишагьлийир гъушнийи.
Параддин механизированный колоннайин дахилнаъди «Тигр» бронеавтомобилар, сатIиди цIа йивру «Град-М» реактивный гъурулушар, БТР-82А бронетранспортёрар, миномётдин «Сани» гъурулушар али «Урал» автомобилар ва 122 миллиметрин гаубицйир Д-30, «Бал» ракетйирин комплексдин гьюлин гъирагъдихъан ракетйир йивру гъурулушар гъушнийи.
Параддин шадлугънан пайнан кьяляхъ, гьаму вари техника дидиз лигуз шлу майдандиин дебккнийи, ва юкIв хъайи гьарсар касдиз му яракьдин фициб-вушра жюрейихъди таниш хьуз мумкинвал тувнийи.
