15-пи июндиъ Урусатдин премьер-министр Михаил Мишустинди Пятигорск шагьриъ Кафари Кавказдин федералин округдин яшайишдинна экономикайин артмиш’валин месэлйириз лигру Правительствойин комиссияйин членарихъди совещание кIули гъубхну. Серенжемдиъ вахтназ вуди Дагъустандин Главайин вазифйир тамам апIурайи Сергей Меликовра иштирак гъахьну. Совещаниейин иштиракчйири округдин регионарин жюрбежюр циркларин артмиш’валин важиблу месэлйир гьял гъапIну.
Серенжем ккудубкIбалан кьяляхъ, Сергей Меликовди совещаниейиъ гъитIиркку месэлйирикан чан фикрар ачухъ гъапIну.
Дугъу сифте, Михаил Мишустин Дагъустандиз гъафи вахтна за гъапIу вари месэлйир арайиз адагъбаз лигну, уьлкейин премьер-министриз чухсагъул мялум гъапIнийи. «Ухьу ихь улихь дивнайи – аьтрафар штухъди тямин апIбан, убгрубдинна экономикайин комплексдин, туризм артмиш апIувалин, яшайишдинна экономикайин артмиш’валин ва гьацдар жара месэлйирин федералин гьюкмарра гъавриъ а, кюмек тувузра гьязур ву. Къайд апIуз ккундузузки, ухьу уьмриз кечирмиш апIурайи, амма федералин гъурулушарин кюмек дарди кIулиз адабгъуз лап читинди вуйи, ихь агропромышленный комплекс артмиш апIбан программайизра кюмек тувбанди ву.
Совещаниейиъ арайиз адагъу вари теклифар вахтниинди тамам дапIну ккунду, хъа РФ-дин Правительствойин председатели асас министерствйирикан совещаниейиъ гъитIиркку месэлйир уьмриз кечирмиш апIру вахт улупувал ккун гъапIнийи. Ухьуз лапра важиблу вуйи месэла – вари СКФО-йинси ихь региондинра артмиш апIбан экономикайин чешне арайиз хувал гъабхьну», – гъапну Сергей Меликовди. Дугъу къайд гъапIганси, гъийин йигъаз артмиш’валин чешне адру региондиъ думу жикъи вахтнан арайиъ уьмриз кечирмиш апIуз хьибдар, региондиъ хъайи-хъайиси 2030-пи йисазкьан ляхин гъабхиди. Гьаддихъди сабси Дагъустандин артмиш’валин стратегияйихьнара гъиди.
Сергей Меликовди РФ-дин сагъламвал уьбхбан министерствойин кIулиъ айи Михаил Мурашкойин удучIвну улхбаканра чан фикрар ачухъ гъапIну.
«Урусатдин сагъламвал уьбхбан министри къайд гъапIганси, уьлкейин вари регионариъ коронавирусдин инфекция тарабгъувалин улупбар за духьна. Гьяракатнан штабарин заседанйириъ кьабул апIурайи тIалабар тамам апIувал ккун апIури, варидарихьна илтIикIуз ккундузуз. Думу тIалабар инсанари апIурайи ляхнариз къадагъа дивбан бадали кьабул апIурайидар дар, дурар, мугъаятвал уьбхювал ккун апIури, кьабул апIурайидар ву. Коронавирус тарабгъурайивалин анализ дапIну, уьлкейин жара регионариъра гьадму жюрейин къайдйир уьрхюра»,
– гъапну Дагъустандин кIулиъ айири.
