Гьюрматлу чвйир ва чйир!

Ичв улубкьурайи Гирами машквар – Ураза-байрам мубарак ибшри!

 

Гьаму ужувлан Рамазандин ваз аьхирихъна гъюри, ухьу думу машквар аьхю шадвалиинди кьабул апIуз гьязур шулахьа, хъа, гьаддихъди сабси, пашманра дархьиди гъузуз шулдар: му кьадар ужувлан ляхнар, сатIиди уч духьну ушв гьибтувализ бахш вуйи серенжемар, таравих-гъудгнар, кIваантIан тувру закат йисандин арайиъ саб ражари – Рамазандин вазлитIан шулдар.

Рамазандин ваз – ужувлан ляхнар кIули гъахру, харжи гъиллигъар ярхла апIру ваз ву. Рамазандин вазли ихь ватанагьлийириз касибвал кайи хизанариз, йитим ва сакьат бицIидариз, хъайивал апIру кас адру кьабидариз кюмек тувуз, уьмрин рякъюъ деету гъалатIариин швумал хьуз мумкинвал тувну. Эгер гьаму вазлин арайиъ учву, харжи рякълан улдучIвну, дюз рякъюхъна гъафнуш, арайиъ гирнар духьну, сар-сарихьан ярхла духьнайи чвйир, чйир, багахьлуйир хъана багахь гъахьнуш, учвуз аферин. Гьамусдихъан тинара учву кIваъ рягьим ади, дугъри гъуншивалин ужудар ниятар ади яшамиш шул кIури, умуд киврача.

Аьзиз мусурман чвйир ва чйир! Ушварин машквриз бахш вуди ичв хизанариз, багахьлуйириз, хъа гизафси бицIидариз пешкешар масу гъадагъну, дурарихьди машкврин шадвал гьисс апIуз гъитай. Ичв гъидису ушвар, гъапIу гъудгнар, дюъйир Аллагьди кьабул апIри, Аллагьди рягьим апIри, иман мюгькам апIри, бахтавар уьмур, ужувлан ляхнар апIуз сагъ’вал туври.

 

Газатдин редакцияйи коллектив