Табасаран райондиъ гъийин йигъаз 1240 аьзарлу ашкар дапIна, гьадму гьисабнаан 856 кас коронавирусдин инфекцияйиан аьзарлу гъахьидар ва 384 кас больницайин дару вирусдин пневмонияйиан ктIерццдар. Му мялуматар ич редакцияйиз Табасаран райондин ЦРБ-йин эпидемиологияйин отделин заведующий Мягьямед АгъатIаевди тувну.
«Коронавирусдин инфекция кубчIвнайи 856 аьзарлуйирикан 439-рин уьзур лабораторияйиъ тасдикь дапIна, хъа 416-риз «Covid-19» диагноз КТ-йин кюмекниинди дивну. Гьадму гьисабнак чпин яш 65-йис дубхьнайидар – 368 кас (31,1%), 40 йис’ан 65 йисазкьан вуйидар – 597 кас (50, 4%), 4 – бицIидарин яшариъ айидар (0, 3%) кахьра.
Къайд дапIнайи аьзарлуйирикан 1161 кас сагъ гъахьну, гьадму гьисабнаан коронавирусдин инфекция кубчIву 817 кас ва больницайин дару вирусдин пневмонияйиан иццру гъахьи 344 кас.
Уьзриан 24 кас гъийихну: дурарикан 4 кас коронавирусдин инфекция, хъа 20 кас – больницайин дару вирусдин пневмония кубчIвну уьмриан гъушну. 36 лап гъагъиди кетIерццнайи касар республикайин медицинайин идарйириз гьаъну.
«Гьамусяаьт стационариъ 14 аьзарлуйир сагъ апIура, дурар вари больницайин дару вирусдин пневмонияйиан иццурайидар ву. Амбулаторияйин къайдайиинди сагъ апIура-йидар 12 кас ву, дурарикан 6 кас коронавирусдин инфекция кубчIвнайидар ва 6 кас больницайин дару вирусдин пневмонияйиан иццурайидар.
Вари аьзалуйир ЦРБ-йин гьисабнаан лазим вуйи дармнарихъди тямин дапIна. Вари больницайиз, коронавирусдин уьзриан кетIерццнайидар сагъ апIбан бадали, 12 жюрейин дармнар духна (2594 упаковка), ва гьацира шубуб жюрейин дармнар (1646 упаковка) профилактика апIрудар.
Аьзарлуйирихьна лазим вуйи дармнар ва жара шей’ар гъахбан бадали, ЦРБ-йиъ шубуб бригада гьязур дапIна, администрацияйиан, хьур волонтёрра хъади, шубуб машин деетна. Дармнар гъахуз рягьят хьпан бадали, район шубуб зонайиз пай дапIна, гьар зонайихъ машинра, адмйирра хъитIна»,
– гъапну Мягьямед Хановичди.
Йиз сюгьбатчийин гафариинди, вари райондиз Covid-19-диз аькси 4400 вакцинйир гъахну, дурарикан 3785 «Спутник–V» вакцинйир ва 615 ЭпиВакКорона.
Вари райондиъ уьмуми кьадар 22985 касди вакцинация дапIну ккунду. Гъийин йигъаз райондиъ коронавирусдиз аькси сабпи рубар 4400 касди гъивну. Му улупнайи пландин 19,1% гьисаб шула, хъа 3490 касди вакцинайин кьюбби рубарра гъивну. Медицинайин гъуллугъчйирикан 762 касди (98,3%), райадминистрацияйин гъуллугъчйирикан – 57 касди (95%) вакцинайин рубар гъивну.
«Коронавирусдин инфекцияйиан кетIерццнайидар, больницайин дару вирусдин пневмонияйиан аьзарлу гъахьидар сагъ апIбан бадали, инфекцияйин госпиталиъ 15 койка гьязур дапIна, гьацира 6 койка Мельцеровдин боксариъра дивна. Гъагъиди ицц-рудариз госпиталиъ 4 ИВЛ аппаратар дивна, кьюбсана запасдиъра а. Вари койкйирихьна кислородра дизигна. Дармнарикан, медицинайин гъуллугъчйир коронавирусдин уьзур кубчIвбахьан уьрхру шей’арикан улхуруш, райондин больница дурарихъди бегьемди тямин дапIна. Вирусдиз аькси лазим вуйи кьадар дармнар, духтрарин сагъ’вал уьбх-бан гьам саб ражну, гьам гизаф ражари ишлетмиш апIру комбинезонар, тIягъвнихьан уьрхру костюмар, маскйир, рес-пираторар, аьйнар, экранар, элжгар, ликариин алахьру бахилар, дезинфекция апIру дакьатар, антисептикар, пульсоксиметрар, небулайзерар – вари лазим вуйи кьадарнаъди гьязурди а. Гьацира КТ аппаратра либхуз хъюбгъна, рентген-аппаратдихъдира больница тямин дапIна», – давам гъапIну йиз сюгьбатчийи.
Мягьямед АгъатIаевди къайд гъапIганси, жара гьюкуматариан, регионариан Табасаран райондиз гъюрайи инсанар 14 йигъандин арайиъ медицинайин гъуллугъчйирин гюзчиваликк гъитра. Аьхиримжи вахтна гъулариъ, яна ФАП-ариъ, духтирвалин амбулаторйириъ ва участокарин больницйириъ вуйи ляхниз артухъси фикир тувра. Душвариъ медицинайин гъуллугъчйир, иццурайидар аш-адарш аьгъю апIури, артухъди агьалйирин гьяятариз гъягъюз хъюгъна. Агьалйириз медицинайин лазим вуйи кюмек тувуз участокарин духтрар-терапевтар ва педиатрар гъягъювалра тешкил дапIна. Гъулариъ ерлешмиш духьнайи медицинайин идарйириз, коронавирусдин инфекцияйихъди иццру хьувалин лишнар айидарихъди тялукь ляхин гъабхуз, коронавирусдин уьзур кубчIвбахьан уьрхру костюмар, аьйнар, элжгар, медицинайин идарйириъ дезинфекцияйин ляхин гъабхьуз лазим вуйи дакьатар хъадаъна.
Туканариъ учIвру йишварихъ микробар терг апIру салфеткйир ва дезинфекция апIру алатар дивна.
