Учу газатдин машариъ улихьна мялум гъапIганси, ЕГЭ-йин асас пай аьхирихъна гъафну. Бязи предметариан натижйирра ашкар духьна. Рази хьуз ляхин а.
Табасаран райондиъ ЕГЭ-йин кампания фици кIули гъубшнуш ахтармиш апIури, Табасаран райондин образованиейин управлениейин начальник Аьбдусалам Гьясановдихьна илтIикIунча.

 

«ЕГЭ-йиан натижйир харжидар дар. Райондиъ сабпи ражари вуди урус чIалнаан имтигьян 100 баллиз туву выпускникра а. Думу Хянягъ гъулан мектеб ккудубкIу Насир Аьбдулгьялимов (шиклиъ) ву.

Гъи гвачIнинган узу улихьна йисарин ЕГЭ-йин натижйириз гъилигнийза. Хъади-хъади 3-4 йис мидиз улихьна хайлин выпускникари имтигьнариан 98 балл гъадагъури гъахьну. Аьхирки, ухьхьанра 100 балл гъазанмиш гъапIу жигьилиинди дамагъ апIуз шулу. Хъа Насир Аьбдулгьялимовдилан гъайри, урус чIал хайлин выпускникари заан баллариз тувна: 29 касди – 80-рилан 90-риина балл, 13 касди – 90 ва артухъ баллар гъадагъну», – къайд гъапIну Аьбдусалам Гьясановди.

Учу Табасаран райондиъ урус чIалнаан 100 балл гъадагъу Насир Аьбдулгьялимовдихъдира сюгьбат гъубхунча. Дугъан гафариинди, ЕГЭ-йихьна думу бинайиан гьязур шули гъахьну ва дугъан чан хъуркьуваларик умуд кайи.

– ИкибаштIан, узу лап разиди аза. Рази дархьиди фици гъузру? Дишди гъапиш, узу имтигьнихьна гьязур духьнайза ва гьаму натижайиз ккилигурайза. Урус чIал узуз сабпи классдиан мина кьабулди вузуз ва йиз аьгъюваларик миж кади гъабхьнийиз. Имтигьнихьна гьар йигъан гьязур шули гъахьунза ва рягьятвал гъадабгъбазра вахт гьяйиф апIудайза. Узуз имтигьнихьна гьязур хьуз аьхю кюмек гъапIу Хянягъ гъулан мектебдиъ урус чIал киврайи мялим Арсен Шябанович Рамазановдиз аьхю чухсагъул пуз ккундузуз. Медицинайин институтдик урхуз кучIвуз документар тувуз ният айиз. Жигьилариз ва гележегдин выпускникариз имтигьнарихьан гучI дарапIбан теклиф апIураза. Аьгъювалар гъадагъуз ва рягьятвализ вахт ва кьувват гьяйиф мапIанай. Хъугъай, ккун гъабхьиш, вари удукьуру, – ачухъ апIура чан хъуркьувалин сир Насири.