Вахтназ вуди Дагъустандин Главайин вазифйир тамам апIурайи Сергей Меликовдин къарарниинди, Къурбан-байрам машквар къайд апIбахъди аьлакьалу вуди, июлин 19 ва 20-пи йигъар дилихру йигъарси, хъа 17-пи июль – султ йигъ – лихру йигъси мялум дапIна. Гьаци вуйиган, дагъустанлуйири хъади-хъади шубуд йигъан рягьятвал гъадабгъиди.

 

 

«26-пи июль, итни йигъра, дилихру йигъси мялум апIиди. Му Дагъустан Республикайин Конституцияйин йигъ ву. 25-пи июлиъ вари уьлкейиъ дявдинна гьюлин флотдин Йигъ къайд апIура. Дявдин флотилияйин меркез вуйи Каспийск шагьурра му серенжемариъ жанлуди иштирак хьибди. Му серенжем, КIулин главнокомандующийдин саб вуйи пландиз асас вуди, къайд апIиди»,

– гъапну Сергей Меликовди гьербе йигъан кIули гъубшу, учIру месэлйириз бахш дапIнайи совещаниейиъ.

Гьаддихъди сабси, вахтназ вуди республикайин Главайин вазифйир тамам апIурайири къайд гъапIганси, коронавирусдин инфекция тарабгъбан къурхулувал айивализ лигну, инсанар сабишв’инди уч шлу саб жюрейинра серенжемар кIули гъахидар. Му машкврар, Роспотребнадзори тасдикь дапIнайи уьлчмйир ижмиди уьрхюри, къайд дапIну ккунду.

Совещаниейиъ Сергей Меликовди республикайин муниципалитетарин главйириз машкврарин йигъари ипIру-убхъру сурсатарин кьиматар гюзчиваликк уьрхбан, дурар себеб адарди за хьуз гъидритбан табшуругъ тувну.

Гьаддиз улихьнаси вице-премьер Аьбдулмуслим Аьбдулмуслимовди кIули гъубху совещаниейиъ Мягьячгъалайиъ ва республикайин жара шагьрариъ машквраз мал-къара убккру, яна къурбан апIру, хусуси йишвар тяйин гъапIну.