Аьхиримжи йисари табасаран спортсменари спортдин жюрбежюр жюрйириъ гъадагъурайи хъуркьуваларикан кми-кмиди ебхьури шулухьуз. Дурарин хъуркьуваларикан учу гьаммишан ихь газатдин машариъра макьалйир чап апIури шулча.
Гьацдар спортсменарикан сар учвуз гьаму шиклиъ рякъюрайи Малик Рамазановра (шиклиъ) ву. Думу 2008-пи йисан Дагъустандин Огни шагьриъ Рамазановарин хизандиъ бабкан гъахьну. Гъи Малик чан абайихъдина бабахъди Москва шагьриъ дуланмиш шула.
Гьеле бицIидимиди Малик спортдиин юкIв алир вуйи. Аьхиримжи 3 йисандин арайиъ думу Москвайин областдин Солнечногорск шагьрин «Лунево» футболистарин командайиъ вратарь ву. Гьар йисан хьадну мектебдин тятIиларин вахт улубкьубси, Малик саб бицIи муддатназ Дагъ. Огни шагьриъ яшамиш шулайи мирас-варисдиин улукьуз гъюри шулу. Нубатнан ражари багъри шагьриз дуфнайи жигьил футболистдихъди узу гюрюшмиш гъахьунза ва дугъахъди сюгьбат гъубхунза.
– Малик, сабпи рякъюъ уву футбол апIувалихьна фици гъафнуш, ктибтуб ккун апIураза.
– Узуз гьеле бицIиди имиди футболиин машгъул вуйза. Хъа йиз адаш Ризван Кьасумовичди, йиз маракьариз аьхю фикир туври, футболихьна вуйи йиз бажаранвал ачухъ апIуз кюмек тувнийи. Учу яшамиш шулайи Солнечногорск шагьрин гъирагъдихъ саб бицIи, уччву, табиаьтди албагнайи саб жюрейин гьарарин яркур хьа. Адашди, чаз ляхнихьан мажал гъабхьибси, йиз аьхюну чве Имамра хъади, учу гьаммишан дина гъахури, узухъди футбол апIуйи. СацIиб вахтналан хъана гужалди футболиин машгъул духьну, узу «Лунево» футболин командайин вакил гъахьунза ва гъийин йигъазкьан думу командайин дахилнаъди футболиан жюрбежюр талитариъ иштирак шулаза.
– Мектебдиъ урхузра, футбол уйнамиш апIузра фици хъуркьраву?
– Гьербе, жвуми, элгьет йигъари учу ич командайихъди Лобня кIуру шагьриъ бицIидаринна живанарин спортдин мектебдиз гъягъюрча, хъа хамис, талат, султ йигъари Лунёво посёлокдиъ тренировкйириз гъягъюри шулча.
– Уву футболиин маракьлу духьнайиваликан яв дарсариз манигъ’вал айин? Уву урхурайи мектебдин мялимарин увухьна вуйи янашмиш’вал фициб ву?
– Узу футболистарин командайин дахилнаъди спортдин жюрбежюр талитариъ иштирак шулайивализ лигну, мектебдин мялимарин узухъди ужудар рафтар а. Дарсар ужуди урхураза, хъа узуз читинвал кайи вахтна, мектебдин терефнаанра узухьинди хил гьачIабккура. Саб дарскьан ккидидипди, гвачIнинган мектебдиз йиз дарсариз душну, хъа лисхъан хябяхъдизкьан ич командайихъди тренировкйириъ шулза.
Арабир учу футболиан жюрбежюр талитариз жара шагьрариз гъягъруган, мектебдиан ихтияр туври шулиз.
– Фуну шагьрариъ ва районариъ футболин талитариъ иштирак гъахьунва?
– Москва шагьриъ 146 район а. Вари кIурдарза, хъа хайлин йишвариъ, мисал вуди, Дубна, Талдом, Ивантеевка, Подольск, Одинцово, Люберцы, Балашиха, Долгопрудный, Химки, Красногорск, Троицк шагьрариъ, хъа гьацира Волгограддиъ, Камышиндиъ, Анапайиъ, Ивановойиъ жюрбежюр дережйирин футболин талитариъ иштирак гъахьунча.
Асас вуди талитариъ ич командайин йицIисар касди иштирак’вал апIури шулу, хъа шубур кас вратарар вуча. Вратарин ляхин варитIан гизаф жавабдарвал айиб ву, гьаз гъапиш саспи дюшюшариъ увкан жвуван команда гъалиб хьувал асиллу шулу. Гьарсаб турнир ужуб тешкиллувалиинди ва маракьлуди кIули гъябгъюри шулич. Уву спортдин фунуб жюрейиин машгъул духьнашра, дидихьна заан жавабдарвалиинди янашмиш духьну ккунду. Малик Рамазанов, 7-пи класс ккудубкIну, 8-пи классдиз удучIвнайи яшнан бай вушра, дугъу футбол апIбаъ аьхю хъуркьувалар гъадагъна. Думу гизаф гьюрматнан грамотйирин ва медаларин сагьиб ву. Магьа улихьнаси дугъан абйир-бабариз Лобня шагьрин «Лунево» футболистарин командийн тренер Максим Бровкиндихьан чухсагъул мялум апIбан кагъаз гъафну.
«Гьюрматлу Ризван Кьасумович ва Эльмира Седрединовна, мицир ужур, жавабдарвал кайи, гьякьлу бай вердиш апIбаз учвуз аьхю чухсагъул. Ичв бали Малик Рамазановди узухь футбол уйнамиш апIуз аьгъю апIури, хайлин йисар ву. Ва гъи дугъу узу чахъди гъубху ляхнин ужудар натижйир улупура. Футболиъ варитIан жавабдарвалинуб вратарвалин ляхин ву. Йиз фикриан, Маликдин уьмриъ чан варитIан кIваан вуйи хиялар гележегдиъ кIулиз удучIвиди. Футбол уйнамиш апIувалихъ гизаф юкIв хъади, гьарсаб йиз нясигьятназ заан фикир туври, думу чан ляхин дюзди апIуз чалишмиш шулу. Гъи Малик йиз футболин командайиъ кIакIначи ву.
Мялум вуйиганси, Дагъустан Республика спортдин жюрбежюр жюрйириан заан хъуркьувалар улупу спортсменар айивалиинди машгьур ву. Маликди спортдин думу аьдатар давам апIур кIури, фикир вуйиз.
Гъи ич командайиъ Малик айивал учуз аьхю кюмек вучуз. Ва йиз терефнаан Малик Рамазановдиз спортдин рякъюъ заан хъуркьувалар, жандин мюгькам сагъ’вал ккун апIураза», – дупна думу кагъзиъ.
Гъит Маликдиз чав кадабгънайи спортдин рякъюъ аьхю хъуркьувалар ишри.