РД-йин сагъламвал уьбхбан министр Татьяна Беляевайи ккудубшу элгьет йигъан Дагъустандин больницйириъ COVID-19 уьзриан сагъ хьуз дахънайи аьзарлуйириин улукьуз гъягъювал къадагъа апIбан гьякьнаан къарар адабгъну. Дугъу гьацира больницйириъ ва поликлиникйириъ санитарияйинна эпидемияйиз аькси къайда мюгькам апIбан уьлчмйир хъана гужал гъапIну. Мидкан дугъу кIули гъубшу видеоконференцияйин вахтна республикайин медицинайин вари идарйирин кIулин духтрариз мялум гъапIнийи.
Министри къайд гъапIганси, Дагъустан Республикайиъ коронавирусдин инфекцияйихъди аьлакьалу аьгьвалат лапра гъагъи дубхьна. КетIерццнайидар сагъ апIуз гьяракатниинди кьабул апIурайи саб жерге уьлчмйириз дилигди, COVID-19-диан аьзарлу шулайидарин ва йихурайидарин кьадар йигълан-йигъаз артухъ шула. Гьар йигъан больницйириз кьабул апIурайи касарин кьадар 300-дилан зина ву. Гъи больницйириъ, коронавирусдиан сагъ апIури, 3 агъзуртIан артухъ аьзарлуйир а.
«Гьаму йисан республикайин лап дагълу районаризра КТ-йин аппаратар тувна. Йигъ-йишв дарпиди, ичв районарин ва багахь хьайи гъуларин агьалйирин сагъ’вал ахтармиш апIинай. Санитарияйин авиацияйира ляхин апIура. Лазим гъабхьиш, санитарияйин вертолетдиз заявка тувай. Дидин кюмекниинди гъагъиди иццурайи касар вахтниинди больницайиз рукьиди. Мидланра гъайри, йишвариин туврайи медицинайин кюмекра заан дережайиъ ади ккунду, гьадму гьисабнаан реанимацияйин кюмекра. Му метлебарихъ хъуркIбан бадали, ухьухь телемедицина артмиш дапIна, гьаммишан кюмекназ гъюз гьязурди айи экспертар а», – гъапну Татьяна Беляевайи.
Министри больницйирин кIулин духтрарин фикир аьзарлуйир лазим вуйи вари дармнарихъди тямин апIбиина жалб гъапIнийи. Коронавирусдиан аьзарлу духьнайи касар сагъ апIуз дармнар чпи больницйири масу гъадагъура. Республикайин сагъламвал уьбхбан министерствойи, коронавирусдин инфекцияйиан амбулаторный къайдайиинди сагъ’валин курс гъабхурайидариз дармнар масу гъадагъну, дурар районаринна шагьрарин поликлиникйириз ва больницйириз хътаъну. Министри кIулин духтрариз, аьзарлуйир дармнарихъди тямин апIбан бадали, лазим гъабхьиш, му ляхнихьна волонтерарра жалб апIбан табшуругъ тувну.
Гьацира дилихру йигъари шагьрариъ ва гъулариъ прививкйир апIбан ляхин дедребккувал, айи вакцинйирикан ва прививкайин рубар йивбан серенжемарикан вахтниинди мялуматар тувувал ккун гъапIну.
