Вахтназ вуди республикайин Главайин вазифйир тамам апIурайи Сергей Меликовди 14-пи июлиъ региондин идара апIбан Центри (ЦУР) ашкар дапIнайи, гьял дапIну адру месэлйирин гьякьнаан гьюкмин тамам апIру органарин ва муниципалитетарин кIулиъ айидарихъди совещание гъубхну.
Совещание ачмиш апIури, дугъу къайд гъапIганси, учIру месэлйириз фикир тувну, дурар кьан дарапIди гьял апIбан бадали, 1-пи июлилан башламиш дапIну, региондин идара апIбан Центр гьяракатнаъ а.
«Региондин идара апIбан Центрихьан, ахтармишар духну, фунуб цирклиъра арайиз гъюз мумкин вуйи учIру месэла улихь ккимиди тяйин апIуз шулу», – гъапну республикайин кIулиъ айири, Дагъустандиъ гьял апIбаз ккилигурайи яшайишдинна экономикайин месэлйирин важиблувал къайд апIури.
Сергей Меликовдин гафариинди, месэлйир гьял апIбан бадали, сифте дурар ахтармиш апIуб лазим ву. «Муниципалин райондин вая шагьрин кIулиъ айири ухьуз вари ужуди вуйиваликан ктибтуру, хъасин социалин сетариан, агьалйирин аьрзйириан дици дарувал ашкар шулу. Гьаддиз мялуматар тазади имиди ахтармиш апIувал герек шула. Думу вазифа региондин идара апIбан Центри кIули гъабхиди», – къайд гъапIну республикайин Главайи.
Республикайин улихь дийигънайи учIру месэлйирин гьякьнаан доклад хьади региондин идара апIбан Центрин кIулиъ айи Султан Аьбдурялимов удучIвну гъулхнийи. Дугъан гафариинди, аьхиримжи кьюб гьяфтайиъ республикайин агьалйирихьан 2,2 агъзур аьрзйир гъафну. Дурарикан аьхюбсиб пай Мягьячгъала, Дербент, Избербаш ва Буйнагъск шагьрариан ву. Асас вуди агьалйир шид адрувалиан ва думу марцциб дарувалиан, аквар ктIушвурайивалиан ва зирзибил вахтниинди марцц дарапIрайивалиан аьрзачйир шула. Гьацира дурари жямяаьтлугъ йишвар ужу алаувал, рякъяр рас апIувал ккун апIура. Гьаддихъди сабси, агьалйири коронавирусдин инфекцияйин гьякьнаанра, асас вуди, бязи пунктариъ дидиз аькси рубар гьуркIну адрувалин, анализар тувбан къайда дюзди албагну адрувалин месэлйирра гъитIирккура.
Докладдихъ хъебехъну, республикайин кIулиъ айири шагьрарин ва районарин кIулиъ айидариз, дуфнайи аьрзйириз фикир тувну, дурар кьан дарапIди терг апIуб табшурмиш гъапIну.
Серенжемдин аьхириъ Сергей Меликовди муниципалитетарин кIулиъ айидариз, арайиз гъюрайи учIру месэлйир ахтармиш дапIну, дурар ухди гьял апIуз кюмек тувру тялукь центрар йишвариинра тешкил апIуз теклиф дивну. Мидланра савайи, региондин Главайи къайд гъапIганси, Дагъустандиъ агьал-йирихьан гъюрайи аьрзйириз лигбан цIийи къайда тешкил апIура, ва региондин идара апIбан Центрин вакиларин иштирак’валиинди мицдар совещанйир гьар вазлиъ кIули гъахиди.
