Улихьна йигъари «Дагестанская правда» газатдин конференцйир гъахру залиъ РФ-дин сагъламвал уьбхбан цирклин гъуллугъчйирин профсоюздин председатель, РФ-дин сагъламвал уьбхбан министерствойин багахь хьайи Жямяаьтлугъ советдин вакил Анатолий Домников ва РД-йин сагъламвал уьбхбан цирклин гъуллугъчйирин профсоюздин председатель Зумруд Бучаева республикайин махлукьатлу мялуматарин дакьатарин вакиларихъди гюрюшмиш гъахьнийи. Вари сюгьбат уьлкейиъ, республикайиъ коронавирусдин инфекция тарабгъувализ ва дидихъди женг гъабхбаз бахш гъапIнийи.
Пресс-конференцияйин эвелиъ Анатолий Домниковди тIягъвнин вахтна гьюкмари, СМИ-йин вакилари медицинайин гъуллугъчйирихьна вуйи янашмиш’вал ужуб терефнахъинди илтIибкIну ккуниваликан гъапнийи: «Чиб фукьан гъагъи хатIалувалиъ айивалин гъавриъ ашра, медицинайин гъуллугъчйири чпин буржи намуслувалиинди тамам апIури гъахьну ва гьамусра ляхин давам апIура. Гьюкмин, СМИ-йин вакиларин духтрарихьна вуйи гьюрмат артухъ гъабхьну. Мидиз улихьна адру правительствойин наградйир адагъну: Пироговдин орден, Лука Крымскийин медаль – дурар ляхниъ ужудар хъуркьувлар гъадагъу духтрариз тувра.
Профсоюздин председатели къайд гъапIганси, коронавирусдиз аькси вакцина айивализ лигну, гъийин йигъан тIягъвнихъди женг гъабхувал рягьят дубхьна. «ТIягъвнин лепейи нубатнан ражари ухьу ккаърашра, улихьнаси гучI’вал адархьуз. Больницйириъ пландиинди аьзарлуйир дахъру йишвар артухъ апIура, гизаф отделенйир ковиддин уьзур кайидар сагъ апIрудариз илтIикIура. Сад йис улихьна думу уьзрихьан ухьуз лап гучIури айхьуз, хъа гьамус, вакцина айивализ лигну, думу жюрейин гучI’вал амдар», – гъапну Анатолий Домниковди.
Дугъу гьацира вакцинайин зарарлуваликан интернетдиъ тарагъурайи мялуматарихъ хъугъну даккниваликанра гъапнийи. «ТIягъюн дебккну, ухьу аьдати уьмрихъна гъюбан бадали, варидари вакцинайин рубар йивувал лазим ву. Гъавриъ хьувал – важиблу ву. Медицинайин гъуллугъчйирикан 99,9 процентди вакцинайин руб йивувал чарасуз лазим вуди гьисаб апIура. Йиз ата-бабйир духтрарин тухумдикан ву, узура, йиз байра духтрар вуча. Варидари вакцинайин рубар гъивунча. Думу ляхин хатIасузуб, важиблуб вуйивал ич хусуси нумунайиинди улупунча», – къайд гъапIну Анатолий Домниковди ва журналистариз коронавирусдин цIийи жюрейихъди гъабхурайи женгнакан ктибтну.
«Эгер улихьди ухьу яшлуйир гьаму тIягъвнихьан уьрхюри айиш, гьамус дуфнайи индияйин штаммди бицIидаризра, жигьиларизра инсаф апIурадар. Аьхю яшнан инсанари вакцинайин рубар йивура, хъа жигьилариз думу ляхин апIуз мажал адар ясана рубариин дурарин хъугъ’вал алдар.
«Узу, аьзарлу духьну, сагъ гъахьунза, вакцинайин руб йивувал лазим вуйин?» – кIури, узхьан гьерхри шулу. Узу жаваб тувраза: «Ав. Уву хъана аьзарлу хьуб мумкин ву. Гьаддиз, уьзрихьна вуйи бедендин кьувват аьхюб вушра, цIийи жюрейин штаммдихьан бедендиз къурхулувал а, прививка апIувал чарасуз лазим ву», – аьлава гъапIну Анатолий Домниковди.
РФ-дин сагъламвал уьбхбан гъуллугъчйирин профсоюздин председатели, вакцинайин руб йивбан кьяляхъ 6 ваз гъубшнуш, хъана вакцинайин руб йивувал ккун апIура.
