Майдин 31-пи йигъан Мягьячгъалайин «Дуствалин Хулаъ», ДАССР-рин 100 йис хьпаз бахш вуди, Дагъустан Республикайин милли политикайин ва диндин ляхнариз лигру министерствойин кюмекниинди республикайин дишагьлийирин Союзди тешкил дапIнайи форум «Ихь кьувват – сабвалиъ, ихь девлет – жюрбежюрвалиъ» девиздиккди кIули гъубшну.
Му серенжемдиъ иштирак хьуз, республикайин вари муниципалитетарианси, гъунши регионарианра дишагьлийир дуфнайи. Форумдин асас пай ккебгъайиз улихьна ВГТРК «Дагъустан» телеканали гьязур дапIнайи, республикайин улихь-кIулихь гъуллугъариъ гъилиху ва жямяаьтлугъ ляхнар тамам апIури гъахьи дишагьлийирикан фильм улупнийи.
Серенжемдин асас пай Дербент шагьрин ДДЮТ-дин «Шаду бицIивал» мяълийир апIру студияйиъ урхурайи сакьат риш Ирада Хановайи мяъли апIбиинди ккебгънийи. Ирада сягьнайиин илмиди, республикайин дишагьлийирин Союздин председатель Интизар Мамутаевайи дугъаз чухсагъул мялум апIбан кагъазна пулин дакьатар, хъа дугъан дада Светлана Хановайиз, гизаф бицIидар айи дадайизси, дишагьлийирин Союздин медаль тувнийи.
Форумдиз дуфнайи РД-йин милли политикайин ва диндин ляхнариз лигру министр Энрик Муслимовди, Дагъустандин артмиш’валик пай киву дишагьлийирин кьадар аьхюб вуйивал, дурари республикайин халкьарин рюгьнанна эдеблувалин усулар артмиш апIбаъ, аьдатар уьрхбаъ аьхю роль уйнамиш апIури гъахьивал къайд гъапIнийи.
«Ватандин Аьхю дявдин вахтарира дишагьлийири жиларихъди сабси дявдиъси, далу терефнаанра зегьмет зигури гъахьну.
Гьаци, Дагъустандин дишагьлийири 1990-пи йисари ихь республикайиин гъачгъар алархьиганра, чпин жиларихъди, баярихъди, чвйирихъди сатIиди Ватан, хал-хизан уьбхбан бадали, хайлин зегьмет гъизигну. Гъира ихь дишагьлийири чпин гъюнариина аьх апIуз даршлу гъагъ гъадабгъура. Фицики гьамусяаьтра дишагьлийири, хулан ляхинси, чIатан ляхинра, политикайинна жямяаьтлугъдинси, варитIан жавабдар ляхин – насил, культура, чIал ва тарих уьрхюри, тербияламиш апIбан ляхинра тамам апIура», – гъапнийи министри.
Сягьнайиина удучIву Интизар Мамутаевайира министрин гафариз кьувват тувнийи.
«Республика артмиш апIбан рякъюъ Дагъустандин дишагьлийири аьхю ва машгьур ляхин гъубхну. Гьарсаб гъюрайи насил дурарихьна гьюрмат ади тербияламиш апIувал лазим ву. Учуз ихь республикайиинди дамагъ апIуз шлу, Дагъустандин дишагьлийирикан вуйи энциклопедия гьязур апIуз ккундачуз», – къайд гъапну чан улхбаъ И. Мамутаевайи.
Форумдин дахилнаъди республикайин хайлин машгьур дишагьлийир сягьнайилан гъулхнийи. Дурарикан гьарури чан уьмрин рякъкан, чаз алахьу читинваларикан ктибтнийи.
Форумдин асас пай аьхирихъна гъюблан кьяляхъ, Мягьячгъалайин Кьялан майдандиин ягълухъарин фестиваль гъабхьну. Думу фестивалиъ дишагьлийири, Дагъустандин халкьарин улихьдин вахтарин ягълухъар хъахьну, тамашичйир гьарсаб ягълухъин тарихнахъди таниш апIурайи. Кюкдин багъси рябкъюрайи, швнуб-саб жюрейин уткан ягълухъариинди дабалгнайи Мягьячгъалайин Кьялан майдандиин тешкил гъапIу фестиваль «Лезгинка» ансамблин ялхъвнариинди аьхирихъна гъафнийи.
