Гьюлихъ жикIру вахт улубкьна. Гьар йисан июндин вазлиъ туристар, отпускдиъ айидар, мектебдин тятIилариз удучIвнайи баяр-шубар ва чпиз рягьятвал гъадабгъуз ккуни хайлин инсанар Дербент шагьриъ гьюлин гъирагъдихъ жикIуз гьязур дапIнайи йишвариз гъюз гьяракатнаъ шулу.

 

Аммаки саспи вахтари му ляхнихъди аьлакьалу месела читинди алабхъуру. Наан жикIуз мумкинвал а, хъа наан гьюлик жикIуз ихтияр адар? – гьамцдар месэлйириз лигру идарйир айивал ухьуз аьхю кюмек ву.
Улихьна йигъари, му темайиан жюрбежюр суаларра хьади, узу Урусатдин Дагъустан Республикайиъ айи МЧС-дин Дербент шагьрин ва Дербент райондин ГИМС-дин ГУ-йин кIулиъ айи Мирзабег Гьясанбеговдихьна илтIикIунза.

– Мирзабег Рамазанович, гьюлик жикIру вахт фила ккебгъру?

– Ужуб суал ву, инсанариз ухьу гьаммишан баян апIури ккунду: жвуваз ккун гъабхьи вахтна гьюлихъна жикIуз гъягъюб дюз дар. Цци гьюлихъ жикIру нубатнан вахт 1-пи июндихъан мина ву – гьюлин штун манишин 18-19 градус, хъа гьавайин манишин – 20-25 градус дубхьну ккунду. Хъа 20-пи авгъустихъан мина гьюлин штук жикIуз хатIалу вахт ву. Думу вахтна ич идарайин гъуллугъчйири, гюзчивал гъабхури, инсанарихьди гьюлик жикIуз гъитурдар. Гьадму штунра чахьна инсан зигру вахт айиб ву, ва ухьура ихтиятвал дапIну ккунду. Саспи касар, фу шулухъа дупну, гьюлин лазим дару йишварихъ жикIуру, гизаф пай жигьилар.

– Хъа Дербентдиъ гьюлин гъирагъдихъ жикIуз дюзмиш дапIнайи швнуб йишв гьязурди а?

– Гьелелиг гьюлихъ жикIуз вуйи йишвар гьязур дапIну адарча. Хъа гьякьлуди кIуруш, гизаф пай гьюлин гъирагъдихъ дюзмиш дапIнайи уткан, рягьятвал гъадабгъру асас йишвар 4 а, ва дурара инсанарин хусусиятнаъ айидар ву: «Чайка – 1», «Чайка – 2», «Бриз» ва «Дербент». Му рягьятвал гъадабгъру асас йишвар гьязурди вуш-дарш ич идарайи гюзчивал гъабхуру, ва дурар лазим вуйи саягъниинди дюзмиш дапIнаш ахтармиш апIбан кьяляхътIан, душвариъ жикIуз ихтияр туврадарча. Мисалназ, учу сабпи нубатнаъди гьюлин гъирагъдихъ дюзмиш дапIнайи йишвариъ марццишин уьбхбаан медицинайин тялукь серенжемар духнаш, ахтармиш апIурача, гьюлин гъум фу саягъниинди гьязур вуш ва палтар дигиш апIру кабинйир дюзмиш дапIнаш, лигурча.
Ич ГИМС-дин идарайин гъуллугъчйири инсанар жикIру йишвар гьязур вуйиваликан мялумат тувбахъантIан, думу рягьятвал гъадабгъру асас йишвар арццуз ихтияр адар.

– Гъубшу 2020-пи йис ичв идарайин гъуллугъчйириз фициб гъабхьну? Йисандин арайиъ гьюликк ккахьу инсанарин кьадар фукьан вуди шулу?

– Дюзди гъапиш, гъубшу йис ич ляхнин гъуллугъчйириз архаинуб гъабхьну. Коронавирусдин тIягъвни гъубшу йисан инсанариз гьюлихъна гъягъюз ва рягьятвал гъадабгъуз мумкинвал тувундар. Ццира учу думу рягьятвал гъадабгъру асас йишвариз вакцинайин руб дивну адру касар деетударча. Ич идарайин гъуллугъчйир ва гьюлихъ рягьятвал гъадабгъру йишварин эйсйир, гюзчивал гъабхури, инсанарин сагъ’вал уьбхюз чалишмиш шула.
Цци ухьуз туристарин кьадарра артухъ дубхьна. Му ляхнар вари учу гюзчиваликкна гъадагъурча ва ахтармиш апIурча.
Хъа гъубшу йисан гьюлин штукк ккахъур сар кас ву.

– ГИМС-дин идарайиъ швнур касди ляхин апIура? ХатIалу дюшюш гъабхьиш, наана ва шлиз зенг дапIну ккунду?

– Ич йидарайиъ 8 касди ляхин апIура. Дурар вари заан пишекрар ву, ва чпи апIурайи ляхнихьна жавабдарвалиинди янашмиш шула.
Гьюлин штукк ккахъу вахтна ва гьацира жарара хатIалу дюшюш гъабхьиш – 112 нумрайиз зенг дапIну ккунду.
МучIу вахтна штун багахьна душну ккундар, яманди лепйир хъайи вахт шулу, думуган гьюлин гъирагъдихьан ярхлариз лепе йивуб хатIалу ву, арагъи дубхъну гьюлик кучIвну ккундар. Варидариз Аллагь кюмек ишри, хъа жвувура ихтиятвал дапIну ккунду.