Июндин 30-пи йигъан Урусатдин Президент Владимир Путинди 18-пи ражари прямой эфириъ уьлкейин агьалйирин суалариз жавабар тувну. Гьаму ражари, коронавирусдин уьзур тарабгъувалихъди читин аьгьвалат арайиз дуфнайивализ лигну, Президент дуснайи йишваъ журналистар адайи.
Владимир Путинди 3 сяаьтна 42 дакьикьайиъ, гьадму вахтназ дуфнайи саки 2,2 миллион суаларикан, ватандашарин 68 суалназ жавабар тувну.
ВаритIан гизаф суалар коронавирусдихъди аькси женг гъабхбаз ва вакцинайин рубар йивбаз, кьиматар за хьувализ ва яшайишдин гьякъйир тувувализ бахш дапIнайи.
«Узу варидари чарасуз вуди вакцинайин рубар йивбан тереф дибиснадарза. Ихь уьлкейиъ чарасуз вуди дапIну ккуни прививкйирин календарь а. Коронавирусдиз аькси руб йивувалра гьадму календариз гъадабгъбан теклифар гъахьнийи. Хъа, эгер уьзур тарабгъувалин аьгьвалат лап гъагъиб гъабхьиш, регионарин санитарвалин аьхюну духтрарин теклифниинди, регионарин кIулиъ айидариз вакцинайин рубар йивувал чарасуз лазим вуйи ляхинси кьабул апIуз ихтияр шулу. ТIягъюн тарабгъувал вакцинацияйихьантIан дебккуз хьибдар. Ухьуз 4 вакцина ахьуз, дурар хатIасуздар ва мянфяаьтлудар ву»,
— къайд гъапIну уьлкейин кIулиъ айи Владимир Путинди ва чав «СПУТНИК-V» вакцинайин руб гъивуваликан гъапну.
Ватандашарин суалариз жавабар туври, уьлкейин кIулиъ айири Урусатдиъ мал-къара уьбхювалиин налог илипбанди даруваликан мялум гъапIнийи.
Владимир Путин Урусатдиъ ипIру-убхъру сурсатарин кьиматар за хьувал вари дюн’яйиъ гъягъюрайи гьяракатарикан асиллу шулайивал къайд гъапIнийи. Уьлкейин айитI вуйи туризмдин кьиматар заандар вуйиваликан улхури, думу ляхин гизаф уьлкйирин сяргьятар хъяркьнайивалихъди аьлакьалу гъапIнийи.
«Инсанариз жара уьлкйириз гъягъюз гучI дубхьна. Думу дюзра ву. Фицики жара уьлкйириъ гьар йигъан къайдйир дигиш апIура. Душваъ аьзарлу гъахьиш, больницайиз гъадагъувалин ляхин лап читинуб ву. Гьаддиз Краснодар крайиз, Крымдиз гъягъювал багьа дубхьна. Рынокдин экономикайин къайда гьациб ву», – гъапну Президентди.
Эфириъ банкдиъ дивнайи пул угърийири икI апIбан месэлара гъитIибккнийи. Владимир Путиндин фикриинди, Центробанкди ва къанун уьбхру органари къанун мюгькам дапIну ккунду. «Яшлу инсанар, ветеранар алдатмиш апIури, тахсиркарвалар апIрудар – ягь-намус дудубгнайи касар ву», – учIрудиси гъапнийи Президентди.
Гележегдиъ чан йишв’ина гъюру касдикан вуйи суалназ В. Путинди гьамци жаваб тувну: «Гьелбетда, вахт гъафиган, йиз фикриинди, гьамциб уткан уьлкейин кIулиъ дийигъуз лайикь вуйи кас узхьан улупуз шул кIури, умуд кивраза».
ЧIатан политикайикан, Великобританияйи ва США-йи Урусатдихъди арйир чIур апIбан гьяракатариканра суалар гъахьнийи. Владимир Путиндин фикриинди, Крымдин райондиъ, Урусатдин сяргьятарилан улдубчIвну, Британияйин эсминец штун аьтрафариина гъювалин дюшюшди аьлам дюн’яйин шубубпи дявдихьна хурдайи. «Ухьу гьадму гими йивну ккипнийишра, уьлкйири дюн’яйин шубубпи дяви ккебгъидайи. Фицики, гьаму жюрейин ляхнар кIули адагъурайидариз дявдиъ чпи гъалиб даршлуваликан аьгъя. Ухьура гьадму ляхникан шад хьидайхьа, хъа ухьуз ухьу фу бадали женг гъабхураш аьгъяхьуз: ухьу ихь аьтрафариин алхьа, ухьу ухьхъанди, жвуван гележегдихъанди женг гъабхурахьа.
Урусатдин гъизилин хазна – инсанар ву. Думу уччву гаф хьпан, шлиз-вуш кьабул хьпан бадали кIурадарза, думу гьаци вуйивалиин узу умудлу вуза», – гъапну Владимир Путинди.
