Гьар йисан хьадан вахтна рягьятвал гъадабгъру йишвариъ штун багахь асас вуди бицIидарихъди аьлакьалу хатIалу дюшюшар арайиз гъюри шулу. Урусатдин силисчивалин комитетди ватандашарикан бицIидар штун багахь хьайи вахтна хатIасузвалин къайдйир уьрхювал ккун апIура.

 

 

Урусатдин СК-йин мялуматарин гъуллугънаан туврайи хабрариинди, РФ-дин субъектариъ хьадан тятIиларин вахтна бицIидар штук ккахьувалин дюшюшар йислан-йисаз артухъ шула. Силисчивалин комитетдин председатели идарайин гъуллугъчйирикан гьаммишан набалугъарихъан жавабдарвал гъабхурайидарин, бедбахтвалин вари себебарин гьякьнаан хъайи-хъайиси мялуматар гъадагъувал тIалаб апIура.

Идарайиан къайд апIу-райиси, бязи бедбахтвалин дюшюшар хьадну рягьятвал гъадабгъру йишвар лазим вуйиганси тешкил дапIну адрувалиан, аьхюдарин вижнасузвалиан арайиз гъюру.

Силисчивалин комитетди кIваина хура: шид айи йишв – нир, дагар, гьюл – хатIалу йишвар ву. Дицдар йишварихь бицIидар аьхюдарин гюзчиваликк ккадарди гъитну ккундар. БицIидариз гьюлин, дагрин, нирин жикIуз ихтияр адру гъирагъарихъ штук кучIвуз къадагъа апIинай. «ХатIасузвалин къайдйир уьрхювали бедбахтвалихьан ярхла апIуру», – дупна СКР-ин агьалйирихьна вуйи илтIикIбаъ.